Pakasaritaan ti Biag

Ti Panagserbi iti Sabsabali Ep-epenna ti Panagsagaba

KAS INSALAYSAY NI JULIÁN ARIAS

Idi 1988, idi agtawenak iti 40, kasla natalgeden ti propesional a karerak. Siak ti regional director ti maysa a multinasional a kompania. Gapu iti trabahok, inikkannak ti kompania iti nangina a kotse, nangato a sueldo, ken napintas nga opisina iti sentro ti Madrid, Espania. Imparipirip pay ketdi ti kompania a pagbalinendak a national director. Diak idi impagarup a dandanin ti kellaat a panagbalbaliw ti biagko.

MAYSA nga aldaw iti dayta a tawen, kinuna ti doktorko nga addaanak iti multiple sclerosis, maysa a sakit a di maagasan. Naldaanganak. Kalpasanna, idi nabasak no ania ti maaramidan ti multiple sclerosis iti maysa a tao, nagdanagak.a Kasla masapul nga agbiagak nga adda ti kanayon a peggad iti unos ti panagbiagko. Kasanok a maaywanan ti asawak a ni Milagros, ken ti tallo ti tawenna nga anakko a ni Ismael? Kasanomi a madaeran daytoy a kasasaad? Bayat nga agsapsapulak pay laeng iti sungbat kadagitoy a saludsod, adda manen nakas-ang a napasamak.

Agarup makabulan kalpasan ti panangibaga kaniak ti doktorko maipapan iti sakitko, pinaayabannak ti superbisorko iti opisinana ken imbagana kaniak a kasapulan ti kompania dagiti tattao nga addaan iti “makaay-ayo a personalidad.” Ket ti maysa nga addaan iti makapakapuy a sakit​—uray no rugrugi pay laeng​—ket saan a makaipaay iti kasta nga impresion. Gapuna, iti dayta met la a kanito inikkatnak ti amok iti trabahok. Iti apagdarikmat, awanen ti sekular a karerak!

Impakitak iti sanguanan ti pamiliak a napigsa ti pakinakemko ngem tarigagayak ti agmaymaysa, tapno panunotek ti baro a sasaadek ken ti masakbayak. Inkagumaak a sarangten ti kumarkaro a panagleddaangko. Nasaktanak unay gapu ta iti apagdarikmat awanen ti serserbik iti kompania.

Bimmilegak Idi Nakapsutak

Agyamanak unay ta iti daytoy makapaladingit a kasasaad, makainanamaak iti sumagmamano a gubuayan ti bileg. Agarup 20 a tawenen ti napalabas sipud idi nagbalinak a maysa kadagiti Saksi ni Jehova. Gapuna, sipapasnek nga inkararagko ken Jehova ti marikriknak ken ti panagduaduak iti masanguanan. Pinabpabilegnak ni baketko, a maysa met a Saksi ni Jehova, ken sinaranaydak ti sumagmamano a nadekket a gagayyem a ti kinaimbag ken kinadungngoda ket pudno a nakatulong unay.​—Proverbio 17:17.

Nakatulong met ti kaadda ti rebbengen kadagiti sabsabali. Kayatko a padakkelen a naimbag ti barok, sursuruan, makiay-ayam kenkuana, ken sanayen iti trabaho a panangasaba. Gapuna, diak simmuko. Kanayonanna, maysaak a panglakayen iti maysa kadagiti kongregasion dagiti Saksi ni Jehova, ket dagiti Kristiano a kakabsatko sadiay kasapulanda ti tulongko. No ipalubosko a ti panagsagabak pakapuyenna ti pammatik, ania a kita nga ulidan ti maipaayko iti sabsabali?

Di maliklikan a nagbalbaliw ti kasasaad ti salun-at ken panagbiagko​—adda nagdaksanna ngem adda met nagsayaatanna. Naminsan, nangngegko a kinuna ti maysa a doktor: “Ti sakit dina dadaelen ti maysa a tao; imbes ketdi, dayta ti mamagbalbaliw kenkuana.” Ket naammuak a saan a bin-ig a negatibo dagiti panagbalbaliw.

