“Ti Anghel ni Jehova Agpakpakarso iti Intero nga Aglikmut”
Kas Insalaysay ni Christabel Connell
Okupadokami unay a mangsungsungbat kadagiti saludsod ni Christopher maipapan iti Biblia isu a saanmi a napupuotan nga adalemen ti rabii ken dimi nasipsiputan nga agkarataliaw ni Christopher iti tawa. Idi agangay, kinunana kadakami, “Natalgedkayo itan a pumanaw.” Gapuna, intulodnakami iti ayan ti bisikletami ket nagpakadakamin. Ania ngamin ti nakapegpeggad a napaliiwna?
NAYANAKAK idiay Sheffield, England, idi 1927. Nabomba ti balaymi bayat ti Gubat Sangalubongan II, isu a nakipagnaedak ken lolak kabayatan ti panageskuelak. Iti maysa a kombento a nageskuelaak, kanayon nga imtuodek kadagiti madre no apay a nakasaksaknap ti kinadakes ken kinaranggas. Awan man la kadakuada wenno iti dadduma a relihioso a tattao ti nakaipaay kaniak iti makapnek a sungbat.
Idi nalpas ti Gubat Sangalubongan II, nagsanayak kas maysa a nars. Immakarak idiay London tapno agtrabaho iti Paddington General Hospital, ngem nakarkaro pay a kinaranggas ti nakitak iti siudad. Idi kapampanaw laeng ni manongko para iti Gubat ti Korea, naimatangak ti naranggas a panagkinnabil iti mismo a ruar ti ospital. Awan man la ti nangarayat iti biktima, a nabulsek gapu iti pannakakabilna. Bayat daydi a tiempo, kinuyognak ni Nanang a mapan makiuman kadagiti espiritista, ngem kaskasdi a diak naawatan no apay a nakaro ti kinadakes.
Naparegta nga Agadal iti Biblia
Naminsan, simmarungkar ti inauna a manongko a ni John, a maysa idin a Saksi ni Jehova. “Ammon kadi no apay a mapaspasamak amin dagitoy a kinadakes?” insaludsodna. “Saan,” kinunak. Linukibna ti Bibliana ket binasana ti Apocalipsis 12:7-12. Ita, ammokon a ni Satanas ken dagiti demoniona ti kangrunaan a makinggapuanan iti kinadakes ditoy lubong. Kas insingasingna, nakipagadalak iti Biblia di nagbayag kalpasanna. Ngem diak nagpabautisar idi gapu iti panagbuteng iti tao.—Prov. 29:25.
Nagbalin met a Saksi ti manangko a ni Dorothy. Idi nagawid manipud iti internasional a kombension idiay New York (1953) a kaduana ti nobiona a ni Bill Roberts, imbagak kadakuada a nakipagadalakon iti Biblia. Insaludsod ni Bill kaniak: “Binasam kadi dagiti amin a naisitar a teksto? Inugedam kadi dagiti sungbat iti libro?” Idi imbagak a saan, kinunana: “No kasta, saanka a talaga a nagadal! Kasaritam ti nangyadal kenka ta irugiyo manen!” Kadagita a tiempo a rinugiandak a riribuken dagiti demonio. Gapuna, kiniddawko ken Jehova a salakniban ken ispalennak manipud iti impluensiada.
Panagpayunir iti Scotland ken Ireland
Nabautisaranak idi Enero 16, 1954, nalpasko ti kontratak kas nars iti Mayo, ket nagpayunirak iti Hunio. Kalpasan ti walo a bulan, naibaonak kas special pioneer idiay Grangemouth, Scotland. Sadiay a nariknak a ti anghel ni Jehova ket “agpakpakarso iti intero nga aglikmut” bayat a nagserbiak iti dayta a naiputputong a teritoria.—Sal. 34:7.
Idi 1956, naawisak nga agpayunir iti Ireland. Adda dua a kaduak a naibaon iti siudad ti Galway. Iti umuna nga aldaw, nangasabakami iti balay ti maysa a padi. Kalpasan ti sumagmamano a minuto, adda simmangpet a polis ket inkuyognakami iti presinto. Idi naalanan dagiti nagan ken adresmi, dagus a nagtelepono. Nangngegmi a kinunana, “Wen, Apo padi, ammok no sadino ti pagnanaedanda.” Imbaon gayam ti padi! Napilitan ti akinkukua iti pagdagdagusanmi a mangpapanaw kadakami. Gapuna, insingasing ti sanga nga opisina a panawanmin ti lugar. Naladawkami iti sangapulo a minuto idi dimtengkami iti estasion ti tren. Ngem saan pay a nakapanaw ti tren, ken adda lalaki nga agur-uray sadiay tapno siguraduenna a makalugankami. Napasamak dayta kalpasan laeng ti tallo a lawas a panagyanmi idiay Galway!
