Panangtungpal iti Ministeriotayo ti Pagarian Babaen iti Tulong ti Index
1 Tapno matungpal iti ministeriotayo, impaay ni Jehova iti nabaknang a giya a maipaay kadagiti napapateg a publikasion iti librariatayo. Mapasayaattayo kadi iti pannakausar kadakuada? Ti umuna a makatulong kadatayo iti daytoy isu ti Watch Tower Publications Index, a nagtultuloy a naiwarnak manipud pay 1961.
2 Kasano a makatulong daytoy nga Index a mangtungpal iti ministeriotayo? Babaen ti panangitudona iti dalan nga agturong kadagiti ekselente a balakad ken salaysay a nalpasen a naipaay. Naisagana daytoy Index a maipaay iti intero a panagkakabsat. Manipud ubbing agingga kadagiti appo a lallakay ken babbaket, dagiti agdadamo nga estudiante ti Biblia agingga kadagiti panglakayen, aminda ti makasarak kadagiti reperensia a kasapulanda a maipaay iti aniaman a makagunggona a panggep.
NO KASANO A SARAKEN DAYDIAY KASAPULANYO
3 No interesadokayo iti kaipapanan iti maysa a bersikulo, kasayaatan no mapankayo iti indese dagiti kasuratan idiay likud. Adda kadi nangisitar iti Juan 10:30 a nangpadas a nangpaneknek iti Trinidad? Ti indese dagiti kasuratan ti mangiturong kadakayo iti material a mangilawlawag no apay a nakuna ni Jesus dagita a sasao. Daytoy indese iti kasuratan ti mamabaknang iti personal a panagbasayo ti Biblia bayat a sapulen iti pannakailawlawag dagiti bersikulo a kasla makatikaw ken nalibeg.
4 Daydiay indese iti suheto isut’ mangted iti naiduma a dana nga agturong iti isu met laeng nga impormasion. Kas ehemplo, nalabit a kayatyo nga ammuen no ania ti aramiden no iti di mamati nga asawa a lalaki ket agkedked nga itugotyo dagiti annakyo kadagiti gimong. Mabalinyo ti mapan kadagiti paulo nga “Husbands,” “Wives,” “Children,” “Opposition,” wenno “Meetings.” No dikay masarakan iti sungbat idiay baba ti umuna a paulo, padasenyo dagiti dadduma. No masarakanyo iti kangrunaan a paulo a pagarupenyo nga umiso, umuna nga ukagenyo dagiti agkukuros a reperensia a diretso idiay babana. Masansan a daytoy ti mangsalbar iti tiempo babaen ti panangilasin iti sabali a paulo a mas maitutop iti punto.
5 Ti kinalaing a mangusar iti Index isut’ mangted iti nawadwad a balligi a mangtungpal iti sagrado a rebbengentayo. Dagiti pamiliatayo, dagiti estudiantetayo ti Biblia, ken dagiti kongregasiontayo ti magunggonaan bayat nga agbalintayo a nalalaing a mangusar iti daytoy a kagawaan. Dagiti umay a ruar iti Ti Ministeriotayo iti Pagarian isudat’ mangibinsabinsa kadagiti masinnunuo a benneg no sadino manipud iti Watch Tower Publications Index ti napateg a makatulong kadatayo a mangtungpal iti ministeriotayo ti Pagarian.