“Masapul nga Agtulnogkami iti Dios kas Agturay Imbes a Kadagiti Tattao”

‘Saan a Mabalin nga Agsardengkami nga Agsao Maipapan ken Jesus’

TAWEN 33 K.P. idi, ket ti lugar isu ti nangayed a korte ti tribuna dagiti Judio idiay Jerusalem. Dita a bistaen ti Sanhedrin dagiti 12 a pasurot ni Jesu-Kristo. Apay? Agsipud ta ikaskasabada ti maipapan ken Jesus. Kapaminduan nga agtakder iti imatang ti korte da apostol Pedro ken Juan. Daytoy ti damo a pannakabista ti dadduma nga apostol.

Impalagip ti nangato a padi kadagiti 12 nga apostol ti bilin nga impaulog ti korte idi napalabas a bista. Iti daydi a tiempo, nabilinda nga agsardeng a mangisuro iti maipapan ken Jesus, simmungbat da Pedro ken Juan: “No nalinteg iti imatang ti Dios nga imdengandakayo imbes a ti Dios, ipatoyo iti bagbagiyo. Ngem no kadakami, saan a mabalin nga agsardengkami nga agsao maipapan iti bambanag a nakita ken nangngegmi.” Kalpasan a nagkararagda tapno maaddaan iti tured, intultuloy dagiti adalan ni Jesus nga inwaragawag ti naimbag a damag.​—Aramid 4:18-31.

Agsipud ta ammona nga awan nagnaanna ti napalabas a pammutbutengna, iti maikadua a panangbista imbaga ti nangato a padi: “Sipopositibo a binilindakayo a dikay itultuloyen ti mangisuro maibatay iti daytoy a nagan, ket kaskasdi, adtoy! pinunnoyo ti Jerusalem iti sursuroyo, ket determinadokayo a mangipabaklay kadakami ti dara daytoy a tao.”​—Aramid 5:28.

Determinado

Situtured a simmungbat da Pedro ken ti dadduma nga apostol: “Masapul nga agtulnogkami iti Dios kas agturay imbes a kadagiti tattao.” (Aramid 5:29) Wen, imbes a tungpalentayo dagiti tattao, masapul nga agtulnogtayo ken Jehova no maisalungasing kadagiti bilinna ti kalikagum dagiti tattao.a

Ti sasao dagiti apostol a mangpatalged iti kinasungdoda iti Dios ti rumbeng a nangkombinsir koma kadagiti kameng ti Sanhedrin. No makiddaw ti panagtulnog iti Dios, rumbeng koma nga ibaga dagitoy a papangulo iti kagimongan a Judio: “Agtulnogkayo iti Dios.” Ta saan kadi a mamatida a ti Dios ti Soberano nga Apo iti uniberso?

Iti panangibagina kadagiti amin nga apostol, imbaga ni Pedro a no maipapan iti ministerioda, agtulnogda iti Dios imbes a kadagiti tattao. Gapuna, saan a panaglabsing ti panagtulnogda. Iti mismo a pakasaritaan ti nasionda, ammo dagiti kameng ti Sanhedrin nga adda dagiti okasion a nalawag nga umiso ti agtulnog iti Dios imbes a kadagiti tattao. Dua a komadrona idiay Egipto ti nagbuteng iti Dios, saan a ken Faraon, babaen ti panangispalda kadagiti lallaki nga impasngay dagiti Hebreo a babbai. (Exodo 1:15-17) Idi pilitenda a sumuko ni Ari Ezekias, ni Jehova ti nagtulnoganna, saan a ni Ari Senaquerib. (2 Ar-ari 19:14-37) Ti Hebreo a Kasuratan, a pagaammo dagiti kameng ti Sanhedrin, ipaganetgetna a namnamaen ni Jehova nga agtulnog kenkuana ti ilina.​—1 Samuel 15:22, 23.

Nagunggonaan ti Kinatulnog

Adda laeng maysa a kameng ti nangato a korte a nalawag a nagutugot kadagiti sasao a, “masapul nga agtulnogkami iti Dios kas agturay imbes a kadagiti tattao.” Ni Gamaliel, a mararaem unay nga ukom iti Sanhedrin, naguyugoyna ti korte nga umimdeng iti nainsiriban a balakadna bayat ti nalimed a panagsasaritada. Babaen ti panangibagana kadagiti napalabas a pasamak, impatuldo ni Gamaliel a di nainsiriban a pakibianganda ti trabaho dagiti apostol. Impatinggana a kinunana: “Dikay makibiang kadagitoy a tattao, no di ket baybay-anyo ida; . . . ta no saan, amangan ta iti kinaagpaysuanna masarakankayo a mannakilaban iti Dios.”​—Aramid 5:34-39.

Dagiti nainkalintegan a sasao ni Gamaliel ti nangkombinsir iti korte a mangwayawaya kadagiti apostol. Nupay nasaplitda, saan a dayta ti nangpasardeng kadagiti apostol. Imbes ketdi, ibaga ti Biblia: “Tunggal aldaw idiay templo ken iti binalaybalay nagtultuloyda nga awan sarday a mangisuro ken mangideklara iti naimbag a damag maipapan iti Kristo, a ni Jesus.”​—Aramid 5:42.

Sibabaknang a nabendisionan dagiti apostol gapu iti natibker a panangibagada a natantan-ok ti autoridad ti Dios! Kasta met laeng ti kababalin dagiti pudno a Kristiano ita. Itultuloy dagiti Saksi ni Jehova ti agpannuray ken Jehova kas ti Katan-okan nga Agturayda. No makalikaguman kadakuada a salungasingenda dagiti bilin ti Dios, sumungbatda a kas kadagiti apostol: “Masapul nga agtulnogkami iti Dios kas agturay imbes a kadagiti tattao.”

[Footnote]

[Kahon/Dagiti Ladawan iti panid 9]

NAPANUNOTYO KADIN?

Kasano a ti mannurat iti Ebanghelio a ni Lucas ammona ti impormasion maipapan kadagiti sasao ni Gamaliel iti nalimed a panagsasarita ti Sanhedrin? Mabalin a naipalgak ken ni Lucas dagiti sasao ni Gamaliel babaen ti panangipaltiing ti Dios. Wenno nalabit a ni Pablo (maysa kadagiti estudiante idi ni Gamaliel) ti nangibaga ken Lucas maipapan iti linaon ti bitla ni Gamaliel. Wenno mabalin a nagdamag ni Lucas iti maysa a naasi ken maseknan a kameng ti nangato a korte.