Makapagserbikayo Kadi iti Lugar nga Agkasapulan iti Ad-adu nga Agibumbunannag iti Pagarian?

“Nanam-ay ti biagmi iti Estados Unidos ngem madanagankami di la ket ta maimpluensiaankamto a sangapamiliaan iti materialistiko a panagbiag dagiti tattao sadiay. Dati a misionerokami ken baketko ket kayatmi a maisubli dayta a simple ngem naragsak a panagbiag.”

GAPU iti dayta a tarigagayda, idi 1991, nagsurat da Ralph ken Pam iti sumagmamano a sanga nga opisina tapno iyebkasda ti tarigagayda nga agserbi kadagiti lugar nga agkasapulan iti ad-adu nga agibumbunannag iti Pagarian. Imbaga ti sanga nga opisina ti Mexico nga adda naganat a panagkasapulan kadagiti agibumbunannag a makabael a mangasaba kadagiti Ingles ti pagsasaoda iti dayta a pagilian. Kinapudnona, kinuna ti sanga nga opisina a dayta a teritoria ket ‘purawen a maipaay iti pannakaani.’ (Juan 4:35) Di nagbayag, da Ralph ken Pam, agraman ti dua nga annakda nga agtawen idi iti 8 ken 12, inawatda dayta nga awis ket nagsaganada nga umakar iti sabali a pagilian.

Naglawa a Teritoria

Insalaysay ni Ralph: “Sakbay a pimmanawkami iti Estados Unidos, kinuna ti dadduma a maseknan a kakabsat: ‘Napeggad ti umakar iti sabali a pagilian!’ ‘Kasanon no agsakitkayo?’ ‘Apay nga umakarkayo pay laeng iti teritoria nga Ingles ti pagsasaona? Saanto met laeng nga interesado iti kinapudno dagiti Ingles ti pagsasaoda a tattao sadiay!’ Ngem desididokamin nga umakar. Adun a tawen a pinampanunotmi dayta. Liniklikanmi dagiti utang a mabayag a bayadan, nagurnongkami iti kuarta, ken namin-adu a pinagsasaritaanmi a sangapamiliaan dagiti pakarigatan a mabalin a pakaipasanguanminto.”

Umuna, ni Ralph ken ti pamiliana bimmisitada iti sanga nga opisina ti Mexico. Impakita dagiti kakabsat sadiay ti mapa ti intero a pagilian sa kinunada, “Daytoy ti teritoriayo!” Nagindeg ti pamiliada iti San Miguel de Allende, maysa nga ili nga aduan kadagiti ganggannaet, a masarakan agarup 240 a kilometro iti amianan a laud ti Mexico City. Tallo a tawen kalpasanna, nabuangay sadiay ti Ingles a kongregasion a buklen ti 19 nga agibumbunannag. Dayta ti umuna nga Ingles a kongregasion idiay Mexico​—ngem dakkel pay ti trabaho a rumbeng nga iringpas.

Mapattapatta a maysa a milion nga umili iti Estados Unidos ti agnanaed idiay Mexico. Malaksid kadagita, adu a propesional a Mexicano ken estudiante ti mangus-usar iti Ingles kas maikadua a lenguaheda. Kinuna ni Ralph: “Inkarkararagmi nga ad-adu pay koma ti umay tumulong a mangasaba. Iti pagtaenganmi, kanayon nga adda nakasagana a pagyanan dagiti kakabsat nga umay ‘agsimisim iti daga.’”​—Num. 13:2.

Pinasimpleda ti Biagda Tapno Mapalawada ti Ministerioda

Di nagbayag, simmangpet ti ad-adu pay a kakabsat a mayat a mangpalawa iti ministerioda, kas kada Bill ken Kathy manipud Estados Unidos. Nakapagserbidan iti 25 a tawen kadagiti teritoria a nagkasapulan iti ad-adu nga agibumbunannag. Planoda ti agsursuro iti Espaniol ngem nagbaliw dayta idi immakarda iti ili ti Ajijic kadagiti takdang ti Lake Chapala, maysa a napintas a lugar a kayat a pagnaedan dagiti retirado manipud Estados Unidos. Kinuna ni Bill: “Iti Ajijic, nagbalinkami nga ad-adda nga okupado iti panagbirok kadagiti tattao nga Ingles ti pagsasaoda nga interesado iti kinapudno.” Iti uneg ti dua a tawen a kaadda da Bill ken Kathy iti dayta nga ili, naragsakanda a nakaimatang iti pannakabuangay ti maikadua nga Ingles a kongregasion idiay Mexico.