Naibaonkami idiay Limerick, sabali pay a siudad a napigsa ti impluensia ti Iglesia Katolika. Kanayondakami a bugkawan dagiti managderraaw. Adu a bumalay ti mabuteng a makitungtong kadakami. Iti napalabas a tawen, nakabkabil ti maysa a kabsat a lalaki iti kabangibang a bassit nga ili ti Cloonlara. Gapuna, maragsakankami idi nakasaritami ni Christopher, a nadakamat iti rugi, ta kiniddawna nga agsublikami tapno pagsasaritaanmi dagiti saludsodna maipapan iti Biblia. Bayat ti isasarungkarmi, simrek ti padi ket binilinna ni Christopher a papanawennakami. Ngem kinunana iti padi: “Inawisko dagitoy a babbai ken nagtuktokda sakbay a simrekda. Idinto ta sika, saanka nga inawis ken saanka pay a nagtuktok.” Sipupungtot a pimmanaw ti padi.
Saanmi nga ammo a nangummong gayam ti padi iti adu a lallaki a mangtambang kadakami iti ruar ti balay ni Christopher. Gapu ta ammona a bumusbusorda, inaramid ni Christopher ti kas iti naibaga iti rugi. Dinakami pinagawid agingga a di pimmanaw ti bunggoy. Naammuanmi idi agangay a di nagbayag, napilitanda a sangapamiliaan a mangpanaw iti lugarda ket immakarda idiay England.
Naawis iti Gilead
Nakaplanoakon a tumabuno iti 1958 a Pagayatan ti Dios nga Internasional nga Asamblea iti New York idi naawatko ti awis para iti maika-33 a klase ti Gilead. Imbes nga agawidak kalpasan ti asamblea, nagserbiak idiay Collingwood, Ontario, Canada, ket nagtalinaedak sadiay agingga a nangrugi ti klase ti Gilead idi 1959. Ngem kabayatan ti asamblea, naam-ammok ni Eric Connell. Naammuanna ti kinapudno idi 1957 ken nagpayunir idi 1958. Kalpasan ti asamblea, inaldaw a sinuratannak bayat ti kaaddak idiay Canada ken bayat ti panageskuelak iti Gilead. Pinampanunotko no anianto ti pagbanagan dayta kalpasan ti panagturposko.
Nakapatpateg a pasamak iti biagko ti panageskuelak iti Gilead. Karaman iti dayta a klase da Manang Dorothy ken ti asawana. Idiay Portugal ti nakaibaonanda kas misionero. Diak ninamnama a maibaonak iti Ireland. Anian a pannakaupayko idi saannak a naikuyog ken manangko! Dinamagko iti maysa kadagiti instruktormi no adda aniaman a naaramidko a di umiso. “Awan,” kinunana. “Dakayo ken ti kaduam a ni Eileen Mahoney ti immanamong a maibaon iti sadinoman a nasion ditoy lubong,” ket maysa kadagita ti Ireland.
Nagsubli iti Ireland
Nakasubliak iti Ireland idi Agosto 1959 ket naitimpuyogak iti Dun Laoghaire a Kongregasion. Kabayatanna, nagawid ni Eric idiay England ket naragsakan unay gapu ta asideg laeng ti ayanko. Kayatna met ti agbalin a misionero. Yantangay agkasapulan pay laeng ti Ireland kadagiti misionero kadagidi a tiempo, inkeddengna ti agpayunir ditoy. Immakar iti Dun Laoghaire, ket nagkallaysakami idi 1961.
Kalpasan ti innem a bulan, nagpasar ni Eric iti nakaro nga aksidente iti motorsiklo. Nagbirri ti bangabangana, isu a di masigurado dagiti doktor no makalasat. Kalpasan a nayospital iti tallo a lawas, lima a bulan nga inaywanak iti pagtaenganmi agingga a naimbagan. Intultuloyko nga inaramid ti amin a kabaelak iti ministerio.
