Dagiti Kari a Mapagtalkanyo

TI PROPETA ti Dios a ni Mikias ammona a masansan a saan a mapagtalkan dagiti kari. Idi kaaldawanna, uray dagiti kasingedan a gayyem saan a kanayon a mapagtalkan a tungpalenda ti karida. Isu nga imballaag ni Mikias: “Dikay maaddaan pammati iti maysa a kadua. Dikay agtalek iti piaren a gayyem. Manipud kenkuana nga agid-idda iti saklotmo saluadam dagiti ruangan ti ngiwatmo.”​—Mikias 7:5.

Pinagduaduaan kadi ni Mikias ti amin a kari gapu iti dayta a naladingit a kasasaad? Saan! Inyebkasna ti naan-anay a panagtalek kadagiti kari ti Diosna, ni Jehova. “Ngem no maipapan kaniak,” insurat ni Mikias, “ken Jehova nga agtultuloyakto nga agsiput. Ipakitakto ti panagur-uray iti Dios ti pannakaisalakanko.”​—Mikias 7:7.

Apay nga addaan ni Mikias iti kasta a panagtalek? Agsipud ta ammona a kanayon a tungpalen ni Jehova dagiti karina. Natungpal amin nga inkari ti Dios kadagiti amma ni Mikias. (Mikias 7:20) Gapu iti kinamatalek ni Jehova kadagiti naglabas, natalged ti pammati ni Mikias a ti Dios tungpalennanto dagiti karina.

“Awan Uray Maysa a Sao . . . ti Napaay”

Kas pagarigan, ammo ni Mikias nga inispal ni Jehova dagiti Israelita manipud iti pannakaadipen idiay Egipto. (Mikias 7:15) Ni Josue, a maysa kadagiti naispal, pinaregtana dagiti padana nga Israelita a maaddaanda koma iti pammati kadagiti amin a kari ti Dios. Iti ania a rason? Impalagip ni Josue kadakuada: “Pagaammoyo unay iti amin a pusoyo ken iti amin a kararuayo nga awan napaay a maysa a sao manipud iti amin a naimbag a sasao a sinao kadakayo ni Jehova a Diosyo. Pimmudnoda amin maipaay kadakayo. Awan uray maysa a sao kadakuada ti napaay.”​—Josue 23:14.

Pagaammo dagiti Israelita a nangaramid ni Jehova kadagiti nakaskasdaaw a banag agpaay kadakuada. Tinungpalna ti karina iti managbuteng-Dios nga amada a ni Abraham, a dagiti annakna agbalinto a kas kaadu dagiti bituen ken tagikuaendanto ti daga ti Canaan. Imbaga pay ni Jehova ken ni Abraham nga agrigatto dagiti kaputotanna iti 400 a tawen ngem agsublida iti Canaan “iti maikapat a kaputotan.” Napasamak amin dagita.​—Genesis 15:5-16; Exodo 3:6-8.

Nasayaat ti pannakatrato dagiti Israelita idiay Egipto idi panawen ni Jose nga anak ni Jacob. Ngem idi agangay, siraranggas a trinato ida dagiti Egipcio kas adipen a mangmangged. Ngem kas iti inkari ti Dios, iti uneg ti uppat a nagsasaruno a kaputotan manipud idi simrekda iti Egipto, nawayawayaan dagitoy a kaputotan ni Abraham manipud iti panangadipen dagiti Egipcio.a

Bayat ti simmaganad nga 40 a tawen, naaddaan dagiti Israelita iti kanayonan a pammaneknek a kanayon a salimetmetan ni Jehova dagiti karina. Idi awan gapgapuna a rimmaut dagiti Amalekita maibusor kadagiti Israelita, nakigubat ti Dios tapno salaknibanna ti ilina. Impaayna dagiti amin a material a kasapulanda bayat ti 40 a tawen a panagdaliasatda iti let-ang, ken kamaudiananna, pinagnaedna ida iti Naikari a Daga. Bayat a rinepaso ni Josue ti historia ti pannakilangen ni Jehova kadagiti kaputotan ni Abraham, sikokompiansa a maikunana: “Awan uray maysa a kari a napaay manipud iti isuamin a naimbag a kari nga inaramid ni Jehova iti balay ti Israel; pimmudnoda amin.”​—Josue 21:45.

