Panangadal iti Ti Katan-okan a Tao a Nagbiag Pay Laeng
1 Bayat ti lawas iti Pebrero 8-14, rugiantayon nga adalen daytoy Ti Katan-okan a Tao a Nagbiag Pay Laeng iti Panagadal ti Libro iti Kongregasion. Anian a rag-o a marepaso iti biag ken ministerio ni Jesu-Kristo! Idinto ta daytoy a libro ket nadisenio a naigiddiat iti dadduma a libro a naadaltayon, dagiti sumagmamano a giya ti makatulong.
2 Daytoy a libro ket awanan iti numero dagiti panid, gapuna a ti iskediol a nailanad iti Ti Ministeriotayo iti Pagarian a mangrugi inton sumaruno a bulan ket nailista dagiti kapitulo a maadal, a masansan a tallo wenno uppat ti kada lawas. Dagiti Kapitulo 35, 111, ken 116 ti atiddogda ket masapul a mabingay iti mamindua a panagadal ti kada maysa. Kalpasan a mapabasa babaen ti makabael a kabsat a lalaki iti intero a kapitulo (wenno intero a subtitulo, kas iti kapitulo 35, 111, ken 116), ti konduktor iti panagadal isut’ mangipaay kadagiti saludsod idiay ngudo ti kapitulo a maibatog iti kapitulo wenno benneg a kabasbasa. Dagiti sungbat ti saan a kanayon a masurot a naprogreso iti kapitulo. Ti ababa ken natadem a komento isudat’ masapul a naibatay iti material ti leksion.
3 Kalpasan dayta, kas ipalubos ti tiempo, amin a naisitar a kasuratan idiay ngudo ti kapitulo ket masapul a basaen. Dagiti atiddog a sitasion dagiti kasuratan ti mabalin a mabingay iti abbaba a paset tapno mapalubosan dagiti nagduduma nga agibumbunannag a makiraman nga agbasa, kalpasanna maited ti komento iti daydiay nabasa. Dagiti napunto a saludsod nga insagana ti konduktor isudat’ tumulong a mangawis iti nabagas a komento a mangipakita no kasano a dagiti kasuratan a nabasa ket naisinggalut iti nailawlawag idiay libro. Amin a saludsod ken komento ket tumulong koma kadagiti tumabuno a mangipamaysa ti asikasoda ken Jesu-Kristo, ti kurso iti biagna, ken ti sursurona.
4 Ti Katan-okan a Tao a libro ket ibinsabinsana iti kabibiag ni Jesus babaen ti kronolohikal a panagsasaganad. Ti panangsirmata kadagiti pasamak ken ipamaysa iti panunot idiay nakapasamakanda isut’ pudno a makatulong a saanda a malipatan. Gapuna, siguruenyo nga usigen dagiti ilustrasion ken kanayon nga agreperensiakayo idiay mapa nga agparang iti pangrugian ti libro, a sumaruno iti introduksion.
5 Ti introduksion daytoy a libro isut’ mausig iti umuna a lawas. Kalpasan a mabasa dagiti amin a parapo idiay baba iti subtema, isaludsod ti konduktor dagiti tumutop a saludsod a naisaganana. Daytoy a pangrugian a panangusig isut’ mangisagana kadagiti amin a maipaay iti panagadal bayat ti umay a tawen. Ti gerger iti balligi a mangwanas ti material isut’ agpannuray iti kawadwad ti panagsagana dagiti amin a tumabuno. Nangnangruna koma a nakasagana ti konduktor iti kada lawas tapno matulonganna ti grupo a mangkabisado iti katan-okan a tao a nagbiag pay laeng, ti Apo ken Manangisalakantayo, a Jesu-Kristo.