Mangipangpangag Dagidiay “Siuumiso nga Agannayas”
“Amin dagidiay siuumiso nga agannayas iti agnanayon a biag nagbalinda a manamati.”—ARA. 13:48.
1, 2. Kasano a nagtignay dagiti nagkauna a Kristiano iti padto ni Jesus a ti naimbag a damag maikasaba iti intero a mapagnaedan a daga?
TI LIBRO ti Biblia nga Aramid ket naglaon kadagiti makapagagar a salaysay no kasano nga impangag dagiti nagkauna a Kristiano ti padto ni Jesus a maikasaba ti naimbag a damag ti Pagarian iti intero a mapagnaedan a daga. (Mat. 24:14) Dagiti naregta a manangikasaba nangipasdekda iti ulidan kadagidiay agbalinto met nga adalan. Gapu iti napinget a panangasaba dagiti adalan ni Jesus idiay Jerusalem, rinibu a tattao, agraman ti “dakkel a bunggoy ti papadi,” ti nakitimpuyog iti kongregasion idi umuna a siglo.—Ara. 2:41; 4:4; 6:7.
2 Tinulongan dagiti nagkauna a misionero ti adu pay a tattao nga agbalin a Kristiano. Kas pagarigan, idi napan ni Felipe idiay Samaria, adu ti dimngeg iti inkasabana. (Ara. 8:5-8) Iti panangikasabada iti Nakristianuan a mensahe, ni Pablo ken ti nagduduma a kakaduana winanasda ti Chipre, paspaset ti Asia Menor, Macedonia, Grecia, ken Italia. Kadagiti siudad a nangasabaanna, adu a Judio ken Griego ti nagbalin a manamati. (Ara. 14:1; 16:5; 17:4) Nangasaba ni Tito idiay Creta. (Tito 1:5) Okupado a nangasaba ni Pedro idiay Babilonia ken idi inlanadna ti umuna a suratna idi agarup 62-64 K.P., nasaknapen ti panangasaba dagiti Kristiano idiay Ponto, Galacia, Capadocia, Asia, and Bitinia. (1 Ped. 1:1; 5:13) Anian a nakaragragsak dagidi a tiempo! Nakaregregta dagiti manangaskasaba a Kristiano idi umuna a siglo nga uray la a naikuna dagiti bumusbusor kadakuada a ‘binalintuagda ti mapagnaedan a daga.’—Ara. 17:6; 28:22.
3. Ania dagiti resulta ita ti pannakaikasaba ti Pagarian, ken ania ti makunayo iti dayta?
3 Iti met kaaldawantayo, mapaspasaran dagiti kongregasion Kristiano ti dakkel a panagrang-ay. Saankayo kadi a maparegta no mabasayo ti tinawen a report dagiti Saksi ni Jehova ket makitayo dagiti naaramidantayo iti intero a lubong? Dikay kadi maragsakan a makaammo a dagiti manangikaskasaba iti Pagarian nangikonduktada iti nasurok nga innem a milion a panagadal iti Biblia bayat ti 2007 a tawen serbisio? Maysa pay, agarup sangapulo a milion nga interesado ti timmabuno iti Panglaglagip iti ipapatay ni Jesu-Kristo idi napan a tawen. Ti itatabunoda iti daytoy napateg a panglaglagip ipakitana nga interesadoda iti naimbag a damag. Daytoy ti mangipasimudaag nga adu pay ti trabaho nga aramidentayo.
4. Siasino dagiti mangipangpangag iti mensahe ti Pagarian?
4 Kas idi umuna a siglo, “amin dagidiay siuumiso nga agannayas iti agnanayon a biag” ipangpangagda ti mensahe ti kinapudno. (Ara. 13:48) Iturturong ni Jehova dagita a tattao iti organisasionna. (Basaenyo ti Haggeo 2:7.) Ania koma ti panangmatmattayo iti Nakristianuan a ministerio tapno naan-anay a masuportarantayo daytoy trabaho a panagurnong?
Diyo Pilpilien ti Kasabaanyo
5. Ania a kita dagiti tattao ti anamongan ni Jehova?
5 Naawatan dagiti Kristiano idi umuna a siglo a “ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” (Ara. 10:34, 35) Nasken a mamati ti maysa a tao iti daton a pangsubbot ni Jesus tapno maaddaan iti nasayaat a relasion ken Jehova. (Juan 3:16, 36) Ken pagayatan ni Jehova a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.”—1 Tim. 2:3, 4.