Pabilgenyo ti Panagtalekyo Kadagiti Kari ti Dios

Kasanoyo a mapabileg ti panagtalekyo kadagiti kari ni Jehova, kas iti inaramid da Mikias ken Josue? Bueno, kasano a masukayyo ti panagtalek kadagiti sabsabali? Masapul nga ammuenyo a naimbag ti maipapan kadakuada. Kas pagarigan, maammuanyo ti kinamapagtalkanda babaen ti panangpaliiwyo iti simamatalek a panangikagumaanda a mangtungpal kadagiti karida. Bayat nga umun-uneg ti pannakaammoyo kadagita a tao, in-inut a masursuroyo ti agtalek kadakuada. Mabalinyo met nga aramiden ti kasta no iti panangpabileg iti pammatiyo kadagiti kari ti Dios.

Ti maysa a pamay-an a maaramidyo dayta ket babaen ti panangmennamennayo iti panamarsua ken kadagiti linteg a mangiturturong iti dayta. Dagiti sientista agtalekda kadagitoy a linteg, kas kadagiti linteg a mangiturong iti pannakabingbingay ken panagadu ti maysa a selula ti tao tapno mangpataud iti trinilion a selula a mangbukel iti bagi. Iti kinapudnona, dagiti linteg a mangiturturong iti panaggunay dagiti banag ken enerhia iti intero nga uniberso ket naipasdek la ketdi babaen ti maysa a naan-anay a mapagtalkan a Mammanday-linteg. Sigurado a mapagtalkanyo dagiti karina, a kas iti panagtalekyo kadagiti linteg a mangiturturong kadagiti pinarsuana.​—Salmo 139:14-16; Isaias 40:26; Hebreo 3:4.

Babaen ken ni propeta Isaias, a kasadaran ni Mikias, inusar ni Jehova ti regular a panagbaliw dagiti panawen ken ti nakaskasdaaw a siklo ti danum tapno iladawan ti kinamapagtalkan ti saona. Agtudo kada tawen. Danumanda ti daga ket posible kadagiti tattao ti agmula ken agapit. Mainaig iti daytoy, kinuna ni Jehova: “No kasano a ti agbuyat a tudo bumaba, ken ti niebe, manipud iti langlangit ket saan nga agsubli iti dayta a lugar, malaksid no pudno nga umagsep iti daga ket mamagtaud manipud iti dayta ken mamagtubo, ket ti bin-i pudno a maited iti managmula ken tinapay iti mangan, kasta ti pagbalinanto ti saok a rummuar manipud iti ngiwatko. Saanto nga agsubli kaniak nga awanan kadagiti nagbanagan, no di ket sigurado nga aramidennanto daydiay pagragsakak, ket sigurado nga agballiginto iti banag a nangibaonak iti dayta.”​—Isaias 55:10, 11.

Dagiti Sigurado a Kari Mainaig iti Paraiso

Ti panangusig iti panamarsua ket mangpabileg iti panagtalek iti Namarsua, ngem adda pay ti kasapulan no kayatyo a maammuan ti maipapan kadagiti kari a paset ti ‘sao a rummuar manipud iti ngiwatna.’ Tapno maammuanyo ti maipapan kadagitoy a kari ken makapagtalekkayo kadagitoy, masapul a sukimatenyo ti naipaltiing a Nainkasuratan a rekord maipapan iti panggep ti Dios para iti daga ken dagiti pannakilangenna iti tattao.​—2 Timoteo 3:14-17.

Nagtalek ni propeta Mikias kadagiti kari ni Jehova. Ngem ti rekord nga impaltiing ti Dios ket ad-adu ita ngem idi kaaldawan ni Mikias. Bayat a basaenyo ti Biblia ken mennamennaen dayta, masursuroyo met a patien a matungpal dagiti kari ti Dios. Dagitoy a kari iramanda saan laeng a dagiti mismo a kaputotan ni Abraham no di ket ti intero a sangatauan. Inkari ni Jehova iti daytoy a managbuteng-Dios a patriarka: “Babaen ti bin-im pudno unay a dagiti amin a nasion iti daga bendisionandanto ti bagbagida maigapu iti kinapudno nga immimdengka iti timekko.” (Genesis 22:18) Ti Mesias, ni Jesu-Kristo, ti kangrunaan a paset ti “bin-i,” wenno kaputotan, ni Abraham.​—Galacia 3:16.

