“Ipakitayo a Managyamankayo”
“Bay-anyo nga agturay kadagiti pusoyo ti talna ti Kristo . . .Ket ipakitayo a managyamankayo.”—COLOSAS 3:15.
1. Ania ti makitatayo a nagdumaan ti kongregasion Kristiano ken ti lubong nga adda iti sidong ni Satanas?
ITI 94,600 a kongregasion dagiti Saksi ni Jehova iti intero a lubong, agraira ti espiritu ti kinamanagyaman. Mangrugi ken agserra ti tunggal gimong babaen ti kararag a naglaon iti panagyaman ken ni Jehova. Masansan a mangngegtayo ti “pagyamanan,” “awan aniamanna,” wenno umasping nga ebkas dagiti agtutubo ken nataengan agraman dagiti kabbaro ken nabayagen a Saksi bayat nga agdadanggayda iti panagdayaw ken naragsak a timpuyog. (Salmo 133:1) Anian a maisupadi dayta iti kinamanagimbubukodan nga agraraira iti adu a ‘saan a makaammo ken ni Jehova ken saan nga agtulnog iti naimbag a damag’! (2 Tesalonica 1:8) Agbibiagtayo iti awan panagyamanna a lubong. Saantay a masdaaw no usigentayo no asino ti dios daytoy a lubong—ni Satanas a Diablo, ti kangrunaan a mangitantandudo iti kinamanagimbubukodan, isu nga agraraira iti sangatauan ti kinatangsit ken kinarebelioso!—Juan 8:44; 2 Corinto 4:4; 1 Juan 5:19.
2. Ania a pakdaar ti nasken nga ipangagtayo, ken ania a salsaludsod ti usigentayo?
2 Gapu ta agbibiagtayo iti lubong ni Satanas, masapul nga agannadtayo a di maimpluensiaan kadagiti kababalinna. Idi umuna a siglo, pinalagipan ni apostol Pablo dagiti Kristiano iti Efeso: ‘Nagnakayo idi naminsan maitunos iti sistema ti bambanag daytoy a lubong, maitunos iti agturay iti autoridad ti angin, ti espiritu nga agtigtignay ita iti annak ti kinasukir. Wen, iti tengngada datayo amin idi naminsan nagbibiagtayo maitunos kadagiti derrep ti lasagtayo, nga ar-aramidentayo ti bambanag a nagayatan ti lasag ken ti pampanunot, ket nainkasigudan nga annaknatayo ti pungtot a kas kadagiti dadduma.’ (Efeso 2:2, 3) Kasta met laeng ti adu ita. Kasanotayo ngarud a mataginayon ti kinamanagyaman? Ania a tulong ti ipaay ni Jehova? Kadagiti ania a praktikal a pamay-an a maipakitatayo a pudno nga ammotayo ti agyaman?
No Apay nga Agyaman
3. Ania ti pagyamanantayo ken ni Jehova?
3 Ni Jehova a Dios, ti Namarsua ken Nangted iti Biagtayo, isu ti maikari iti panagyamantayo, nangnangruna no usigentayo ti dadduma kadagiti nabaknang a sagut nga imburayna kadatayo. (Santiago 1:17) Inaldaw nga agyamantayo ken ni Jehova gapu ta sibibiagtayo. (Salmo 36:9) Iti aglawlawtayo, makitatayo ti aglaplapusanan a pammaneknek ti pinarsua ni Jehova, kas iti init, bulan, ken bitbituen. Ti nabaknang a deposito dagiti mangsustiner-biag a mineral iti planetatayo, ti atmospera a buklen ti balanse a kombinasion dagiti napateg a gas, ken ti komplikado a siklo iti nakaparsuaan paneknekanda amin a nakautangtayo iti naayat a nailangitan nga Amatayo. “Adu a banag ti inaramidmo, O Jehova a Diosko,” inkanta ni Ari David, “ti mismo a nakaskasdaaw nga ar-aramidmo ken ti pampanunotmo maipaay kadakami; awan ti maipadis kenka. No nagannayasak koma nga agibaga ken agsao maipapan kadakuada, nagbalinda nga ad-adu ngem iti kabaelak nga ibinsabinsa.”—Salmo 40:5.