6. Ania ti masapul a liklikan dagiti mangikaskasaba iti Pagarian, ken apay?
6 Saan nga umiso a pilien dagiti kasabaan maibatay iti puli, kasasaad ti biag, langa, relihion, wenno aniaman a nakaidumaanda. Panunotenyo: Saankay kadi nga agyaman ta saan a mangidumduma ti tao nga immuna a nangiranud iti kinapudno kadakayo? Saan kadi a nasayaat met nga iranudyo ti mangispal-biag a mensahe iti asinoman a mayat a dumngeg?—Basaenyo ti Mateo 7:12.
7. Apay nga awan ti karbengantayo a mangukom iti asinoman?
7 Ni Jesus ti dinutokan ni Jehova a kas Ukom; gapuna, awan ti karbengantayo a mangukom iti asinoman. Umiso dayta gapu ta agpannuraytayo laeng iti ‘makita dagiti matatayo’ wenno ‘iti banag a nangngeg dagiti lapayagtayo,’ ngem ni Jesus mabasana dagiti pampanunot ken panagem ti puso.—Isa. 11:1-5; 2 Tim. 4:1.
8, 9. (a) Ania idi ni Saulo sakbay a nagbalin a Kristiano? (b) Ania ti masursurotayo iti kapadasan ni apostol Pablo?
8 Nadumaduma ti nalikudan dagiti nagbalin nga adipen ni Jehova. Ti maysa a naisangsangayan a pagarigan ket ni Saulo iti Tarso, a nagbalin nga apostol Pablo. Nakaro ti panangbusorna kadagiti Kristiano idi isu ket maysa pay laeng a Fariseo. Indadanesna ti kongregasion Kristiano gapu ta patienna a palsoda a managdaydayaw. (Gal. 1:13) Iti panangmatmat ti tao, kasla imposible nga agbalin a Kristiano ti maysa a kas kenkuana. Kaskasdi, adda nakita ni Jesus a naimbag iti puso ni Saulo isu a pinilina a mangitungpal iti naisangsangayan nga annongen. Kas resultana, nagbalin ni Saulo a maysa kadagiti kareregtaan a miembro ti kongregasion Kristiano idi umuna a siglo.
9 Ania ti masursurotayo iti kapadasan ni apostol Pablo? Nalabit adda dagiti tattao iti teritoriatayo a bumusbusor iti mensahetayo. Nupay kasla awan kadakuada ti agbalin a pudno a Kristiano, ditay koma agsardeng a makisarita kadakuada. No dadduma, mabalin a mangipangag uray ti ipagaruptayo a manangyaleng-aleng. Ti annongentayo ket itultuloytayo a kasabaan ti amin nga ‘awan sardayna.’—Basaenyo ti Aramid 5:42.
Agur-uray ti Bendision Kadagidiay Mangasaba nga ‘Awan Sardayna’
10. Apay a saantay koma a sumardeng a mangasaba kadagiti kasla nauyong a tattao? Mangisalaysaykayo iti lokal a kapadasan.
10 Makaallilaw ti makinruar a langa. Kas pagarigan, nakipagadal ni Ignacioa kadagiti Saksi ni Jehova bayat ti pannakaibaludna iti maysa a pagilian idiay Abagatan nga America. Pagam-amkanda idi gapu ta nauyong. Gapuna, dagiti padana a balud nga agar-aramid ken aglaklako kadagiti bambanag pinagbalinda ni Ignacio a parasingir kadagiti utang dagiti narigat nga agbayad. Ngem bayat a rumangrang-ay iti naespirituan ken iyap-aplikarna ti maad-adalna, nagbalin a nasingpet daytoy dati a nauyong. Saandan a pagsingiren iti utang, ngem maragsakan ni Ignacio ta nabalbaliwan ti personalidadna gapu kadagiti Nainkasuratan a kinapudno ken espiritu ti Dios. Agyaman met ta saan a nangidumduma ti agibumbunannag a nangyadal kenkuana.
11. Apay a sarungkarantayo latta dagiti tattao?
11 Ti maysa a makagapu no apay a sarungkarantayo latta dagiti tattao a napakaammuantayon iti naimbag a damag ket mabalin nga agbalbaliw wenno nagbalbaliw pay ketdin ti kasasaad ken kababalinda. Sipud idi naudi nga isasarungkartayo, mabalin a dadduma kadakuada ti naaddaan iti nakaro a sakit, naawanan iti trabaho, wenno natayan. (Basaenyo ti Eclesiastes 9:11.) Mabalin a pampanunotenda itan ti masakbayanda gapu kadagiti pasamak iti lubong. Iti kasta, mabalin a mangipangag ti dati a manangyaleng-aleng wenno bumusbusor pay ketdi. Gapuna, ditay koma bumdeng a mangiranud iti naimbag a damag iti tunggal maitutop a gundaway.