Babaen ken ni Jesu-Kristo, siguraduen ni Jehova nga agayus dagiti bendision iti natulnog a sangatauan. Ken ania ti inkari ti Dios nga aramidenna iti kaaldawantayo? Kas sungbat, impadto ti Mikias 4:1, 2: “Mapasamakto iti kamaudianan a paset dagiti aldaw a ti bantay ti balay ni Jehova sititibkerto ti pannakaipasdekna a nangatngato ngem iti tapaw ti bambantay, ket sigurado a maipangatonto iti ngatuen dagiti turod; ket dagiti ili agayusdanto nga agturong iti dayta. Ket pudno unay a mapanto ti adu a nasion ket kunaenda: ‘Umaykayo, ket sumang-attayo iti bantay ni Jehova ken iti balay ti Dios ni Jacob; ket isuronatayto maipapan kadagiti dalanna, ket magnatayto kadagiti danana.’”

Dagidiay nasursuruan iti daldalan ni Jehova “pitpitenda dagiti kampilanda a pagbalinen a subsob ti arado ken dagiti pikada a pagbalinen a pangarbas a getgetteng.” Awanton dagiti aniaman a pagannayasan a makigubat. Din agbayag, mapunno ti daga kadagiti nalinteg a tattao, ket awanto ti mamagkintayeg kadakuada. (Mikias 4:3, 4) Wen, inkari ti Sao ti Dios nga iti sidong ti Pagarian nga iturayan ni Jesu-Kristo, pukawen ni Jehova dagiti amin a manangirurumen ditoy daga.​—Isaias 11:6-9; Daniel 2:44; Apocalipsis 11:18.

Uray dagidiay nagsagaba ken natay kas resulta ti iyaalsa ti tao maibusor iti Dios mapagungardanto met nga addaan iti namnama a biag nga agnanayon ditoy daga. (Juan 5:28, 29) Awanton ni Satanas ken dagiti demoniona, dagiti mangisungsungsong iti kinadakes, ken maikkatton dagiti epekto ti basol ni Adan babaen ti pangsubbot a daton ni Jesus. (Mateo 20:28; Roma 3:23, 24; 5:12; 6:23; Apocalipsis 20:1-3) Ket anianto ti kasasaad dagiti natulnog a tattao? Sigurado a mabendisionanda iti biag nga agnanayon iti perpekto a salun-at iti paraiso a daga!​—Salmo 37:10, 11; Lucas 23:43; Apocalipsis 21:3-5.

Anian a nakaskasdaaw a kari dagita! Ngem mabalinyo kadi a patien dagita? Siempre mabalin. Dagitoy ket saan a kari dagiti tattao a mabalin a nasayaat dagiti panggepda ngem awananda iti bileg a mangaramid kadagita. Dagita ket kari ti Mannakabalin-amin a Dios, a dina mabalin ti agulbod ken ‘saan a nabannayat maipapan iti karina.’ (2 Pedro 3:9; Hebreo 6:13-18) Mabalinyo ti maaddaan iti naan-anay a panagtalek iti amin a kari a nailanad iti Biblia, agsipud ta ti Gubuayan dagita isu ni “Jehova a Dios ti kinapudno.”​—Salmo 31:5.

[Footnote]

[Blurb iti panid 6]

“Awan napaay a maysa a sao manipud iti amin a naimbag a sasao a sinao kadakayo ni Jehova a Diosyo.”​—JOSUE 23:14

[Dagiti Ladawan iti panid 4, 5]

Iti Nalabaga a Baybay ken iti let-ang, tinungpal ni Jehova dagiti inkarina iti Israel

[Dagiti Ladawan iti panid 7]

Tinungpal ni Jehova ti inkarina ken ni Abraham. Mabendisionanto ti sangatauan babaen ti Bin-ina, ni Jesu-Kristo