Dayawenyo iti Nagan ti Dios a Naan-anay
1 Anian a rag-otayo kadagiti adu a bendision ni Jehova! Naaddaantayo kadagiti baro a peak wenno kangatuan iti agibumbunannag ken panagadal ti Biblia. Adda met nawadwad a bilang ti timmabuno iti Memorial a 332,830. Nagunggonaantayo amin manipud iti nabuslon a naespirituan a taraon kadagiti asamblea ti sirkito ken iti programa dagiti espesial nga aldaw ti asamblea.
2 Kasanotayo a maipakita ti panangipateg kadagitoy a bendision? Babaen ti panangidayaw iti nagan ti Dios a naan-anay!—Sal. 145:21.
AGTULTULOYKAYO A MANGIDAYAW ITI NAGAN TI DIOS
3 Maidayawtayo iti nagan ni Jehova a naan-anay babaen ti panangitukon iti Saludsod Dagiti Agtutubo a libro kadagiti tattao. Ti Topiko a Pagsasaritaan a “Ti Sungbat Dagiti Problema iti Agtutubo” isut’ maitutop nga agpadpada kadagiti nagannak ken annak. No makisaokayo iti nagannak, mabalin a kayatyo a mailawlawag nga ar-aramidenyo ti maysa a publiko a serbisio a tumulong iti tattao a mangsaranget kadagiti inaldaw a problema. Maitudo ti maysa a praktikal a balakad manipud iti libro.
4 No makisaokayo iti agtutubo, masapul a nainggayyeman ken tratuenyo ida a sitatakneng. Kalpasan iti introduksionyo, mabalinyo a pagsaritaan maipapan ti parikut kadagiti kapatadanda ken maisaludsodyo, ‘Ammom kadi no kasanom a masaranget iti parikut kadagiti kapatadam?’ Kalpasan ti sungbatna, luktam daytoy libro iti kapitulo 9, a nalabit basaem iti parapo idiay panid 77. Iti konklusion mabalin a kunaem, ‘Daytoy a libro ti mangipakita kenka no kasano a ti Biblia ket makatulong iti agtutubo a mangsaranget kadagiti narikut a situasion, a kas kadagiti nailanad a linaonna.’
AGSAGANAKAYO A NAIMBAG
5 Nasken iti panagsagana no kayattayo ti agbalin a nalaing a mangisuro iti sabsabali. Apay a dikay agsagana a kadua dagiti dadduma a miembro ti pamilia wenno kadagiti sabsabali iti grupoyo ti panagadal? Babaen ti panaginsayo iti presentasionyo, mariknayo ti lalo a panagtalek no ania iti sawen kadagiti tattao idiay teritoriayo.
6 Dagiti panangiparangtayo isudat’ mangisarming iti interestayo kadagiti tattao. No ti bumalay ket awatenna ti libro, mabalin a maidemostrayo kenkuana no kasano a mausar a kas katulongan iti panagadal ti Biblia ket maiyurnos iti panagsarungkar kenkuana. Kalpasan ti adu a diskusion, mabalin a maiyammo iti sabali a publikasion a pagadalan. Bayat nga aramidentayo daytoy a sireregta, matulongantayo dagiti sabsabali a makaadal no kasano ti panagdayaw iti nagan ni Jehova a naan-anay.