Naimpusuankayo Koma iti Tay-ak ti Ministerio
Paset 2: Panangpatanor iti Kinarayray
1 Nalaklaka ti agbalin a narayray iti aniaman a trabaho no pagragsakan nga aramiden dayta. Pudno met iti maysa a tao a pagragsakanna daydiay banag nga isut’ nakaisaganaanna. Lalo pay a pudno dayta iti naan-anay a panangibanag iti ministeriotayo.—2 Tim. 4:5.
NASKEN TI PANAGSAGANA
2 Ti kinarayraytayo isut’ direkta a naisinggalut no kasano iti kawadwad ti panagsaganatayo. Kas ehemplo, no masabettayo ti maysa a Muslim iti serbisio, ania ti masaotayo? Ti maysa a nakasagana a naimbag nga agibumbunannag mabalinna a kunaen: “Makapainteres dayta. Saan pay unay nga adu ti nakasaok a Muslim. Ngem adda nabasak maipapan ti sursuroyo iti daytoy a libro. [Maiturong iti panid 23 idiay Panakirinnason a libro.] Kunaenna ditoy a patienyo ni Jesus a kas mammadto ngem ni Muhamad isut’ kangrunaan a propetayo. Saan kadi a kasta? [Palubosan a sumungbat.] Patienyo met kadi ni Moises a kas pudno a mammadto? Mabalinko kadi nga ipakita manipud Nasantuan a Kasuratan no ania ti naadal ni Moises maipapan iti personal a nagan ti Dios?” Mabalin a basaen iti Exodo 6:3, iti kasta nairubbuaten ti nasayaat a saritaan.
3 Narigat kadagiti adu kadatayo ti makalagip iti numero dagiti panid. Ngem babaen iti bassit a panagsagana ken panagsanay, mabalintayo nga usaren iti benneg a maawagan ti “Panggupedda iti Panagsasarita” idiay Panakirinnason a libro.
4 Ti Panakirinnason a libro isut’ addaan met iti nasayaat a benneg dagiti introduksion. Apay a dikay aramaten dagitoy? Mabalin nga ibagay dagiti panangiparangtayo iti situasion. Iti ngudo dagiti adu a suheto idiay Panakirinnason a libro, adda paset nga “No Adda Agkuna,” a naited dagiti sungbat ti kada masinnunuo a saludsod wenno pangontra iti dayta a tema. Ngem daytoy a material ket napateg laeng no usaren iti panagsaganatayo.
NO KASANO TI PANAGSAGANA
5 Nasiputkayo koma kabayatan dagiti demostrasion iti Gimong ti Serbisio, nga adda kadakayo dagiti publikasion a maidemostra. Iti daytoy a wagas, naan-anaykayo a magunggonaan manipud iti panagsagana dagiti dadduma.
6 Itiempoyo ti panagsagana a maipaay iti serbisio. Siguruenyo nga adda literatura a kasapulanyo. Ikagumaanyo a kitaen iti sumagmamano a minutos daydiay Topiko a Pagsasaritaan. Repasuenyo dagiti kasuratan ken sitarenyo dagiti mapagsaritaan a puntos iti literatura a maitukon. Ti panangaramid iti daytoy a sangsangkatunos a kas maysa a pamilia ket makatulong.
7 Addaankayo koma iti sesion ti panaginsayo. Maaramidyo daytoy kalpasan iti panagadal ti libro, kadagiti sosial a taripnong, ken kadagiti nagbaetan iti ruruangan. Ti pannangted iti presentasion ken panangipakita no kasano a masango dagiti pangontra isut’ mangpatadem iti laingtayo.
8 Ti nasaridat a panagsagana isut’ mamatanor iti ragsaktayo nga agbalin a nasigo a trabahador ken agapittayo iti rag-o a buyogen iti pannakapnek.—Juan 2:17.