4. Apay a nasken a pagyamanantayo ken ni Jehova ti naragsak a timpuyog a tagtagiragsakentayo kadagiti kongregasion?
4 Nupay saanda nga agbibiag iti pisikal a paraiso, tagtagiragsaken ita dagiti adipen ni Jehova ti naespirituan a paraiso. Kadagiti Kingdom Hall, kombension, ken asambleatayo, mariknatayo nga agtigtignay kadagiti kapammatiantayo dagiti bunga ti espiritu ti Dios. Kinapudnona, no mangaskasaba ti dadduma a Saksi kadagiti tattao nga awanan wenno addaan iti bassit laeng a pannakaammo maipapan iti relihion, dakamatenda ti linaon ti surat ni Pablo kadagiti taga Galacia. Itampokda nga umuna “dagiti aramid ti lasag” ket imtuodenda kadagiti agdengdengngeg no ania ti napaliiwda. (Galacia 5:19-23) Kaaduan ti umanamong a kasta ti agdama a kasasaad ti kagimongan ti tao. No mailawlawag kadakuada dagiti bunga ti espiritu ti Dios ken maawisda iti Kingdom Hall iti lugarda tapno makitada a mismo no kasano nga agtigtignay dagitoy a bunga, adu ti insigida nga umanamong: “Ti Dios pudno nga adda iti tengngayo.” (1 Corinto 14:25) Saan laeng nga iti Kingdom Hall iti lugaryo ti kasta. Sadinoman ti papananyo, no maam-ammoyo ti siasinoman kadagiti nasurok nga innem a milion a Saksi ni Jehova, mapaliiwyo ti isu met laeng a naragsak nga espiritu. Pudno, daytoy a makapabileg a timpuyog ket maysa a rason tapno agyaman ken ni Jehova, ti mangipapaay iti espirituna tapno agbalin a posible dayta.—Sofonias 3:9; Efeso 3:20, 21.
5, 6. Kasanotayo a maipakita nga agyamantayo iti Dios gapu iti kadakkelan a sagutna, ti subbot?
5 Ti kadakkelan ken kasayaatan kadagiti perpekto a sagut ni Jehova isu ti Anakna, ni Jesus, a babaen kenkuana naipaay ti pangsubbot a daton. “No kastoy ti panangayat kadatayo ti Dios,” insurat ni apostol Juan, “ngarud datayo pagrebbengantayo nga ayaten ti maysa ken maysa.” (1 Juan 4:11) Wen, maipakitatayo ti panagyamantayo iti subbot saan laeng a babaen ti panangyebkas iti ayat ken panagyaman ken ni Jehova no di pay ket babaen ti panagbiag a mangyanninaw iti panagayat kadagiti sabsabali.—Mateo 22:37-39.
6 Ad-adda a masursurotayo nga ipakita ti panagyaman babaen ti panangusig no kasano a nakilangen ni Jehova iti nagkauna nga Israel. Adu ti insuro ni Jehova iti dayta nga ili babaen ti Linteg nga intedna ken ni Moises. Babaen ti “balabala iti pannakaammo ken iti kinapudno nga adda iti Linteg,” adu ti masursurotayo a tumulong tapno maipangagtayo ti balakad ni Pablo: “Ipakitayo a managyamankayo.”—Roma 2:20; Colosas 3:15.
Tallo a Leksion iti Mosaiko a Linteg
7. Kasano a ti urnos ti apagkapullo nangted iti gundaway kadagiti Israelita tapno maipakitada ti panagyamanda ken ni Jehova?
