Sarunuen ti Interes nga Awanan Taktak
1 “Dika itantan agingga iti bigat ti maaramidmo ita nga aldaw.” Adu ti makaammo iti dayta a pagsasao a mangparegta ti panangaramid a madagdagus kadagiti nasken a bambanag. Agaplikar dayta a prinsipio iti ministeriotayo kas ipakita ti sumaruno a kapadasan.
2 Maysa a kabsat a babai iti nakapaima ti libro iti maysa a lalaki ket inkarina a subliananna. Kalpasan ti maysa nga oras adda sabali a kabsat a babai a sibibiddut a simmarungkar iti isu met laeng a balay. Simmabat ti lalaki iti ruangan a ti libro ket adda iti imana ket kinunana: “Idi nasaom nga agsublika, diak pagarupen a kasta ti kabiitna, ngem sumrekka, nakasaganaak a makiadal.”
3 Bayat a ti kasta a nadaras a pannakasarungkar ket karkarna, daytoy a kapadasan isut’ mangipasimudaag iti panagalisto a mangsaruno ti interes nga awanan taktak. Bayat ti Abril itukontayo iti suskripsion a Pagwanawanan, nga isut’ tumulong kadagiti tattao a nasapa a mangammo iti paspasamak ti lubong a kaitungpalan iti padto ti Biblia.
4 Kasapulan ti Tattao iti Kanayonan a Tulong: Tapno matulongan dagiti tattao a mangawat iti daytoy a nasken nga impormasion ken patgenda daydiay mangapektar ti biag ken masanguananda, kasapulan nga iyurnos iti panagsarungkar, a no mabalin ket sumagmamano laeng nga aldaw manipud idi damo nga ipapan.
5 Palanasenyo ti Dalan a Sumarungkar: Saan a kanayon a nalaka ti makitulag a maipaay iti maysa a tiempo, ken masansan a ti bumalay ket saanna a malagip iti tulagan. Nupay kasta, no naannad nga inotaryo ti tiempo a sumarungkar ken siguruenyo iti mapan—las-ud ti sumagmamano nga aldaw no mabalin—iti kasta matungpalyo ti serioso a responsabilidadyo iti dayta a saritaan. No ti tao ket saanyo a madanon iti balay, itultuloyyo nga ikagumaan a madanon. Mabalin a maparegta iti serioso a panagsarungkar no makitana iti reggetyo a mangdanon kenkuana.
6 Idinto ta ditay maan-anay a masiguro ti naipakita nga interes iti biang ti maysa a tao a nakasao idi damo, inotaryo a sarungkaran nupay agminar a bassit laeng iti interesna. Nalabit a natukayyo ti interesna iti Pagwanawanan, ket inton sarungkaran mabalin a masdaawkayo ti nasayaat a panagimdengna. Gapuna a siguruenyo a sarunuen ti interes nga awanan taktak.