Surat Manipud Australia

“Itugawak a Basaen iti Sibay ti Paginuduan Inton Rabii”

NO MADAKAMAT ti maipapan kadagiti nasulinek a lugar ti Australia, mabalin a ti mapanunotyo ket dagiti nakalawlawa, nakatiktikag, nakabarbara, ken awan unay matataona a lugar. Ngem iti dayta a rehion nga adayo iti baybay, agnanaed ti dandani 180,000 a tattao, agarup 1 a porsiento iti populasion ti pagilian.

Idi ubingak, ikuykuyogdak dagiti nagannakko a Saksi ni Jehova a mapan mangasaba iti aw-away. Nagutugot ti imahinasionko gapu iti kalawa ken natural a kinapintas ti away. Naay-ayoak met kadagiti tagaaway gapu iti nakired a pammagida ken naragsak a kababalinda. Ita ta pamiliadoakon, kayatko a mapadasan met koma dayta ni baketko ken ti dua nga annakmi nga agtawen iti 10 ken 12.

Panangiplano iti Biahe

Umuna, kinuentami ti magastos. Kasano kaadayo ti kabaelanmi a papanan? Kasano kabayag ti posible a kaawanmi? Nagboluntario a sumurot ti maysa nga agassawa ken dua nga amin-tiempo a ministro a kakongregasionmi. Nagnunumuanmi nga agbiahekami bayat ti bakasion dagiti estudiante iti ngalay ti tawen. Kalpasanna, nagsuratkami iti sanga nga opisina dagiti Saksi ni Jehova ti Australia nga adda idiay Sydney tapno agkiddawkami iti teritoria a pangasabaanmi. Insingasingda a wanasenmi ti nasulinek a lugar nga asideg iti Goondiwindi, maysa a bassit nga ili nga agarup 400 a kilometro iti laud ti Brisbane a pagnanaedanmi.

Naammuanmi nga adda bassit a kongregasion dagiti Saksi ni Jehova idiay Goondiwindi. Lallalo manen a naragsakankami. Naisangsangayanto la ketdi a paset ti bakasionmi ti pannakikaduami kadagiti kapammatianmi sadiay. Impakaammomi iti dayta a kongregasion ti isasarungkarmi. Gapu iti naragsak a reaksionda, masiguradomi a segseggaanda ti isasangpetmi.

Sakbay la unay ti panagbiahemi, nagsasaritaan ti grupomi no kasano ti kasayaatan a panangikasabami iti naimbag a damag ti Pagarian ti Dios kadagiti tagaaway. Kayatmi a nangnangruna a raemen ti kultura ken kostumbre ti asinoman nga Aborigine a nalabit makasabaanminto. Kas pagarigan, ti dadduma a tribu ibilangda a ti lugarda ket kukuada amin nga agkakatribu. Gapuna, matmatanda a kinaawan panagraem no adda agapappapan lattan iti lugarda.

Ti Ipapanmi iti Away

Kamaudiananna, dimtengen ti aldaw a pinadpadaananmi. Agturongkamin idiay Goondiwindi babaen iti dua a luganmi a napno iti gargaretmi. Ti umuna a nalabsanmi ket ti naarado a kataltalonan. Idi kuan, malabsanmin dagiti naruot a kapatagan nga addaan iti sumagmamano a kaykayo ti eucalyptus. Naariwanas ti tangatang uray no tiempo ti lam-ek. Kalpasan ti sumagmamano nga oras, nakadanonkamin idiay Goondiwindi. Iti paradaan dagiti treyler, adda inabanganmi a pagdagusanmi iti rabii.

Iti kabigatanna a Domingo, nagsayaat ti mangasaba gapu ta naariwanas ken napariir. Kanayon a napudpudot ngem iti 40 a degree Celsius ti kabarana ditoy no kalgaw! Ti umuna a nangasabaanmi ket komunidad dagiti Aborigine, nga agarup 30 a kilometro ti kaadayona. Adda nangkuyog kadakami a napan ken Jenny, maysa nga ubanan a baket a lider ti komunidadda. Nagimdeng a naimbag iti naibatay-Biblia a mensahemi ken siraragsak nga inawatna ti libro nga Agsursuroka iti Naindaklan a Mannursuro.a Kalpasanna, inawisnakami a sumrek iti komunidadda tapno makasabaanmi dagiti lumugar.

