Salsaludsod Dagiti Agbasbasa

Posible kadi a maibaga ti eksakto a bilang dagiti Mesianiko a padto iti Hebreo a Kasuratan?

No adalentayo a naimbag ti Hebreo a Kasuratan, maammuantayo ti adu a padto a natungpal ken Jesu-Kristo. Dakamatenda dagiti detalye maipapan iti nagtaudan ti Mesias, tiempo a panagparangna, aktibidadna, pannakatratona, ken ti akemna iti urnos ni Jehova a Dios. No pagtitiponen dagita, makapataudda iti maysa a ladawan a tumulong kadatayo a mangilasin a ni Jesus ti Mesias. Ngem masapul nga agannadtayo no kayattayo nga ammuen ti eksakto a bilang dagiti Mesianiko a padto iti Hebreo a Kasuratan.

Saan nga agpapada ti ibilang dagiti tattao a Mesianiko a padto. Iti libro a The Life and Times of Jesus the Messiah, kuna ni Alfred Edersheim a sigun iti nagkauna a sursurat dagiti rabbi, adda 456 a teksto iti Hebreo a Kasuratan nga ibilangda a Mesianiko a padto, nupay adu kadakuada ti saan a mangdakamat iti Mesias. Ngem no usigen a naimbag ti 456 a teksto, saan a masigurado no ti dadduma kadagita ket maipapan ken Jesu-Kristo. Kas pagarigan, kuna ni Edersheim nga ibilang dagiti Judio a Mesianiko ti Genesis 8:11. Patienda a “ti bulong ti olibo nga insangpet ti kalapati ket naggapu iti Bantay ti Mesias.” Dinakamatna pay ti Exodo 12:42. Kas panangilawlawag iti di umiso a pannakaawat dagiti Judio iti dayta a teksto, kinunana: “No kasano a rimmuar ni Moises idiay let-ang, rimmuar met ti Mesias idiay Roma.” Adu nga eskolar ti marigatan a mamagtunos kadagiti dua a teksto ken ti di umiso a pannakayaplikarna ken Jesu-Kristo.

Marigatantayo latta a mangammo iti eksakto a bilangda uray no adalentayo dagiti padto a natungpal ken Jesu-Kristo. Alaentayo a pagarigan ti Isaias kapitulo 53, a naglaon iti sumagmamano a padto maipapan iti Mesias. Kuna ti Isaias 53:2-7: “Isu awanan iti nadaeg a porma . . . Isu inumsi ken liniklikan dagiti tattao . . . Dagiti sakittayo isuda ti inawitna . . . Isu naduyok gapu iti salungasingtayo . . . Isu maip-ipan idi a kas iti karnero nga agturong iti pannakaparti.” Maibilang kadi a maymaysa a Mesianiko a padto ti intero a kapitulo 53 ti Isaias, wenno agduduma?

Usigentayo met ti Isaias 11:1: “Addanto rummuar a saringit manipud iti pungdol ni Jesse; ket manipud kadagiti ramutna nabunganto ti maysa a tarubong.” Nagparang manen dayta iti bersikulo 10 iti isu met la a sasao. Ibilangtayo kadi dagita a bersikulo kas dua a nagduma a padto wenno maysa laeng? Dagiti konklusion iti Isaias kapitulo 53 ken Isaias kapitulo 11 nalawag nga apektaranna ti dagup ti Mesianiko a padto.

Gapuna, nasaysayaat no ditay pakaringgoran ti dagup ti Mesianiko a padto iti Hebreo a Kasuratan. Nangipablaak ti organisasion ni Jehova iti listaan dagiti padto maipapan ken Jesus ken iti kaitungpalan dagita.a Makatulong ken makaparegta dagita iti personal ken sangapamiliaan a panagadaltayo ken iti panangasabatayo. Kanayonanna, adu a Mesianiko a padto, aniaman ti dagupda, ti nabileg a mangpaneknek a ni Jesus ti Kristo, wenno Mesias.

[Footnote]