“Dayta a Talaga ti Kasasantuan ken Naindaklan a Nagan ti Dios”
Dayta ti kinuna ni Nicholas ti Cusa iti sermonna idi tawen 1430.a Isu ket maysa a tao nga aduan iti paginteresan. Kas pagarigan, inadalna ti Griego, Hebreo, pilosopia, teolohia, matematika, ken astronomia. Idi agtawen iti 22, napadayawan kas eksperto iti paglintegan ti Romana Katolika. Idi 1448, isu ket nadutokan kas kardinal.
Agarup 550 a tawen ti napalabasen, nagpaaramid ni Nicholas ti Cusa iti pasilidad a pakaaywanan dagiti nataenganen idiay Kues, a maawagan ita iti Bernkastel-Kues, maysa nga ili a masarakan agarup 130 a kilometro iti abagatan ti Bonn, Alemania. Iti dayta met la a pasilidad ti ayan ita ti libraria ti Cusa nga addaan iti nasurok a 310 a manuskrito. Ti maysa kadagita ket ti naisurat iti ima a Codex Cusanus 220 a nakailanadan ti sermon ni Nicholas idi 1430. Iti dayta a sermon a napauluan iti In principio erat verbum (Idi Punganay Adda ti Sao), ni Nicholas ti Cusa inusarna ti Latin ti ispelingna a Iehoua para iti Jehova.b Kastoy ti naisurat iti panid 56 maipapan iti nagan ti Dios: “Dayta ti impanagan ti Dios iti bagina. Dayta ket ti Tetragrammaton, kayatna a sawen, ti nagan a buklen ti uppat a letra. . . . Dayta a talaga ti kasasantuan ken naindaklan a nagan ti Dios.” Dagita a sinao ni Nicholas ket maitunos iti kinapudno a makita ti nagan ti Dios iti orihinal a manuskrito ti Hebreo a Kasuratan.—Ex. 6:3.
Dayta a codex idi rugrugi ti maika-15 a siglo ti maysa kadagiti adda pay laeng a kadaanan a dokumento a nakaipatarusan ti Tetragrammaton iti “Iehoua.” Dayta a naisurat a testimonia ti ad-adda a mangpatalged a dagiti patarus ti nagan ti Dios nga umasping iti “Jehova” ti gagangay unay a pannakaisurat ti nagan ti Dios iti sinigsiglo.
[Footnotes]
a Ni Nicholas ti Cusa ket pagaammo met kas ni Nikolaus Cryfts (Krebs), Nicolaus Cusanus, ken Nikolaus von Kues. Kues ti nagan ti nakayanakanna nga ili idiay Alemania.
b Ti panggep dayta a sermon ket tapno idepensana ti sursuro a Trinidad.
[Ladawan iti panid 16]
Libraria ti Cusa