Umuna iti amin, tinulongannak ti ‘siitko iti lasag’ nga ad-adda a mannakaawat kadagiti parikut ti salun-at ti dadduma a tattao ken makipagrikna kadakuada. (2 Corinto 12:7) Ad-adda a natarusak ti sasao iti Proverbio 3:5: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat.” Kangrunaanna, naadalko iti baro a kasasaadko no ania a talaga ti napateg iti biag ken ti makaipaay iti pudno a pannakapnek ken panangipateg iti bagi. Adu pay laeng ti mabalinko nga aramiden iti organisasion ni Jehova. Natakuatak ti pudno a kaipapanan ti sasao ni Jesus: “Ad-adu ti kinaragsak iti panangted ngem iti panangawat.”​—Aramid 20:35.

Baro a Biag

Di nagbayag kalpasan ti pannakadayagnos ti sakitko, naawisak iti maysa a seminar idiay Madrid, a sadiay nasursuruan dagiti boluntario a Kristiano a mangpatanor iti kooperasion iti nagbaetan dagiti doktor ken dagiti pasiente a Saksi. Idi agangay, naorganisar dagidiay a boluntario kadagiti Hospital Liaison Committee. Para kaniak, dimteng dayta a seminar iti umiso a tiempo. Nakasarakak iti nasaysayaat a karera, daydiay makaipaay kaniak iti ad-adda a pannakapnek ngem iti aniaman a sekular a trabaho.

Naammuanmi iti seminar a dagiti kabubuangay a Hospital Liaison Committee ket natudingan a sumarungkar kadagiti ospital, manginterbiu kadagiti doktor, ken mangiparang kadagiti presentasion kadagiti agay-aywan iti salun-at, nga agpaay amin iti panggep a mangpatanor iti kooperasion ken tapno malapdan dagiti komprontasion. Tumulong dagiti komite kadagiti pada a Saksi a mangbirok kadagiti doktor a situtulok a mangagas a di agusar iti dara. Siempre, kas ordinario a tao, adu ti masapul nga adalek maipapan kadagiti medikal a termino, medikal a pagalagadan, ken organisasion iti ospital. Nupay kasta, daytoy a seminar ti nangbalbaliw iti panangmatmatko, a nangted iti baro a karit a nangparagsak kaniak.

Panagsarungkar Kadagiti Ospital​—Gubuayan ti Pannakapnek

Nupay in-inut ken agtultuloy a pinagbalinnak a baldado ti sakitko, immadu dagiti responsabilidadko kas miembro ti Hospital Liaison Committee. Nakaawatak iti disability pension, isu nga adda panawenko a sumarungkar kadagiti ospital. Agpapan pay iti sagpaminsan a pannakaupay, nalaklaka ken ad-adda a makagunggona dagitoy a panagsarungkar ngem iti ninamnamak. Nupay addaak laengen iti wheelchair, saan a daytoy ti nagbalin a kangrunaan a lapped. Kinaduaannak a kanayon ti padak a miembro ti komite. Maysa pay, nairuam dagiti doktor a makisarita kadagiti tattao a naka-wheelchair, ket no dadduma ad-adda a dumngegda buyogen ti dakdakkel a panagraem no makitada ti reggetko a sumarungkar kadakuada.

Iti napalabas a sangapulo a tawen, ginasgasut a doktor ti nasarungkarakon. Nanipud pay idi damo situtuloken a tumulong ti dadduma. Maysa ni Dr. Juan Duarte​—siruhano iti puso idiay Madrid a pagpannakkelna ti panangraemna iti konsiensia ti pasiente​—a nangitukon a dagus iti serbisiona. Sipud idin, nasurok a 200 a pasiente a Saksi a naggapu iti nagduduma a paset ti Espania ti naoperaannan a di nagusar iti dara. Iti panaglabas dagiti tawen, umad-adun a doktor ti agopera a di agusar iti dara. Nakatulong ti regular nga isasarungkarmi, ngem ti panagrang-ay ket gapu met iti irarang-ay ti medisina ken dagiti nagsayaat a resulta a nagun-odan iti panagopera a di agusar iti dara. Ken kombinsidokami a binendisionan ni Jehova dagiti panagreggetmi.