12. Ania koma ti panangmatmattayo kadagiti tattao iti teritoriatayo, ken apay?
12 Adda pagannayasan ti tao a mangidumduma ken mangukom kadagiti sabsabali. Ngem ni Jehova kitaenna dagiti tattao kas indibidual. Makitana ti nasayaat a galad ti tunggal maysa. (Basaenyo ti 1 Samuel 16:7.) Kastatayo met koma no mangasabatayo. Adu dagiti kapadasan a mangipakita a nasayaat ti resulta ti saan a panangidumduma kadagiti tattao iti teritoriatayo.
13, 14. (a) Apay nga insardeng ti payunir a sarungkaran ti maysa a babai? (b) Ania ti maadaltayo iti dayta a kapadasan?
13 Ni Sandra, maysa a payunir, naam-ammona ti mannakipiesta a ni Ruth bayat ti panangasabana iti isla ti Caribe. Namindua a nakoronaan ni Ruth kas reyna ti nailian a piesta. Interesado unay iti ibagbaga ni Sandra isu a nayurnos ti pannakipagadalna iti Biblia. Malagip ni Sandra: “Idi simrekak iti salasda, nasungadak ti dakkel a retrato ni Ruth a nakakawes iti pangpiesta ken dagiti premiona a tropeo. Sibibiddut nga impagarupko nga adayo nga aginteres iti kinapudno ti maysa a nalatak ken mannakipiesta a kas kenkuana. Gapuna, insardengko a sarungkaran.”
14 Idi agangay, napan ni Ruth idiay Kingdom Hall ket idi nalpas ti gimong, dinamagna ken Sandra, “Apay a dinak umay iyad-adalanen?” Nagpadispensar ni Sandra ket inyurnosna a maituloy ti panagadalda. Napartak ti panagrang-ay ni Ruth, inikkatna dagiti retratona iti piesta, nakiraman iti amin nga aktibidad ti kongregasion, ken indedikarna ti biagna ken Jehova. Wen, nabigbig ni Sandra a di umiso ti damo a pagarupna.
15, 16. (a) Ania ti resulta ti panangasaba ti maysa nga agibumbunannag iti kabagianna? (b) Apay a ditay koma bumdeng a mangasaba iti kabagiantayo aniaman ti naglabas a kabibiagna?
15 Adu met dagidiay nangtagiragsak kadagiti nasayaat a resulta gapu iti panangasabada kadagiti di manamati a miembro ti pamiliada, uray kadagidiay kasla narigat a mangipangag. Kasta ti kapadasan ni Joyce, maysa a Kristiano iti Estados Unidos. Rummuar-umuneg iti pagbaludan ti kayongna sipud kinatin-edyerna. “Kuna dagiti tattao nga awan serserbin ti biagna gapu ta naigamer iti droga, agtatakaw, ken nakaaramid iti adu pay a krimen. Ngem inan-anusak a kinaskasabaan iti uneg ti 37 a tawen,” kuna ni Joyce. Sibabaknang a nagunggonaan ti panangan-anusna idi nangrugi a nagpayadal ti kayongna kadagiti Saksi ni Jehova ken nangaramid kadagiti dakkel a panagbalbaliw iti biagna. Nabiit pay a nabautisaran ti kayong ni Joyce iti kombension distrito idiay California, E.U.A. idi agtawenen iti 50. Kinuna ni Joyce: “Nakasangitak gapu iti rag-o. Napalaus ti ragsakko gapu ta diak pulos nauma a nangasaba kenkuana!”
16 Mabalin a bumdengkayo a mangasaba kadagiti kabagianyo gapu iti naglabas a kabibiagda. Ngem saan a bimdeng ni Joyce a nangasaba iti kayongna. Ta asino koma ti makaammo iti linaon ti puso ti maysa? Mabalin a napasnek nga agbirbirok dayta a tao iti kinapudno. Gapuna, ditay koma ipaidam kenkuana ti gundaway a makasarak iti dayta.—Basaenyo ti Proverbio 3:27.
