“Talna Kadagiti Tattao nga Addaan Naimbag a Nakem”

Rason nga agselebrar ti dadduma iti Krismas.

Kada tawen, ti papa ken ti dadduma a lider ti relihion ibagbagada ti mensahe maipapan iti talna wenno kappia, a manginanamada a no panawen ti Krismas maitungpal ti inwaragawag ti anghel: “Iti daga talna kadagiti tattao nga addaan naimbag a nakem.” No tiempo ti Krismas, dadduma ti agpasiar kadagiti ibilangda a nasantuan a lugar tapno agselebrar.

Apay a mapaay ti panggep?

Temporario laeng ti kappia no panawen ti Krismas. Kas pagarigan, idi Disiembre 1914, bayat ti Gubat Sangalubongan I idiay Europe, nagkakadua dagiti British ken German a soldado a nangrambak iti Krismas. Nagririnnanudanda dagiti taraon, arak, ken sigarilio. Nagay-ayamda pay iti soccer. Ngem apagbiit laeng ti panagkappiada. Insalaysay ti maysa a soldado a British iti suratna ti kinuna ti soldado a German: “Agkappiata ita. Ngem inton bigat makilabanka para iti pagiliam ket makilabanak met para iti pagiliak.”

Ania dagiti makatulong a prinsipio ti Biblia?

“Adda maysa nga ubing a nayanak kadatayo . . . mapanagananto iti . . . Prinsipe ti Kappia. Ti kinaruay ti naprinsipean a panagturay ken ti kappia awanto ti ngudona.” (Isaias 9:6, 7) Saan kadi a makaipaay iti namnama dayta a padto maipapan ken Jesu-Kristo? Saan a nayanak ni Jesus ditoy daga tapno mangyeg laeng iti maysa nga aldaw a talna iti kada tawen. Kas nailangitan nga Agturay, mangyegto iti agnanayon a pudpudno a talna.

“Babaen kaniak [ken Jesus] maaddaankayo koma iti talna. Iti lubong addaankayo iti rigat, ngem bumilegkayo! Pinarmekko ti lubong.” (Juan 16:33) Uray ita, tultulongan ni Jesus dagiti pasurotna a maaddaan iti talna. Pudno, agpaspasar iti rigat dagiti Kristiano. Ngem babaen ti Biblia naawatanda no apay a mapaspasamak ti panagsagaba ken no kasano nga iyeg ni Jesus ti agnanayon a kappia, isu a natalna ti panunotda.

Tagtagiragsaken dagiti Saksi ni Jehova ti kappia babaen ti panangsurotda iti sasao ni Jesus, aniaman ti nasion, kolor ti kudil, puli, wenno lengguaheda. Tapno mapaneknekam a mismo, tumabunoka kadagiti gimongda iti Kingdom Hall. Nalabit umanamongka kas kadagiti dadduma a nasaysayaat daytoy ngem iti kappia no panawen ti Krismas.