Ti Nadiosan a Sursuro Mangyeg iti Nabileg nga Impluensia
1 Anian a pribilehiotayo ti umawat iti pannursuro manipud ti Maysa a Nadiosan, ti Namarsuatayo, ni Jehova a Dios! (Sal. 50:1; Isa. 30:20b) Manipud kadagiti amin a nasion ita, rineprep dagiti agayus nga agturong iti bantayna ti nadalus a panagdayaw tapno maisuroda babaen kenkuana. (Mik. 4:2) Minilion a sabsabali ti nagpalista iti pagadalan a mangitandudo ti nailubongan a sirib. Ngem ti sirib a di mangikankano ken Jehova ken ti naisurat a Saona ket kinamaag iti imatang ti Dios.—Sal. 14:1; 1 Cor. 1:25.
2 Epektona iti Kristiano a Panagbiag: Ti nadiosan a sursuro tumulong a mangsukog iti konsiensiatayo. Tunggal maysa ti naipasngay nga addaan konsiensia, ngem tapno maigiyanatayo daytoy iti dana ti kinalinteg, masapul a masanay. (Sal. 19:7, 8; Roma 2:15) Dagiti tattao ditoy lubong saanda a sinukog dagiti panunotda a maitunos iti Sao ti Dios, ket dayta ti rason a natikawda ken saanda a masigurado no ania ti umiso ken di umiso. Agsusuppiatda maipapan kadagiti moral nga isyu gapu ta tunggal maysa ipilitna nga aramiden no ania ti nalinteg iti bukodna a mata. Kayat ti kaaduan iti naan-anay a wayawaya a mangeddeng ti bukodda a kurso iti biag. Agkedkedda a mangipangag iti kakaisuna a gubuayan ti pudno a sirib. (Sal. 111:10; Jer. 8:9; Dan. 2:21) Ngem ti nadiosan a sursuro ket sinolbarna kadatayo iti kada isyu, ket nagtalinaedtayo a nagkaykaysa kas sangakabbalayan ti Dios agsipud ta sinuruannatayo. Sitatalektayo a sumango iti masanguanan a buyogen ti naimbag a konsiensia, a sikukupado iti ministeriotayo.
3 Ti nadiosan a sursuro isut’ tumulong kadatayo a mangsaranget iti “tunggal angin ti sursuro.” (Efe. 4:14) Saantayo a magustuan ti panangadal iti pilosopia, a mangaramid ti tao a nadillaw ken managduadua, a mamaregta ti panagtalek iti bagi, ken mangiturong iti pannakaduprak ti moral. Ragsakentayo ti maisuro ken Jehova, iti kasta maliklikan ti leddaang ken sakit ti puso a nakaisagmakan dagiti adu. Dagiti linteg ken palagip ni Jehova ket umaspingda ti ‘maysa a sao iti likudantayo,’ a nagkuna: “Isu daytoy ti dalan. Magnakayo kenkuana, dakayo a tattao.”—Isa. 30:21.
4 Dagiti Gimong ken Ministeriotayo: Matmatantayo ti Hebreo 10:23-25 a kas bilin a nagtaud iti Dios. Kadagiti gimong ti kongregasion, maisurotayo babaen ken Jehova. Kustomretayon ti kanayon a presente kadagiti gimong, wenno matmatantayo kadi ti itatabuno iti gimong a bassit laeng iti pategna? Laglagipenyo, ti panaggigimong ket paset iti panagdayawtayo. Saan koma nga ibilang a saan nga inkapilitan. Ditay kayat a masaaw iti aniaman a paset ti espiritual a programa iti panangpakan nga insagana ni Jehova kadatayo.
5 Inkararag ni Moises iti Dios: “Ipakitam kadakami no kasano ti panangbilang kadagiti aldawmi iti wagas a mabalinmi a maiserrek iti puso ti kinasirib.” (Sal. 90:12) Isu kadi daytoy ti kararagtayo met? Patgentayo aya ti kada napateg nga aldaw? No aramidentayo a kasta, “maiserrek iti puso ti kinasirib” babaen ti panangusar iti kada aldaw iti napateg a wagas, a pakaidayawan ti Naindaklan nga Instruktortayo, ni Jehova a Dios. Ti nadiosan a sursuro ti tumulong kadatayo a mangaramid iti dayta.