Nagtataray dagiti ubbing iti dayta a komunidad tapno ipadamagda ti isasarungkarmi. Tunggal bumalay a nakasaritami ket siraraem a nagimdeng iti mensahemi ken immawat kadagiti intukonmi a naibatay-Biblia a pagbasaan. Di nagbayag, naibusankamin iti literatura, ken oras metten nga agsublikami iti ili para iti gimong ti kongregasion. Sakbay a pimmanawkami, inkeddengmi a sublian dagidiay dimi nakasabaan.

Iti dayta a malem, naragsak ti panagpapatangmi iti Kingdom Hall ket dagus a nagbalin a gagayyemmi dagiti naam-ammomi a kapammatianmi. Dagiti 25 a Saksi a lumugar ket simamatalek nga ikaskasabada ti mensahe ti Pagarian iti agarup 11,000 nga umili iti away a ti kalawana ket 30,000 a kilometro kuadrado. “Agyamankami iti panagreggetyo nga umay tumulong kadakami,” kinuna ti maysa a manangapresiar a Saksi. Kalpasan ti naragsak a gimong, napankami amin nagmerienda. Sakbay ti pannaturogmi, pinakanmi dagiti neytib a possum nga agdakdakiwas iti paradaan dagiti treyler.

“Iti Sibay ti Paginuduan Inton Rabii”

Iti simmaganad a dua nga aldaw, napan ti dua a grupomi kadagiti agaaddayo a balbalay iti beddeng ti Queensland ken New South Wales. Kaaduan a paset ti away ket addaan kadagiti saan a nalangto ken babassit a kayo ti eucalyptus a makitkita iti nalawa ken naruot a kapatagan a pagar-araban dagiti karnero ken baka. Iti dalanmi, nakakitakami iti sumagmamano a kangaroo, nga agtangartangar dagiti lapayagda bayat a sipsiputanda ti ilalabasmi. Iti pangadaywen, adda met dagiti nangayed nga emu a bumalballasiw iti natapok a pagpastoran.

Iti malem ti Martes, naranaanmi ti sangapangen a baka a siiinayad a magmagna iti kalsada. Nabayagen a ditoy ti pagpapaaraban dagiti matangtangdanan a para aywan kadagiti pinangen nga animal nangruna no tiempo ti tikag. Di nagbayag, nasabatmi ti nakakabalio a para aywan iti pangen. Insardengko ti lugan iti igid ti kalsada saak rimmuar. “Naimbag nga aldawyo apo,” kinunak. “Kasta met kenka,” insungbatna. Simmardeng ket nakitungtong daytoy a lakay, nga immassibay met kenkuana ti aso a katulonganna a mangiturturong iti pangen.

Kalpasan a nagsaritaanmi biit ti maipapan iti tikag, inserrekko ti naibasar-Biblia a mensahemi. Kinunana: “Ammoyo, ita man laengen a makangngegak iti maipapan iti Biblia sipud idi ubingak!” Mamati a dagiti panguluen ti relihion ti makagapu iti panagrakaya ti moralidad ditoy lubong. Ngem nauneg latta ti panagraemna iti Biblia. Kalpasan ti nasayaat a tungtonganmi maipapan iti Biblia, intukonko kenkuana ti libro nga Ania a Talaga ti Isursuro ti Biblia?b Inawatna ti libro sana imbulsa iti kamisadentrona, ket kinunana: “No maammuak ditoy ti isursuro ti Biblia, itugawak a basaen iti sibay ti paginuduan inton rabii.”

Ti Panagawidmi

Iti dayta a rabii, dagiti kapadasanmi ket inestoriami kadagiti kapammatianmi idiay Kingdom Hall. Inkarida a sarungkarandanto dagiti interesado a naam-ammomi. Idi nalpasen ti gimong, kasla dimi kayaten ti agpipinnakada ta nagbalinkamin a nasisinged iti maysa ken maysa. Napabilegkami amin gapu iti panagpipinnaregtami iti pammati.​—Roma 1:12.

Kabigatanna, nagawidkamin. No lagipenmi dayta a bakasionmi, patienmi a sibabaknang a binendisionan ni Jehova dagiti panagreggetmi. Napabileg ti espiritualidadmi. Idi nakaawidkamin, dinamagko kadagiti annakko: “Sadino ti kayatyo a sumaruno a pagbakasionantayo? Iti kadi met kabambantayan?” Insungbatda: “Saan, Tatang. Agsublitayto manen idiay away tapno mangasaba.” Impasarunson ni baketko: “Husto, dayta ti kasayaatan pay laeng a bakasiontayo!”

[Footnotes]