Idi 1965, naibaonkami iti kongregasion nga addaan iti walo nga agibumbunannag idiay Sligo, maysa a puerto iti makin-amianan a laud ti kosta. Kalpasan ti tallo a tawen, intuloymi ti nagpaamianan iti bassit a kongregasion idiay Londonderry. Iti naminsan a panagawidmi manipud panangasaba, adda alad a barut a naibalandra iti kalsada a batog ti pagnanaedanmi. Nangrugin ti Riribuk iti Amianan nga Ireland. Ti gunglo dagiti agtutubo pinuoranda dagiti lugan. Nabingayen ti siudad iti nagbaetan dagiti Protestante ken Katoliko. Napeggad ti mapan iti sabali a lugar iti dayta a siudad.
Panagbiag ken Panangasaba Kabayatan ti Riribuk
Naibaonkami iti sadinoman gapu iti ministeriomi. Nariknami manen a kasla agpakpakarso dagiti anghel iti aglikmutmi. No mairana nga addakami kadagiti lugar nga adda rumsua a riribuk, pumanawkami a dagus sakamto agsubli no natalnan ti kasasaad. Naminsan, adda napasamak a riribuk iti asideg ti apartmentmi ket nagparsiak iti pasamanomi ti dadduma a maur-uram a banag manipud iti asideg a paglakuan iti pinta. Saankami a nakaturog ta amangan no mauram ti apartmentmi. Kalpasan ti iyaakarmi idiay Belfast idi 1970, nadamagmi a ti paglakuan iti pinta ket pinuruakanda iti nasindian a nakabote a gas isu a nauram agraman daydi apartmentmi.
Iti naminsan a kaduak ti maysa a kabsat a babai a rimmuar iti ministerio, nakakitakami iti saan a gagangay a kita ti tubo iti maysa a pasamano. Intultuloymi ti nagna. Sumagmamano a minuto kalpasanna, bimtak dayta. Impagarup dagiti nagruruar a lumugar a dakami ti nangikabil iti dayta a tubo! Iti dayta met la a kanito, pinastreknakami ti maysa a lumugar a kabsat a babai. Gapu iti dayta, namati dagiti kaarrubana nga awan ti pakainaiganmi iti bimtak a tubo.
Idi 1971, nagsublikami idiay Londonderry tapno sarungkaranmi ti maysa a kabsat a babai. Idi inestoriami kenkuana ti nagdaliasatanmi ken ti nalabsanmi a checkpoint, insaludsodna, “Awan kadi ti nakabantay iti checkpoint?” Nasdaaw idi kinunami, “Adda ngem didakam met sinitsitar.” Apay? Ngamin, kadagiti napalabas nga aldaw, adda nangala ken nangpuor iti kotse ti maysa a doktor ken ti maysa a polis.
Idi 1972, immakarkami idiay Cork. Idi agangay, nagserbikami idiay Naas, kalpasanna, idiay Arklow. Kamaudiananna idi 1987, naibaonkami ditoy Castlebar, nga isu ti ayanmi ita. Dakkel a pribilehio para kadakami ti tumulong nga agibangon iti Kingdom Hall ditoy. Ngem idi 1999, nagsakit iti nakaro ni Eric. Kaskasdi, babaen ti tulong ni Jehova ken ti naayat a suporta ti kongregasion, nadaerak dayta a situasion ken naaywanak ni lakayko agingga nga immimbag.
Naminduan a nageskuelakami ken Eric iti Pioneer Service School. Agserserbi pay laeng kas panglakayen. Nakaro ti reumak isu a naoperaan ti padingpadingko ken dagiti tumengko. Napasarak ti nakaro nga ibubusor dagiti relihion ken ti nakaro a riribuk iti politika ken kagimongan, ngem ti maysa kadagiti kadakkelan a karit a nakaipasanguak isu ti panagsardengko nga agmaneho. Maysa a suot dayta gapu ta saanakon a makapan iti sadinoman a kayatko. Dakkel ti naitulong ti manangipateg a kongregasion. Ita, makapasiarakon iti aglawlaw babaen ti sarukod, ken makaadayoakon babaen ti de bateria a traysikel.
Nakapagserbikami ken Eric kas special pioneer iti dagup a nasurok a 100 a tawen—98 kadagita ti nabusbosmi ditoy Ireland. Dimi pulos pinanunot ti agsardeng nga agpayunir. Saankami a mangnamnama kadagiti milagro, ngem kombinsidokami a dagiti nabileg nga anghel ni Jehova ket “agpakpakarso iti intero nga aglikmut” dagidiay agbuteng ken matalek nga agserserbi kenkuana.