Naparegtaak a nangnangruna iti pannakitinnulong ti dadduma a siruhano iti puso nga espesialista iti panangagas kadagiti ubbing. Iti las-ud ti dua a tawen, sinarungkaranmi ti maysa a grupo ti dua a siruhano ken dagiti anesthesiologist-da. Inikkanmi ida kadagiti medikal a literatura a mangilawlawag no ania ti ar-aramiden ti dadduma a doktor iti daytoy a banag. Nasupapakan ti panagreggetmi idi 1999 kabayatan ti Medical Conference on Infantile Cardiovascular Surgery. Nangaramid ti dua a siruhano​—a nabaelan nga inwanwan ti mannakitinnulong a siruhano a naggapu idiay Inglatera​—iti narikut unay nga operasion iti maysa a maladaga nga anak ti Saksi a kasapulan a mabalbaliwan ti aortic valve-na.b Nakipagrag-oak kadagiti nagannak idi rimmuar ti maysa kadagiti siruhano iti siled a pagoperaan tapno ibagana a naballigi ti operasion ken rinaemda ti konsiensia ti pamilia. Ita, masansan nga awatenen dagitoy dua a doktor dagiti pasiente a Saksi iti intero nga Espania.

Ti pudno a makaparagsak maipapan kadagita a kasasaad ket ti pannakabigbigko a makatulongak kadagiti Kristiano a kakabsatko. Kaaduanna, no makiumanda iti Hospital Liaison Committee, maysa dayta kadagiti narikut unay a tiempo iti biagda. Masapul a maoperaanda, ngem agkedked dagiti doktor iti lokal nga ospital wenno dida kabaelan nga agasan ida a di agusar iti dara. Nupay kasta, no maammuan dagiti kakabsat ditoy Madrid nga adda dagiti mannakitinnulong a siruhano iti amin a tay-ak ti medisina, mabang-aranda iti kasta unay. Nakitak a timmalingenngen ti langa ti maysa a kabsat a madandanagan, gapu iti uray kaaddami laeng iti sibayna iti ospital.

Dagiti Hues ken Medikal a Pagalagadan

Kadagiti napalabas a tawen, simmarungkar met dagiti miembro ti Hospital Liaison Committee kadagiti hues. Kabayatan dagidiay a panagsarungkar, inikkanmi ida iti publikasion a Family Care and Medical Management for Jehovah’s Witnesses, a naisagana a nangnangruna tapno maipakaammo kadagita nga opisial ti takdertayo maipapan iti panagusar iti dara ken ti pannakagun-od iti panangagas a di agusar iti dara. Adda dakkel a panagkasapulan kadagitoy a panagsarungkar, ta adda idi tiempo ditoy Espania a gagangay nga autorisaran dagiti hues dagiti doktor a mangyalison iti dara a maibusor iti pagayatan ti pasiente.

Nadaeg a lugar ti opisina dagiti hues, ket iti damo nga isasarungkarko, mariknak nga awan kaimudingak bayat nga addaak iti wheelchair a lumabas iti pasilio. Kimmaro ti kastoy a riknak idi aksidente a natinnagak iti wheelchair sa naidaramudomak. Siaasi nga immasideg ti dadduma a hues ken abogado a nakakita iti napasamak tapno tumulong, ngem kasta unay ti bainko kadakuada.