Epektibo a Katulongan iti Panagadal iti Biblia
17, 18. (a) Ania ti ipakita dagiti report iti intero a lubong maipapan iti pateg ti Ania a Talaga ti Isursuro ti Biblia? (b) Ania dagiti makaparegta a kapadasanyo iti panangusaryo iti daytoy a libro?
17 Sigun kadagiti report manipud iti nadumaduma a paset ti lubong, adu a nasingpet-panagpuspusoda a tattao ti nagtignay gapu iti panagadalda iti naibatay iti Biblia a libro nga Ania a Talaga ti Isursuro ti Biblia? Ni Penni, maysa a payunir iti Estados Unidos, nakairugi iti sumagmamano a panagadal babaen iti daytoy a publikasion. Dua kadagitoy ti nataengan ken naregta iti relihionda. Saan nga ammo ni Penni no ania ti agbalin a reaksionda kadagiti Nainkasuratan a kinapudno a naidatag iti libro nga Isursuro ti Biblia. Nupay kasta, insuratna, “Gapu ta nalawag, lohikal, ken simple ti pannakaidatag dagiti impormasion, dagus nga inawatda dagiti maad-adalda a kinapudno, ket dida pinagduaduaan dagita.”
18 Ni Pat, maysa nga agibumbunannag idiay Britania, inyadalanna ti maysa a babai a napilitan a nagbakuit manipud iti Asia kalpasan nga innala dagiti rebelde ti asawa ken anakna ket dina idan nakita. Pinangtaanda ti biagna, pinuoranda ti balayda, ken pinagsisinnublatanda a rinames. Gapu iti dayta, kasla awan mamaayen ti biag kenkuana, ken namin-adu a ginandatna ti agpakamatay. Ngem naaddaan iti namnama gapu iti panagadalna iti Biblia. “Dakkel ti epekto iti biagna dagiti simple a panangilawlawag ken ilustrasion iti libro nga Isursuro ti Biblia,” insurat ni Pat. Napartak ti panagrang-ayna, nakualipikar nga agbalin a di bautisado nga agibumbunannag, ken inyebkasna ti tarigagayna nga agpabautisar iti sumaganad nga asamblea. Anian a rag-o ti panangtulong kadagiti napasnek a tattao tapno matarusan ken maipategda ti namnama nga ituktukon ti Kasuratan!
“Ditay Koma Sumuko nga Agaramid iti Nasayaat”
19. Apay a nakagangganat ti trabaho a panangasaba?
19 Bayat ti panaglabas dagiti aldaw, ad-adda a naganat ti annongentayo a mangasaba ken agaramid iti adalan. Iti kada tawen, rinibu nga agtarigagay a mangammo iti Dios ti mangipangpangag iti ikaskasabatayo. Ngem dagidiay agtalinaed iti naespirituan a kinasipnget, ‘agbarbariringda nga agturong iti pannakagudas’ ta “ti dakkel nga aldaw ni Jehova asidegen.”—Sof. 1:14; Prov. 24:11.
20. Ania koma ti determinado nga aramidentayo?
20 Mabalintayo pay a tulongan dagita a tattao. Ngem tapno maaramidtayo dayta, nasken a tuladentayo dagiti Kristiano idi umuna a siglo a “nagtultuloyda nga awan sarday a mangisuro ken mangideklara iti naimbag a damag maipapan iti Kristo, a ni Jesus.” (Ara. 5:42) Tuladentayo ti ulidanda babaen ti panangibtur iti nakaro nga ibubusor, panangparang-ay iti “arte ti panangisuro,” ken panangasaba nga awan idumdumana! “Ditay koma sumuko nga agaramid iti nasayaat,” ta no agan-anustayo, sibabaknang a bendisionannatayto ti Dios.—2 Tim. 4:2; basaenyo ti Galacia 6:9.
[Footnote]
a Nabaliwan ti dadduma a nagan.
Ania ti Sungbatyo?
• Siasino dagidiay mangipangpangag iti naimbag a damag?
• Apay a ditay koma pilpilien dagiti kasabaantayo?
• Ania dagiti nagapuanantayo gapu iti libro nga Ania a Talaga ti Isursuro ti Biblia?
[Dagiti Ladawan iti panid 13]
Mangipangpangag ita ti rinibu a nasingpet ti panagpuspusoda a tattao
[Dagiti Ladawan iti panid 15]
Ania ti masursurotayo kadagiti panagbalbaliw nga inaramid ni apostol Pablo?
[Ladawan iti panid 16]
Dagiti manangiwaragawag iti naimbag a damag saanda a pilpilien dagiti kasabaanda