7 Iti Mosaiko a Linteg, nangipaay ni Jehova iti tallo a pamay-an a maipakita dagiti Israelita ti napudno a panangapresiarda iti kinaimbagna. Umuna, ti panangted iti apagkapullo. Ti apagkapullo iti bunga ti daga, agraman ti “apagkapullo ti pangen ken arban,” nasken nga agbalin dagita a “nasantuan a banag ken Jehova.” (Levitico 27:30-32) No agtulnog idi dagiti Israelita, aglaplapusanan ti bendision kadakuada ni Jehova. “‘Amin dagiti apagkapullo iyegyo iti kamalig, tapno maadda ti taraon iti balayko; ket subokendak, pangngaasiyo, iti daytoy a banag,’ kinuna ni Jehova ti buybuyot, ‘no saankonto a luktan kadakayo dagiti aribengbeng ti langlangit ket pudno a mangibukbokakto kadakayo iti bendision agingga nga awanen panagkasapulan.’”—Malakias 3:10.
8. Ania ti nakaidumaan ti boluntario a kontribusion iti panangited iti apagkapullo?
8 Maikadua, malaksid iti makalikaguman nga apagkapullo, inyurnos ni Jehova a mangipaay dagiti Israelita kadagiti boluntario a kontribusion. Binilinna ni Moises nga ibagana kadagiti Israelita: “Iti iseserrekyo iti daga a pangipanak kadakayo, mapasamakto met a no kanenyo ti aniaman iti tinapay ti daga, rebbeng a mangikontribusionkayo ken Jehova.” Dadduma kadagiti umuna a bunga ti ‘nagasal a ginilingda kas nagtimbukel a tintinapay’ ket maipaay kas “kontribusion ken Jehova” iti intero a kapkaputotanda. Imutektekanyo ta awan ti makalikaguman nga espesipiko a kaadu dagitoy nga umuna a bunga. (Numeros 15:18-21) Ngem no mangted dagiti Israelita iti kontribusion kas panagyaman, manamnamada a bendisionan ida ni Jehova. Adda met umasping nga urnos mainaig iti templo a nasirmata ni Ezequiel. Kastoy ti mabasatayo: “Ti umuna kadagiti amin nga umuna a naluom a bunga ti isuamin ken ti tunggal kontribusion ti isuamin manipud kadagiti amin a kontribusionyo—agbalinto a kukua ti papadi; ket ti umuna a bungbunga dagiti nagasal a ginilingyo rebbeng nga itedyo iti padi, tapno mapagtalinaed ti maysa a bendision iti balaymo.”—Ezequiel 44:30.
9. Ania ti insuro ni Jehova mainaig iti urnos ti panagadas?
9 Maikatlo, inyurnos ni Jehova ti panagadas. “No apitenyo ti ani ti dagayo,” imbilin ti Dios, “dika naan-anay nga apiten ti igid ti talonmo, ket ti maadas iti aniem dika piduten. Kasta met, dika burasen dagiti natedda iti kaubasam, ket dika piduten dagiti naiwara nga ubas ti kaubasam. Rebbeng nga ibatim ida a maipaay iti daydiay naparigatan ken iti ganggannaet nga agnanaed. Siak ni Jehova a Diosyo.” (Levitico 19:9, 10) Maminsan pay, awan ti naibaga nga espesipiko a kaadu. Agpannuray iti tunggal Israelita no kasano kaadu ti ibatina para kadagiti agkasapulan. Maitutop ti kinuna ni masirib nga Ari Solomon: “Daydiay mangipakpakita ti pabor iti daydiay nanumo agpapautang ken Jehova, ket ti panangtratona Isu supapakannanto kenkuana.” (Proverbio 19:17) Iti kasta, insuro ni Jehova no kasano nga ipakita ti asi ken konsiderasion kadagiti daksanggasat.