Nupay di ammo dagiti hues ti rason a simmarungkarkami kadakuada, nasayaat ti pannakilangen kadakami ti kaaduan. Ti immuna a hues a sinarungkarak ket nabayag idin nga ut-utobenna ti takdertayo, ket kinunana a kayatna ti makisarita kadakami iti nabaybayag. Iti simmaganad nga isasarungkarmi, isu a mismo ti nangiduron iti wheelchair-ko a nangipan iti opisinana ken dimngeg a sipapasnek. Dagiti nagsayaat a resulta ti damo nga isasarungkarmi ti nangpatured iti nakemko ken dagiti kakaduak, ket di nagbayag, nakitami dagiti dadduma pay a nagsayaat a resultana.

Kabayatan dayta a tawen, nangibatikami iti maysa a kopia ti Family Care iti sabali pay a hues a nagsayaat ti panangawatna kadakami ken inkarina a basaenna ti linaonna. Intedko kenkuana ti numero ti teleponok kas pagarigan ta kasapulan a makiuman kadakami no adda emerhensia. Dua a lawas kalpasanna, nagtelepono ket kinunana a maysa a siruhano ti nagkiddaw kenkuana iti autorisasion a mangyalison iti dara iti maysa a Saksi a kasapulan a maoperaan. Kinuna ti hues kadakami a kayatna a tulonganmi a mangbirok iti solusion a mangraem iti tarigagay ti Saksi a di mayalisonan iti dara. Dikam narigatan a nangbirok iti sabali nga ospital, a sadiay sibaballigi a nagopera dagiti siruhano a dida nagusar iti dara. Naragsakan ti hues idi naammuanna ti resulta, ken impanamnamana kadakami a kitaenna no ania ti maaramidanna iti umasping a kasasaad iti masanguanan.

Kabayatan ti isasarungkarko kadagiti ospital, masansan a tumaud dagiti saludsod maipapan kadagiti medikal a pagalagadan, yantangay kayatmi nga ikonsiderar dagiti doktor dagiti kalintegan ken konsiensia ti pasiente. Maysa a mannakitinnulong nga ospital idiay Madrid ti nangawis kaniak a makipaset iti maysa a kurso nga ituktukonda maipapan kadagiti pagalagadan. Daytoy a kurso ti nakatulong kaniak a mangidatag iti naibatay-Biblia a panangmatmattayo iti adu nga espesialista iti daytoy a tay-ak. Tinulongannak met daytoy a mangtarus kadagiti adu a narikut a desision a nasken nga aramiden dagiti doktor.

Maysa kadagiti mannursuro iti daytoy a kurso ni Propesor Diego Gracia, a regular a mangororganisar iti nalatak a kurso agpaay kadagiti eksperto maipapan kadagiti pagalagadan para kadagiti doktor nga Espaniol ken nagbalin a natibker a sumupsuportar iti kalintegantayo nga agpili a naibatay iti pannakaammo wenno informed consent maipapan iti panangyalison iti dara.c Ti regular a pannakiumanmi kenkuana ti nangiturong iti panangawismi iti sumagmamano a pannakabagi ti sanga nga opisina dagiti Saksi ni Jehova iti Espania tapno ilawlawagda ti takdertayo kadagiti naggraduaren nga estudiante ni Propesor Gracia, a sumagmamano kadakuada ket naibilang kas kalalaingan a doktor iti pagilian.

Panangsango iti Kinapudno

Siempre, ti kastoy a makapnek a trabaho nga agpaay kadagiti kapammatian saanna a nasolbar amin a problemak. Kanayon a kumaro ti sakitko. Naimbag ta alerto pay laeng ti panunotko. Iti tulong ni baketko ken ti barok, a pulos a di agrekreklamo, kabaelak pay laeng nga ibaklay dagiti responsabilidadko. No awan ti tulong ken panangandingayda, diak koma a maaramidan daytoy. Diak kabaelan ti uray mangibutones laeng koma iti pantalonko wenno mangisuot iti amerikanak. Tagtagiragsakek a nangnangruna ti mangasaba kada Sabado a kaduak ti barok a ni Ismael, a mangidurduron iti wheelchair-ko iti ruar tapno makasaritak ti nadumaduma a tattao. Ken maasikasok pay laeng dagiti nadumaduma nga annongek kas panglakayen iti kongregasion.