Da Ken ken Joanne manipud Canada kayatda a pasimplien ti biagda ken busbosen ti ad-adu a panawenda a mangasaba. Immakarda met idiay Mexico. Kuna ni Ken: “Nabayag sakbay a nairuamkami nga agbiag iti lugar a saan a kanayon nga adda koriente, telepono, wenno napudot a danum.” Nupay kasta, makaparagsak ti mangasaba. Di nagbayag, nadutokan ni Ken kas ministerial nga adipen. Kalpasan ti dua a tawen, nadutokan kas panglakayen. Idi damo, narigatan ti balasangda a ni Britanny gapu ta manmano laeng ti agtutubo iti dayta a bassit nga Ingles a kongregasion. Ngem idi nangrugi a makiraman kadagiti proyekto a panagibangon iti Kingdom Hall, immadu ti nasayaat a gagayyemna iti intero a pagilian.

Magagaran da Patrick ken Roxanne manipud Texas iti Estados Unidos idi naammuanda nga adda Ingles ti pagsasaona a teritoria nga agkasapulan iti ad-adu nga agibumbunannag ken saan unay nga adayo iti lugarda. “Kalpasan a pinasiarmi ti Monterrey, maysa nga ili iti amianan a daya ti Mexico, nariknami nga iturturongnakami ni Jehova a tumulong sadiay,” kuna ni Patrick. Iti uneg ti lima nga aldaw, nailakoda ti balayda iti Texas ket napanda iti lugar nga agkasapulan iti agibumbunannag. Saan a nalaka ti pamastrekan idiay Mexico, ngem iti dua laeng a tawen, naragsakanda a nakakita iti bassit a grupo dagiti 17 a Saksi a nagbalin a kongregasion a buklen ti 40 nga agibumbunannag.

Da Jeff ken Deb ti sabali pay a pagassawaan a nangpasimple iti biagda tapno mapalawada ti ministerioda. Inlakoda ti dakkel a balayda iti Estados Unidos sa immakarda iti bassit nga apartment idiay Cancún, maysa a siudad iti makindaya a kosta ti Mexico. Nairuamda idi a makiasamblea kadagiti de air-con a patakder nga asideg iti balayda. Ita, masapul nga agbiaheda iti walo nga oras tapno matabunuanda ti kaasitgan nga Ingles nga asamblea a maangay iti awan linongna a patakder. Ngem naragsakanda unay a nakakita iti pannakabuangay ti maysa a kongregasion idiay Cancún nga addaan iti agarup 50 nga agibumbunannag.

Dadduma a Mexicano a kakabsat ti timmulong met iti trabaho a panangasaba kadagiti Ingles ti pagsasaoda. Kas pagarigan, idi nangngeg ni Rubén ken ti pamiliana a nabuangay ti umuna nga Ingles a kongregasion idiay San Miguel de Allende ket ti intero a Mexico ti teritoria dayta a kongregasion, dagus nga inkeddengda ti mapan tumulong. Kaipapanan dayta nga agsursuroda iti Ingles, makibagayda iti sabali a kultura, ken agdaliasatda iti 800 a kilometro iti kada lawas tapno makatabunoda kadagiti gimong. Kuna ni Rubén: “Maragsakankami a mangasaba kadagiti ganggannaet a nabayagen nga agnanaed iti Mexico ngem damoda laeng a mangngeg ti mensahe ti naimbag a damag iti bukodda a lenguahe. Adda dagidiay nakalua a nangyebkas ti apresasionda kadakami.” Kalpasan ti itutulongda iti kongregasion iti San Miguel de Allende, nagserbi ni Rubén ken ti pamiliana kas payunir iti ili ti Guanajuato, iti sentral Mexico, a sadiay nakatulongda a nangbuangay iti Ingles a kongregasion nga addaan iti nasurok a 30 nga agibumbunannag. Agserserbida itan iti Ingles ti pagsasaona a grupo iti Irapuato, maysa nga ili iti asideg ti Guanajuato.

Panangasaba Kadagidiay Narigat a Madanon

Malaksid kadagiti ganggannaet, adu a Mexicano ti agsasao ti Ingles. Masansan a narigat nga iranud kadakuada ti mensahe ti Pagarian gapu ta agnanaedda iti lugar dagiti nababaknang a dagiti laeng katulong ti makasaritada. Wenno no makisarita man dagiti bumalay, saanda a kayat ti dumngeg iti mensahetayo gapu ta ipagarupda a dagiti Saksi ni Jehova ket maysa laeng a bassit a sekta. Ngem no dagita a bumalay ket kasarita dagiti ganggannaet a Saksi, dadduma kadakuada ti dumngeg.