10. Ania dagiti dakes a resultana idi saan nga impakita dagiti Israelita ti panagyaman?
10 Binendisionan ni Jehova dagiti Israelita idi situtulnog nga intedda ti apagkapullo, nangipaayda iti boluntario a kontribusion, ken inranudanda dagiti napanglaw. Ngem idi naliwayanda nga impakita ti panagyaman, napukawda ti anamong ni Jehova. Nagturong dayta iti didigra ken pannakaidestiero idi agangay. (2 Cronicas 36:17-21) Ania ngarud ti maadaltayo kadagita?
Dagiti Ebkas ti Panagyamantayo
11. Ania ti kangrunaan a pamay-an a maipakitatayo ti panagyamantayo ken ni Jehova?
11 Ti kangrunaan a pamay-an a maidaydayawtayo ni Jehova ken mayebkas ti kinamanagyamantayo kalikagumanna ti “panagdaton.” Kas Kristiano, pudno nga awantayo iti sidong ti Mosaiko a Linteg, nga obligado a mangidaton kadagiti animal wenno bunga ti daga. (Colosas 2:14) Kaskasdi, indagadag ni apostol Pablo kadagiti Hebreo a Kristiano: “Kankanayon koma nga idatontayo iti Dios ti sakripisio ti panagdaydayaw, kayatna a sawen, ti bunga dagiti bibig a mangaramid iti publiko a panangideklara iti naganna.” (Hebreo 13:15) Babaen ti panangusartayo kadagiti abilidad ken ik-ikutantayo tapno idayawtayo ni Jehova, iti ministeriotayo man iti publiko wenno iti “naguummong a reprep” dagiti pada a Kristiano, mayebkastayo ti naimpusuan a panagyaman iti naayat a nailangitan nga Amatayo, ni Jehova a Dios. (Salmo 26:12) Bayat nga aramidentayo dayta, ania ti masursurotayo kadagiti pamay-an dagiti Israelita a nangyebkas iti panagyamanda ken ni Jehova?
12. No maipapan iti annongentayo kas Kristiano, ania ti masursurotayo mainaig iti panangted iti apagkapullo?
12 Umuna iti amin, kas nakitatayon, saan nga opsional ti panangted iti apagkapullo; obligado a mangted ti amin nga Israelita. Kas Kristiano, adda annongentayo a makiraman iti ministerio ken tumabuno kadagiti Nakristianuan a gimong. Saan nga opsional dagitoy nga aktibidad. Iti naindaklan a padtona maipapan iti tiempo ti panungpalan, impatuldo ni Jesus: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (Mateo 24:14; 28:19, 20) No maipapan kadagiti Nakristianuan a gimong, napaltiingan ni apostol Pablo a mangisurat: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa, kas iti kaugalian ti dadduma, no di ket agpipinnaregtatayo, ket nangnangruna a kasta bayat a makitkitayo nga umas-asidegen ti aldaw.” (Hebreo 10:24, 25) Maipakitatayo ti panagyamantayo ken ni Jehova no sirarag-o nga awatentayo ti annongentayo a mangasaba ken mangisuro agraman ti regular a pannakitimpuyog kadagiti kakabsat kadagiti gimong ti kongregasion, a matmatan dagita kas pribilehio ken dayaw.
