Saludsod

● Apay a nasken a mairingpas a maiyadal a naan-anay dagiti dua a libro kadagiti baro a disipulo nupay nabautisarandan sakbay a malpas ti maikadua a libro?

Kasapulan dagiti agdadamo ti tulong tapno dumtengda iti umiso a pannakaammo iti kinapudno. (Col. 1:9, 10) Adda kadatayo ti pribilehio a bumadang kadakuada a gumun-od iti nasayaat a pannakaawat kadagiti pamunganayan a doktrina ti Biblia, dagiti pagalagadan ti Biblia iti moral, ken kaasping dagitoy a bambanag. Tumulong daytoy kadakuada a makapuesto iti kinapudno tapno masarkedanda iti aniaman a suot a sumangbay iti masakbayan.

Kasapulan met dagiti estudiante ti tumaengan iti pannakaawat. (1 Cor. 14:20) Tapno tumaenganda iti espiritual, ti personal a panagadal babaen iti maysa a maestro ti makatulong. Idiktar ngarud ti kinasirib a masapul nga agtultuloy iti panagadal ti Biblia iti pagtaengan agingga a makompleto a maadal dagiti dua a libro.

KALPASAN TI BAUTISMO

Nakuna ni Jesus a masapul nga agaramidtayo iti disipulo—a bautisaran ken suruan ida. (Mat. 28:19, 20) Kaaduan kadagiti instruksion a maisuro ti maaramid a sumaruno iti bautismo. Ti pannakaammo manipud iti maysa laeng a libro ket saan nga umdas tapno mabukel iti espiritual a pannakasanay. Kasapulan dagiti kanayonan nga instruksion a maiparbeng kenkuana iti ministerio ken tapno makabalan a mangsaranget kadagiti pakasuotan a dumteng kadagiti agserbi ken Jehova kadagitoy nga aldaw. Ti umuna a publikasion a maadal ipaayna ti pannakaawat kadagiti pundamental. Ti maikadua a publikasion saklawenna dagiti Kristiano a kalidad. Dagitoy a publikasion iti mabalin nga ti Agbiag nga Agnanayon a libro wenno uray ania kadagiti Nagkaykaysa iti Panagdayaw a libro wenno Pudno a Talna a libro. Ti panagtultuloy a panagadal agingga iti mairingpas daydiay maikadua a libro isut’ mangted iti nasarked nga edukasion kadagiti panggep ni Jehova agraman met iti natan-ok a Kristiano a pagalagadanna. Tumulong daytoy kadagiti agdadamo a makaramut a nalaing iti pammati. (Col. 2:7) Maipaay iti kanayonan nga impormasion maipapan ti panagreport kadagitoy a panagadal, kitaenyo ti “Saludsod” idiay Enero, 1988 a Ti Ministeriotayo iti Pagarian.

Siempre, kalpasan ti bautismo dagiti agdadamo ti manamnama nga agprogreso iti espiritual. (Heb. 6:1-3) Iti kaaduan a kaso saan agbayag ti pannakairingpas iti maikadua a libro. Maipaayan ngarud ti maysa a baro a tao iti solido a pundasion.