“Pinennekna ti Sapsapulen ti Pusok”
“AGYAMANAK kadakayo manipud iti kaunggan ti pusok gapu iti nagsayaat a sagut nga Umadanika ken Jehova. Pinennekna ti sapsapulen ti pusok—ti pannakarikna nga ay-ayaten ken ipatpategnak ni Jehova. Mariknak ita nga ad-adda a nasingedak ken ni Jehova ken iti dungdungnguenna nga Anak. Kayatko nga iranud daytoy a libro iti isuamin ken ikkak ti kopia dagiti amin nga ing-ingungotek.” Kasta ti narikna ti maysa kadagiti Saksi ni Jehova maipapan iti baro a 320-panid a libro a nairuar iti “Dagiti Naregta a Manangiwaragawag iti Pagarian” a Kombension Distrito a naangay bayat ti 2002/03. Usigentayo ti dadduma a paset daytoy baro a libro ken no apay a naipablaak.
Dadduma a Linaon ti Baro a Libro
Ania ti linaon daytoy baro a libro? Amin dagiti impormasion a nailanad iti dua a maadal nga artikulo iti daytoy nga isyu—ken adu pay! Naglaon ti libro iti 31 a kapitulo, a ti tunggal maysa ket kas iti kaatiddog ti maysa a maadal nga artikulo iti Pagwanawanan. Kalpasan ti introduksion ken ti umuna a tallo a kapitulo, nabingay ti libro iti uppat a benneg, maysa iti tunggal kangrunaan a galad ni Jehova. Mangrugi ti tunggal benneg babaen ti maysa a sumario dayta a galad. Iti sumaganad a sumagmamano a kapitulo, mausig no kasano nga iparparangarang ni Jehova dayta a galad. Tunggal benneg ket naglaon iti kapitulo maipapan ken Jesus. Apay? Bueno, kinuna ni Jesus: “Ti nakakita kaniak nakitana met ti Ama.” (Juan 14:9) Kas perpekto a ladawan ni Jehova, ipaay kadatayo ni Jesus ti nalawag nga ulidan no kasano a maiparangarang dagiti galad ti Dios. Agngudo ti tunggal benneg babaen ti maysa a kapitulo a mangisuro kadatayo no kasano a matuladtayo ni Jehova iti panangiparangarang iti galad a maus-usig. Iti panangilawlawagna kadagiti galad ni Jehova, usaren daytoy baro a libro kas reperensia ti amin a libro ti Biblia.
Adda sabali pay a nagsayaat a linaon ti libro nga Umadanika ken Jehova. Mangrugi iti kapitulo 2, tunggal kapitulo ket naglaon iti kahon a napauluan “Salsaludsod a Pagmennamennaan.” Dagiti teksto ken salsaludsod a naipaay ket saan a nairanta a pangrepaso iti kapitulo. Imbes ketdi, nairantada a tumulong kadakayo a mangusar iti Biblia a mangmennamenna a naimbag iti dayta a suheto. Mairekomenda a siaannad a basaenyo ti tunggal teksto ti Kasuratan. Kalpasanna, utobenyo ti saludsod ken ikagumaanyo a personal nga iyaplikar. Ti kasta a panagmennamenna tignayenna ti pusoyo, a tumulong kadakayo nga ad-adda nga umadani ken Jehova.—Salmo 19:14.
Dagiti ladawan iti libro nga Umadanika ken Jehova ket siaannad a nasukimat ken naisagana tapno mangisuro ken mangtignay. Sangapulo ket pito a kapitulo ti naglaon iti maysa-panid nga agkakapintas a ladawan dagiti eksena ti Biblia.
Apay a Naipablaak?
Apay a naipablaak ti libro nga Umadanika ken Jehova? Ti kangrunaan a panggep daytoy baro a publikasion ket tapno tulongannatayo a mangam-ammo a naimbag ken ni Jehova. Iti kasta, mabalintayo a maaddaan iti nalaglagda a personal a relasion iti Diostayo.
Adda kadi am-ammoyo a mabalin a magunggonaan iti libro nga Umadanika ken Jehova, nalabit maysa nga agad-adal iti Biblia wenno uray maysa a di aktibo a kabsat a Kristiano? Dakayo met ngay—narugianyo kadin a binasa daytoy baro a libro? No saan pay, apay a diyo iyeskediul a rugian iti kabiitan a panawen? Utobenyo a naimbag ti mabasayo. Sapay koma ta tulongannakayo daytoy baro a libro nga ad-adda nga umadani ken ni Jehova a Dios, tapno ipakaammoyo ti naimbag a damag ti Pagarianna buyogen ti napalaus a rag-o ken regta!