13. Ania ti masursurotayo kadagiti urnos ti boluntario a kontribusion ken panagadas?
13 Maysa pay, magunggonaantayo no usigentayo ti dua pay nga urnos a maipakita dagiti Israelita ti panagyamanda—ti boluntario a kontribusion ken panagadas. Maisupadi iti apagkapullo, a maysa a kalikagum nga addaan iti espesipiko a kaadu, ti boluntario a kontribusion ken panagadas dida kalikaguman ti espesipiko a kaadu. Imbes ketdi, bay-anda no ania ti naimpusuan nga ited ti maysa nga adipen ni Jehova. Umasping iti dayta, nupay apresiarentayo a ti pannakiraman iti ministerio ken itatabuno kadagiti Nakristianuan a gimong ket napateg nga annongen ti tunggal adipen ni Jehova, naimpusuan kadi ti pannakipasettayo kadagita ken buyogen ti situtulok nga espiritu? Matmatantayo kadi dagita kas gundaway a mayebkastayo ti naimpusuan nga apresasion iti amin nga inaramid ni Jehova agpaay kadatayo? Sibubulos kadi a makiramramantayo kadagitoy nga aktibidad, agingga iti ipalubos ti kasasaadtayo? Wenno matmatantay dagita kas maysa laeng nga obligasion a nasken nga itungpal? Siempre, datayo ti personal a sumungbat kadagitoy a saludsod. Kastoy ti kuna ni apostol Pablo: “Paneknekan koma ti tunggal maysa no ania ti bukodna nga aramid, ket kalpasanna maaddaanto iti pakaigapuan ti panagrag-o maipapan iti bagina met laeng, ket saan nga iti panangipadis iti sabali a tao.”—Galacia 6:4.
14. Ania ti namnamaen ni Jehova maipapan iti panagserbitayo kenkuana?
14 Ammo ni Jehova a Dios no ania a talaga ti kasasaadtayo. Ammona dagiti limitasiontayo. Ipategna dagiti sakripisio, dakkel man wenno bassit, a situtulok nga ipapaay dagiti adipenna. Dina namnamaen nga agpapada ti maited ti isuamin, ken ditay kabaelan nga aramiden dayta. Idi ilawlawagna ti maipapan iti panangted iti material, kinuna ni apostol Pablo kadagiti Kristiano a taga Corinto: “No ti kinamanagsagana umun-una nga adda, nangnangruna a maawat dayta sigun iti adda iti maysa a tao, saan a sigun iti awan iti maysa a tao.” (2 Corinto 8:12) Mayaplikar met laeng daytoy a prinsipio iti panagserbitayo iti Dios. Maay-ayo ni Jehova iti panagserbitayo, saan a maibatay iti kaadu no di ket no kasanotayo nga ar-aramiden dayta—no sirarag-o ken naimpusuan met laeng.—Salmo 100:1-5; Colosas 3:23.
Sukayen ken Taginayonen ti Espiritu ti Kinapayunir
15, 16. (a) Ania ti pakainaigan ti panagpayunir iti kinamanagyaman? (b) Kadagidiay di makabael nga agpayunir, kasanoda a maipakita ti espiritu ti kinapayunir?
15 Maysa a makagunggona a pamay-an a maipakita ti panagyaman ken ni Jehova isu ti iseserrek iti amin-tiempo a ministerio. Gapu iti panagayatda ken ni Jehova ken panagyaman iti di kaikarian a kinamanangngaasina, adu a dedikado nga adipenna ti nagaramid kadagiti dakkel a panagbalbaliw iti biagda tapno ad-adu ti tiempoda nga agserbi ken ni Jehova. Dadduma ti nakapagserbi kas regular pioneer, a mangbusbosda iti promedio a 70 nga oras kada bulan a mangikasaba iti naimbag a damag ken mangisuro kadagiti tattao maipapan iti kinapudno. Kadagiti dadduma nga apektado iti nagduduma a kasasaad, pasaray mangbusbosda iti 50 nga oras kada bulan a mangasaba kas auxiliary pioneer.
16 Ngem komusta met ti adu nga adipen ni Jehova a di makapagserbi kas regular wenno auxiliary pioneer? Maipakitada ti panagyamanda babaen ti panangsukay ken panangtaginayon iti espiritu ti kinapayunir. Kasano? Babaen ti panangparegtada kadagidiay mabalin nga agpayunir, babaen ti panangimula kadagiti annakda ti tarigagay nga agserbi iti amin-tiempo a ministerio, ken babaen ti naregta a pannakiramanda iti panangasaba sigun iti ipalubos ti kasasaadda. Ti maipaaytayo iti ministerio ket agpannuray iti kauneg ti apresasiontayo iti naaramidan, ar-aramiden, ken aramidento pay ni Jehova agpaay kadatayo.