Usigentayo ti kapadasan ni Gloria iti siudad ti Querétaro, iti sentral Mexico. Kinunana: “Nakasaritadak idin dagiti Espaniol ti pagsasaoda a Saksi ngem diak dimngeg kadakuada. Nupay kasta, idi nagparikut ti pamiliami ken dagiti gagayyemko, naldaanganak isu a nagkararagak iti Dios tapno tulongannak. Di nagbayag kalpasanna, simmarungkar iti pagtaenganmi ti maysa nga Americana. Inimtuodna no adda asinoman iti balaymi a makapagsao iti Ingles. Naginteresak gapu ta ganggannaet, isu nga imbagak nga ammok ti agsao iti Ingles. Bayat nga agsasao, pampanunotek, ‘Ania ngata ti ar-aramiden daytoy nga Americana ditoy?’ Ngem inkararagko ti tulong ti Dios. Isu a nalabit a daytoy a ganggannaet ti sungbat ti Dios iti kararagko.” Inawat ni Gloria ti maysa a panagadal iti Biblia ket napartak ti panagrang-ayna ken nabautisaran iti laksid ti ibubusor ti pamiliada. Isu ket agserserbi itan kas regular pioneer, ken maysa metten a Saksi ti asawa ken anakna.

Dagiti Gunggona Dagidiay Mangpalawa iti Ministerioda

Adda dagiti karit a kakuyog ti panagserbi iti lugar nga agkasapulan iti ad-adu nga agibumbunannag iti Pagarian ngem adu met ti itdenna a gunggona. Ni Ralph a nadakamat iti rugi, kunana: “Adda dagiti inyadalanmi iti Biblia a taga-Britania, China, Jamaica, Sweden, ken uray pay dagiti mabigbigbig a tattao iti Ghana. Dadduma kadakuada ti simrek iti amin-tiempo a serbisio. Iti panaglabas dagiti tawen, naimatangan ti pamiliami ti pannakabuangay ti pito nga Ingles a kongregasion. Nakikadua kadakami a nagpayunir ti dua nga annakmi ket agserserbida itan iti Bethel iti Estados Unidos.”

Iti agdama, adda 88 nga Ingles a kongregasion ken adu pay a grupo idiay Mexico. Ania ti makagapu iti kasta a napartak a panagrang-ay? Adu nga Ingles ti pagsasaoda a tattao idiay Mexico ti saan idi a makaskasabaan dagiti Saksi. Dadduma ti naginteres gapu ta awan ti pamilia ken gagayyemda iti naggapuanda a pagilian a manglapped kadakuada. Ngem adda met dagidiay nakipagadal iti Biblia gapu ta retiradodan isu nga adda panawendan kadagiti naespirituan a bambanag. Maysa pay, nasurok a kakatlo kadagiti agibumbunannag iti Ingles a kongregasion ti agserserbi kas payunir, a nakatulong iti kinaregta ken kinarang-ay dagita a kongregasion.

Dagiti Bendision nga Agur-uray Kadakayo

Awan duadua nga ad-adu a tattao iti intero a lubong ti mangipangag iti mensahe ti Pagarian no mangngegda dayta iti bukodda a lenguahe. Makaparegta a makita ti adu a nataengan iti naespirituan a kakabsat​—agtutubo ken nataengan, naasawaan ken saan​—a sidadaan nga umakar kadagiti lugar nga agkasapulan iti ad-adu nga agibumbunannag iti Pagarian. Pudno, mabalin a maipasangoda kadagiti pakarigatan, ngem awan kaimudingan dagitoy no idilig iti rag-oda no adda masarakanda nga interesado nga umawat kadagiti kinapudno a linaon ti Biblia. Mabalinyo kadi ti mangaramid kadagiti panagbalbaliw tapno makapagserbikayo iti maysa a teritoria iti pagilianyo wenno iti sabali a pagilian nga agkasapulan iti ad-adu nga agibumbunannag?a (Luc. 14:28-30; 1 Cor. 16:9) No aramidenyo dayta, masiguradoyo nga adu a bendision ti agur-uray kadakayo.

