Siasino Ita Dagiti Mangar-aramid iti Pagayatan ni Jehova?
1. Kaano a rugiantayo nga adalen ti Siasino Ita Dagiti Mangar-aramid iti Pagayatan ni Jehova? Ania dagiti magunggonatayo iti dayta?
1 Mangrugi iti lawas ti Oktubre 28, maadal ti Siasino Ita Dagiti Mangar-aramid iti Pagayatan ni Jehova? iti Panagadal ti Kongregasion iti Biblia. Nadisenio dayta a baro a broshur a nairuar iti “Saluadam ta Pusom!” a Kombension Distrito tapno dagiti mayad-adalan iti Biblia ket maiturongda iti organisasion. Babaen ti panangadal iti dayta a publikasion, ad-adda a maipategtayo ti panagbalintayo a paset ti organisasion ni Jehova ken tulongannatayo nga agbalin a mas pamiliar iti daytoy napateg a katulongan iti ministerio.—Sal. 48:13.
2. Kasano a maadal ti broshur iti kongregasion?
2 No Kasano nga Adalen: Masapul a bingaybingayen ti konduktor ti orasna tapno agpapada ti pannakawanas ti tunggal leksion. Irugina ti tunggal maysa kadagiti 28 a leksion babaen ti panangbasana iti saludsod a pannakapaulo dayta. Kalpasanna, ipabasana ti umuna a parapo iti parabasa sana isaludsod iti tallaong ti insaganana a saludsod para iti dayta. Sumaruno, ti tunggal seksion a mangrugi kadagiti napuskol a letra ket masapul a mabasa ken mapagsasaritaan a saggaysa. Kalpasan a mabasa ti seksion, pagkomentuen ti konduktor ti tallaong no kasano a sungbatan dayta ti saludsod a pannakapaulo ti leksion. Adu met ti ladawan daytoy a broshur a mabalin a komentuan. No ipalubos ti oras, masapul nga ipabasa dagiti kangrunaan a teksto. Sakbay nga umakar iti sumaganad a leksion, isaludsod ti konduktor dagiti saludsod iti baba ti panid kas pangrepaso. No adda kahon nga “Ammuem ti Ad-adu Pay,” ipabasana dayta iti parabasa, sana pagkomentuen ti tallaong no kasano a magunggonaan ti mayad-adalan iti Biblia iti panangsurotna kadagiti singasing. No adda pay oras iti ngudo ti panagadal, mabalinna nga usaren dagiti paulo dagiti leksion kas pangrepaso a salsaludsod. Laglagipentayo a saanna a kaipapanan a kastoy a pamay-an ti mausar iti panangyadal iti Biblia.
3. Kasanotayo a naan-anay a magunggonaan iti panangadal iti daytoy a broshur?
3 Tapno naan-anay a magunggonaan, agsaganakayo a naimbag sakbay a makigimong. Ikagumaanyo ti agkomento. Bayat ti panagadal, panunotenyo no apay a makatulong ti impormasion kadagiti mayad-adalan iti Biblia. Sapay koma ta ti panangadaltayo iti daytoy baro a broshur ti tumulong kadatayo a mangiturong kadagiti dadduma a mangaramid iti pagayatan ti Dios tapno maaddaanda met iti namnama nga agbiag nga agnanayon.—1 Juan 2:17.