Panangipakita iti Panagyaman Babaen ‘ti Napapateg a Bambanagtayo’
17, 18. (a) Kasanotayo a maipakita ti panagyamantayo babaen dagiti ‘napapateg a bambanagtayo’? (b) Ania ti panangmatmat ni Jesus iti kontribusion ti balo, ken apay?
17 “Padayawam ni Jehova iti napapateg a bambanagmo,” kuna ti Proverbio 3:9, “ken iti umuna a bungbunga ti isuamin nga apitmo.” Saanen a makalikaguman kadagiti adipen ni Jehova ti panangted iti apagkapullo. Imbes ketdi, sinuratan ni Pablo ti kongregasion sadi Corinto: “Tunggal maysa aramidenna koma kas iti inkeddengna iti pusona, saan nga iti nadagsen a rikna wenno mapilpilit, ta ti Dios ayatenna ti naragsak a manangited.” (2 Corinto 9:7) Panangipakita met iti panagyaman no mangipaaytayo kadagiti boluntario a kontribusion a mangsuporta iti sangalubongan a panangikasaba iti Pagarian. Ti naimpusuan nga apresasion tignayennatayo a regular a mangaramid iti dayta, a nalabit mangilasin iti sumagmamano a gatad kada lawas, kas inaramid dagiti nagkauna a Kristiano.—1 Corinto 16:1, 2.
18 Saan a ti kadakkel ti kontribusiontayo ti pakakitaan ti panagyamantayo ken ni Jehova. Imbes ketdi, agpannuray dayta iti motibotayo a mangted. Dayta ti napaliiw ni Jesus kadagiti tattao a mangipispisok kadagiti sagutda iti baul ti gameng iti templo. Idi nakita ni Jesus ti napanglaw a balo a babai a nangipisok iti “dua a babassit a sinsilio a bassit unay ti pategna,” kinunana: “Ibagak kadakayo a sipupudno, daytoy a balo, nupay napanglaw, nangipisok iti ad-adu ngem iti impisokda amin. Ta amin dagitoy nangipisokda iti sagsagut manipud kadagiti teddada, ngem daytoy a babai manipud iti panagkasapulanna impisokna ti isuamin a pagbiag nga adda kenkuana.”—Lucas 21:1-4.
19. Apay a nasayaat a sukimaten dagiti pamay-an ti panangipakitatayo iti panagyaman?
19 Sapay koma ta daytoy a panangrepaso no kasano a maipakitatayo ti panagyaman tignayennatayo a mangusig kadagiti pamay-an ti panangipakitatayo iti panagyaman. Mabalintay kadi a parayrayen pay ti daton ti panagdayawtayo ken ni Jehova, agraman ti material a tulongtayo iti sangalubongan a trabaho? No ar-aramidentayo ti amin a kabaelantayo, manamnamatayo a maay-ayo unay ti naparabur ken naayat nga Amatayo a ni Jehova gapu ta ipakpakitatayo nga ammotayo ti agyaman.
Malagipyo Pay?
• Ania dagiti rason nga agyamantayo ken ni Jehova?
• Ania dagiti masursurotayo manipud iti panangted iti apagkapullo, boluntario a kontribusion, ken panagadas?
• Kasanotayo a masukay ti espiritu ti kinapayunir?
• Kasanotayo nga usaren dagiti ‘napapateg a bambanagtayo’ nga agyaman ken ni Jehova?
[Dagiti Ladawan iti panid 15]
“Tunggal naimbag a sagut ken tunggal naan-anay a rangkap aggapu iti ngato”
[Dagiti Ladawan iti panid 16]
Ania a tallo a leksion manipud iti Linteg ti naitampok ditoy?
[Dagiti Ladawan iti panid 18]
Aniada a daton ti maipaaytayo?