Ipariknayo Kadakuada a Maawatda iti Memorial
1 Iti napalabas a sumagmamano a tawen, 1 laeng manipud 3 a katao a timmabuno iti Memorial ti agibumbunannag iti naimbag a damag. Nalabit a kasta manen iti daytoy a tawen. Addada tumabuno babaen ti imbitasion ti maysa a kabagian wenno gayyem, bayat a dagiti dadduma ti maawis babaen dagiti lokal nga agibumbunannag. Addada pay tumabuno, a nupay bautisadodan, ngem saandan nga aktibo iti ministerio. Sipupudno ti panangawattayo kadagiti amin a mangraem iti bilin ni Jesus: “Itultuloyyo nga aramiden daytoy kas panglaglagip kaniak.”—1 Cor. 11:24; Roma 15:7.
2 Dagiti nadutokan nga attendant ti alisto koma a mangawat iti tunggal maysa a sumangpet iti Kingdom Hall. Nupay kasta, amintayo ti sumurot iti kurso ti kinamanagpadagus iti Memorial. (Roma 12:13) Kasanotayo a maaramid daytoy?
3 Iti dayta a rabii dadduma kadagiti agibumbunannag ti kupado a mangipaay iti pagluganan dagiti interesado a tattao. Nalabit a nasapa a makasangpet dagiti dadduma tapno makablaawanda dagiti bisita nga agwaywayas nga umay. No ti maysa a sangaili ket sumrek iti pagtaripnongan, makablaawan koma a sibabara. Saludsodan no adda am-ammona kadagiti kakabsat. No adda, isut’ maaywanan agingga a sumangpet dagiti am-ammona. (Maidilig iti Lucas 10:35.) No awan ti am-ammona, apay a dikay awisen a makikatugaw kadakayo? Ilawlawagyo no kasano a mausar iti arak ken tinapay. Nalabit a matulongan a kumita kadagiti Kasuratan a makotar ti pumapalawag.
4 Idiay ngudo ti rambak ti Memorial, ibaga kenkuana a maragsakantayo iti iyaayna. Nalabit nga adda saludsodna maipapan ti trabahotayo a mabalinyo a sungbatan. Ti personal nga interesyo kenkuana ti mangiturong iti diskusion iti topiko ti Biblia. Dadduma kadagiti nasayaat a panagadal ti nairugi babaen iti kinaridam ti kakabsat a mangaramid iti daytoy. Sakbay nga agpakada iti Kingdom Hall, iyam-ammoyo kadagiti dadduma, ken ipaayanyo ti imbitasion nga agsubli.
5 Anian a ragsaktayo a mangawat kadagiti patgen a kakabsattayo a saanda unayen a regular a tumabtabuno ken saan nga aktibo iti ministerio! Imbes a saludsoden no apay a saandan a tumabtabuno iti gimong, iyebkas laeng kadakuada iti rag-o ti kaaddada. Nalabit nga adda banag a mangngegda bayat iti diskurso ti Memorial a mangtignay kadakuada a mangipateg manen iti dedikado a relasionda ken Jehova. Ti nabara a panangabrasa nga ipaay ken ti pannakaseknan nga ipakitatayo ti mabalin a mangsagid iti puspusoda. Ibagayo kadakuada a maragsakankayo manen a kumita kadakuada.—Roma 1:11, 12.
6 Maysa nga espesial a palawag ti maited iti Abril 10 a napauluan ti “Ti Pudno a Relihion Maipaayna Dagiti Kasapulan ti Natauan a Sosiedad.” Siguruenyo nga amin dagiti timmabuno iti rambak ti Memorial ket maawisda. Namnamaentayo a dagidiay tumabuno kadagitoy a taripnong ti makarikna a maawatda ken mapasaranda ti nabara nga espiritu ti panagkakadua iti sidong dagiti tattao ni Jehova.—Sal. 133:1.