Ti Libro a Mangipaay iti Pudno a Panangidalan
1 Adda dramatiko a panagbaliw daytoy lubong iti daytoy a siglo. Nupay adda panagabante iti komunikasion, medisina, ken transportasion, ti kalidad iti biag ti pamilia isut’ nagbahada. Minilion ti nagpaidalan iti agbaliwbaliw a pilosopia dagiti tattao.
2 Iti daytoy agbaliwbaliw a lubong, dagiti tattao ni Jehova ti nagunggonaan a naimbag babaen iti panangalagadda ti Saona. Saan a nagbaliw ti Biblia iti rinibo a tawtawen, ket ti balakadna isu pay laeng iti kapraktikalan a pangparukma kadagiti problema a sangsanguentayo ita. Kasanotayo a matulongan iti dadduma a mangipateg ti maipaay daytoy a pudno a panangidalan iti moderno nga aldawtayo?
3 No nakaibatikayo iti tract nga “No Apay a Mapagtalkanyo ti Biblia” iti umuna a sarungkar, mabalinyo a kunaen no agsarungkarkayo:
◼ “Idinto ta kunaen ti Biblia a daytoy ket mensahe a naggapu iti Dios ken itukonna ti agnanayon a biag no agbiagtayo a maitunos kenkuana, mariknayo kadi a maiparbeng nga ammuen ti ad-adu pay maipapan iti dayta? [Palubosan a sumungbat.] Siputanyo no ania iti impadto ti Biblia maipapan iti daytoy a lubong. [Basaen ti 2 Timoteo 3:1-5 a diretso manipud iti panid 5 ti tract.] Patienyo kadi nga apag-isu daytoy iti agdama a lubong? [Palubosan nga agkomento.] Adda aya natalged a rason a mangnamnama iti nasaysayaat a kasasaad ti masanguanan?” Kalpasanna mabalin a malawagan iti dua a maudi a parapo ti tract wenno iti panid 161 ti libro a Ti Biblia—Saot’ Dios wenno iti Tao?, a mangibinsabinsa iti namnama nga itukon ti Biblia iti sangatauan.
4 No ti bumalay ket interesado iti praktikal a pateg ti Biblia ken naitudoyo dagiti ehemplo idiay kapitulo 12 iti “Ti Biblia—Saot’ Dios wenno iti Tao?,” mabalinyo a kunaen:
◼ “Interesadotayo kadagiti bambanag a praktikal kadagitoy nga aldaw, saan kadi? Umanamongkayo aya a ti panamagpatingga iti gubat ket praktikal? [Palubosan nga agkomento.] No maadal dagiti tattao ti agbiag a sangsangkamaysa iti talna, maysa daytoy a nasayaat a panangrugi, saan aya? [Palubosan a sumungbat.] Apag-isu iti panangipadto ti Biblia iti dayta. [Basaen ti Isaias 2:2, 3.] Napanunotyo kadin no kasano a matungpal daytoy?” Mailawlawag a kayatyo a mausig daytoy a saludsod iti sumaruno a sarungkaryo.
5 No nakaibatikayo iti “New World Translation,” mabalinyo a kunaen:
◼ “Iti panangbasam ti Biblia a naibatik kenka, nalabit a nadlawmo a nausar iti intero a pasetna ti personal a nagan iti Dios. Nasken daytoy a panagrang-ay kadagiti adu a patarus ti Biblia. Nupay agkedked dagiti dadduma a tattao a mangusar iti nagan a Jehova, laglagipentayo nga impalgakna ti naganna iti nabayagen a tiempo ken pinaregtana dagiti adipenna a mangusar iti dayta tapno mailasin nga isu ti pudno a sibibiag a Dios. Timudenyo no aniat’ insurat iti salmista ditoy Salmo 83:18.” Basaen ti kasuratan, ken palubosan iti bumalay nga agkomento. Maitunos iti interes a maiparang, mabalin a mausar ti kanayonan a pakaammo a masarakan iti paulo a “Jehova,” manipud panid 177 ti Panakirinnason a libro.
6 Ti laeng Biblia iti makaipaay ti panangiwardas a kasapulan iti tao. (Jer. 10:23) Gapuna, ganetgetantayo nga awisen dagiti sabsabali a magunggonaan manipud iti masirib a balakad ken praktikal a pammagbagana.