Kas Nasursuruan ni Jehova
1 Nakuna ti Isaias 50:4: “Ni Soberano nga Apo Jehova a mismo ti nangted kaniak iti dila dagidiay a nasursuruan, tapno mabalinko a sungbatan dagidiay a nabannogan babaen iti sao.” Ti maysa a wagas a panangaramid ni Jehova iti daytoy isut’ babaen ti panangsanay nga ipaay iti Teokratiko a Pagadalan iti Ministerio. Ti kinapinget iti tunggal maysa, nupay kasta, isut’ kaskasdi a kasapulan. Ti Giya ti Eskuelaan iti panid 39 kunaenna: “Agpapan pay kasano ti kaadu a daras a tinamingmo iti maysa a tipo ti naituding kenka, ti panagsagana isut’ kanayon a napateg.” Agaplikar daytoy kadatayo amin, addakaman iti daytoy a pagadalan iti sumagmamano a bulan wenno manipud pay idi nangrugi daytoy a pagadalan idi 1943.
2 Ti panagsagana saklawenna ti kinapuot iti oras. Kunaen ti instruksion: “Awan ti palawag a lumbes iti oras.” No ti kabsat a mangted iti Palawag Num. 1 ket masansan nga agsubra iti oras, masapul a maipaayan iti pribada a balakad. Masapul met nga irugi ti manangaywan iti pagadalan ti gimong iti umiso a tiempo ken agintek idiay naikeddeng a tiempo a maipaay iti balakadna.
3 Daydiay paset a dagiti lawag ti Biblia isut’ saan koma a basta maysa a repaso iti naituding a material. Masapul a tulongan daydiay ispiker dagiti timmabuno a mangipateg no apay ken kasano a ti impormasion ket napateg kadatayo.
4 Iti Palawag Num. 3 mabalin a madakamat dagiti nagduduma a parang. Ngem sipapanunot iti kangrunaan a panggep daytoy a pagadalan, nga isut’ panangidatag iti kinapudno a siuumiso ken nabatad, kaykayattayo a ti pabuya ket saklawenna iti tay-ak ti serbisio wenno impormal a panangasaba.
5 Ti Palawag Num. 4, no maadaw iti Dagiti Saludsod nga Iyimtuod ti Agtutubo—Dagiti Sungbat nga Epektibo, isut’ maidutok kadagiti agdadamo wenno agtutubo nga estudiante. Dagitoy a palawag ti agsinnublat iti kada sabali a lawas babaen ti presentasion manipud iti Panakirinnason a libro. Kadagiti Palawag Num. 3 ken Palawag Num. 4, masapul a ti estudiante ket usarenna iti agparang a tema.
6 Masapul a maalagad ti annad no adda maiballaet a material. Agpapan pay no ti material ket ramanenna laeng iti maysa wenno dua a parapo, kaskasdi a maiparang nga epektibo babaen ti panangbasa ken panangilawlawag kadagiti Kasuratan, a mausar dagiti ilustrasion, kdp. Gagangay, saan a kasapulan ti agnayon iti material manipud ruar daydiay naituding. Mabalindakayo a suroten dagiti timmabuno idiay publikasion a nakaibasaran iti palawagyo.
7 Ti Dios a pagdaydayawantayo isut’ nangted iti saan a maibus a gubuayan ti kinasirib. (Roma 11:33) Ngarud, aramidenyo a determinasion, ti naan-anay a magunggonaan manipud iti parabor ni Jehova nga inaramidna nga agpaay kadatayo babaen ti regular nga itatabuno ken panagpaset iti Teokratiko a Pagadalan iti Ministerio bayat ti 1991.