Adda dagiti naliday a kanito iti biagko iti naglabas a 12 a tawen. No dadduma ad-adda a mariknak ti saem ngem ti mismo a sakit no makitak a maap-apektaran ti pamiliak gapu iti an-annayek. Ammok nga agsagsagabada, uray no dida ibagbaga. Iti di pay nabayag, iti las-ud ti makatawen, natay ti katugangak a babai ken ni tatangko. Bayat dayta a tawen, saanakon a makapasiar no awan ti wheelchair. Ni tatangko a makipagnanaed kadakami ket natay gapu met laeng iti makapakapuy a sakit. Marikna ni Milagros a nangay-aywan idi kenkuana a kasla makitkitanan no ania ti mapasamak kaniak iti masanguanan.

Nupay kasta, makaparagsak ta nagkaykaysa ti pamiliami bayat a pagtitinnulonganmi a sanguen dagiti pakarigatan. Maysaak idi a regional director iti maysa kompania nga addaan autoridad ngem ita addaak laengen iti wheelchair, ngem nasaysayaat ita ti biagko gapu ta ad-adda a makapagserbiak kadagiti sabsabali. Ti panangtulong kadagiti sabsabali maep-epna ti panagsagaba, ken tungpalen ni Jehova ti karina a pabilgennatayo iti panawen ti panagkasapulan. Kas ken Pablo, pudno a maibagak: “Iti amin a bambanag addaanak iti bileg gapu iti daydiay mangmangted kaniak iti pannakabalin.”​—Filipos 4:13.

[Footnotes]

[Kahon iti panid 24]

Ti Panangmatmat ti Asawa

Para iti asawa a babai, narigat ti makipagnaed iti maysa nga agsagsagaba iti multiple sclerosis​—iti mental, emosional, ken pisikal. Masapul a rasonableak iti aniaman nga aramidek ken situtulok a mangiwaksi iti di nainkalintegan a panagdanag iti masanguanan. (Mateo 6:34) Nupay kasta, ti panangibtur iti panagsagaba iruarna dagiti nagsasayaat a kualidad ti maysa a tao. Natibtibker nga amang ita ti panagasawami, ken nasingsinged ti relasionko ken Jehova. Pinabilegdak met iti kasta unay dagiti pakasaritaan ti biag ti dadduma nga agsagsagaba iti umasping a narikut a kasasaad. Agpadakami ken Julián nga addaan iti pannakapnek kas resulta ti napateg a serbisiona nga agpaay kadagiti kakabsat, ken napaneknekak a pulos a dinatay baybay-an ni Jehova, nupay mangyeg ti tunggal aldaw iti baro a karit.

[Kahon iti panid 24]

Ti Panangmatmat ti Anak

Nagsayaat a pagwadak ti panagibtur ken kinapositibo ni Tatang, ken mariknak nga adda serserbik no kasta nga ipasiarko iti ruar a naka-wheelchair. Ammok a diak maaramid a kanayon ti kayatko nga aramiden. Maysaak itan a tin-edyer, ngem inton nataenganakon kayatko ti agserbi kas miembro ti Hospital Liaison Committee. Gapu kadagiti kari ti Biblia, ammok a temporario laeng ti panagsagaba ken adu kadagiti kakabsat ti nakarkaro pay ti sagsagabaenda ngem kadakami.

[Ladawan iti panid 22]

Makapabileg kaniak ni baketko

[Ladawan iti panid 23]

Ti pannakisaritak iti siruhano ti puso a ni Dr. Juan Duarte

[Ladawan iti panid 25]

Tagtagiragsakenmi iti barok ti panagkaduami iti ministerio