Saludsod

◼ Masapul kadi ti kongregasion iti mangidulin ti file iti Ti Ministeriotayo iti Pagarian?

Iti daydi Mayo 1972 a ruar iti Ti Ministeriotayo iti Pagarian, naitudo sadiay a maiparbeng unay ti mangidulin idiay libraria ti Kingdom Hall iti file ti binulan nga edision iti Ti Ministeriotayo iti Pagarian a nairanta a pagreperensiaan. Agtultuloy a maitutop ti panangsalimetmet iti file iti kada libraria ti Kingdom Hall tapno adda usaren dagiti panglakayen ken agibumbunannag.

No adda dayta a file, mabalin nga agreperensia dagiti agibumbunannag kadagiti naglabas a material nga adda kaimudinganda iti panangiparang idiay tay-ak ti serbisio, panangidaulo iti panagadal ti Biblia, panagsarungkar, ken dadduma pay. Dagiti nasayaat nga ideya a mausar iti ministerio ti masarakan sadiay. Sagpaminsan, dagiti agdama a ruar iti Ti Ministeriotayo iti Pagarian ti agreperensia kadagiti napalabas a naimaldit sakbay a naitimpuyog dagiti dadduma a kakabsat iti kongregasion. Dagiti agdadamo a naitimpuyog ti magunggonaan iti daytoy a maidulin a file. Maysa kadagiti baro a nadisenio a Watchtower file cases ti mabalin a mausar a pagipempenan kadagiti naglabas a kopia iti Ti Ministeriotayo iti Pagarian idiay Kingdom Hall.

Dutokan dagiti panglakayen ti manangaywan iti Teokratiko a Pagadalan ti Ministerio wenno maysa a makabael a ministerial nga adipen a mangsiguro a daytoy a file ti maidulin a nasapa iti binulanbulan. Bayat a ti naidatag nga impormasion iti Ti Ministeriotayo iti Pagarian ket iti porma a singasing a saan ket a nainget a pagalagadan, kaskasdi a nagsayaat a taudan iti material a reperensia a masapul a maadda iti kada libraria ti Kingdom Hall iti kongregasion. Nupay kasta, dagiti nalikudan a ruar iti Ti Ministeriotayo iti Pagarian ti saan a mapedido manipud sanga nga opisina.