[Footnote]

[Kahon iti panid 21]

Nadlawda Dagiti Naragsak a Retirado

Manipud Britania, immakar ni Beryl idiay Canada. Sadiay a nagtrabaho kas manedyer iti nadumaduma nga internasional a kompania. Isu ket nagbalin pay a nasigo a kumakabalio ken napili a mangibagi iti Canada iti 1980 nga Olimpiada. Idi nagretiro, nagnaed idiay Chapala, Mexico. Masansan a manganda ken lakayna kadagiti restawran sadiay. Idi nadlawna a naragsak dagiti retirado nga Ingles ti pagsasaoda, nakiam-ammo ket dinamagna no ania ti ar-aramidenda iti Mexico. Naammuanna a dandani amin dagita a naragsak a retirado ket Saksi ni Jehova. Napanunot da Beryl ken ni lakayna a no ti kinaragsak ket aggubuay iti panangammo iti Dios, kasta met ngarud ti aramidenda. Kalpasan ti sumagmamano a bulan nga itatabunoda kadagiti gimong, immanamong ni Beryl a makipagadal iti Biblia ket nagbalin a Saksi. Sumagmamano a tawen itan nga agserserbi ni Beryl kas regular pioneer.

[Kahon iti panid 22]

“Maysa a Bendision ti Kaaddada Ditoy”

Dagidiay immakar kadagiti pagilian nga agkasapulan iti ad-adu nga agibumbunannag ket apresiaren unay dagiti lumugar a kakabsat. Insurat ti maysa a sanga nga opisina idiay Caribbean: “No pumanaw ti ginasut a ganggannaet nga agserserbi ditoy, maapektaran ti kinarang-ay ti kongregasion. Maysa a bendision ti kaaddada ditoy.”

Kuna ti Sao ti Dios a “dagiti babbai a mangibagbaga iti naimbag a damag ket dakkel a buyot.” (Sal. 68:11) Gapuna, di pakasdaawan nga adu a kakabsat a babbai ti agserserbi iti sabali a pagilian. Nagdakkel a tulong dagita a managsakripisio a kakabsat. Napaliiw ti maysa a sanga nga opisina iti Makindaya a Europa: “Iti adu a kongregasion ditoy, dakkel a porsiento ti bilang dagiti kakabsat a babbai, a no dadduma agingga iti 70 a porsiento ti kaaduda. Kaaduan kadakuada ti kabbaro iti kinapudno, ngem dagiti ganggannaet nga awan assawana a kakabsat a babbai a payunir ket dakkel ti naitulongda iti panangsanay kadagita a kabbaro. Talaga a bendision kadakami dagita a ganggannaet a kakabsat!”

Ania ti makuna dagita a kakabsat a babbai maipapan iti panagserbi iti sabali a pagilian? “Adu dagiti karit,” kuna ni Angelica, maysa a kabsat nga agtawen iti nasurok a 30 ken sumagmamanon a tawen a nagserbi iti sabali a pagilian kas payunir. “Iti maysa a teritoria, inaldaw a magmagnaak kadagiti napitak a kalsada ken makapaupay ti pannakakitak iti adu nga agsagsagaba. Ngem makariknaak ti pannakapnek iti panangtulongko kadagiti tattao iti ministerio. Natukay met ti riknak iti masansan a panagyaman dagiti lumugar a kakabsat a babbai gapu iti iyaayko a panangtulong kadakuada. Maysa a kabsat ti nangibaga kaniak a ti nawatiwat a panagbiahek nga immay iti pagilianda tapno agserbi kas payunir ti nakatignay kenkuana nga agserbi met iti amin-tiempo.”

Ni Sue, maysa a payunir nga agtawen iti nasurok a 50, kunana: “Sigurado a maipasangoka kadagiti karit ngem awan kaimudingan dagitoy no idilig kadagiti bendision a masagrapmo. Makaparagsak ti ministerio! Yantangay ad-adu ti panawenko a makikadua nga agserbi kadagiti agtutubo a kakabsat a babbai, iranranudko kadakuada dagiti maad-adalko iti Biblia ken kadagiti publikasiontayo no kasano a mapagballigian dagiti tubeng. Masansan nga ibagada a ti panangdaerko kadagiti parikut bayat iti adun a tawen a panagserbik kas di naasawaan a payunir ti nakatulong kadakuada a mangmatmat a kabaelanda met a parmeken dagiti pakarigatanda iti biag. Nakariknaak iti napalalo a pannakapnek gapu iti panangtulongko kadagitoy a kakabsat.”

[Mapa iti panid 20]

(Para iti aktual a pannakaurnosna, kitaem ti publikasion)

MEXICO

Monterrey

Guanajuato

Irapuato

Ajijic

Chapala

Lake Chapala

San Miguel de Allende

Querétaro

MEXICO CITY

Cancún

[Ladawan iti panid 23]

Dadduma ti maragragsakan a mangasaba kadagiti ganggannaet a damo a makangngeg iti naimbag a damag