Panangipakita ti Personal nga Interes iti Sabsabali
1 Nabatad unay ti interes ni Jehova iti sabsabali. Saan kadi a sibubuslon iti impaayna kadagiti parsuana? (Gen. 1:29, 30; 2:16, 17; Mat. 5:45; maidilig iti Lucas 6:35.) Kaimportantian, saanna aya nga impakita iti personal nga interesna kadatayo babaen ti panangipaayna iti pakasalbarantayo manipud iti basol ken ipapatay?—Juan 3:16.
2 Tinulad ni Jesus iti perpekto nga ehemplo ni Amana a nangipakita iti personal nga interes iti dadduma. (Mat. 11:28-30; 1 Ped. 2:21) Idi kinuna ti maysa nga agkukutel ken Jesus: “Apo, no pagayatam koma, mabalinnak a dalusan,” ni Jesus simmungbat, “Kayatko a madalusanka,” ket pinaimbagna. (Mat. 8:2, 3) Insublina met ti biag iti maysa nga agtutubo idiay asideg ti Nain gapu iti asina ken nanangna a maysa a balo. (Luc. 7:11-15) Uray pay dagiti babassit nga ubbing ket matmatanna a maikarida iti tiempo ken asikasona, ket saan unay a kupado tapno liwliwaen ken pabilgenna dagiti dadduma.—Mat. 20:31-34; Mar. 10:13-16.
PAMILIA KEN GAGAYYEM
3 Ikagumaantayo ti agbalin a kas ken Jehova ken ni Jesu-Kristo babaen iti panangipamuspusan a maipakita ti interes iti sabsabali. Usigentayo dagiti sumagmamano nga oportunidad a maaramid dayta.
4 Maysa kadagiti kadakkelan a kasapulan dagiti kakabsat isut’ panangipakita ti napudno nga interes iti bukodda a miembro ti pamilia ken saanda a liwayan iti espiritualidadda. Ramanenna daytoy ti regular a panagadal iti sangapamiliaan. Iti panagadalyo ti pamilia, ar-aramidenyo kadi iti material a praktikal ken makapainteres? Regular aya ti panagkukuyogyo idiay tay-ak iti serbisio a kadua iti kada miembro ti pamilia? Pabpabilgenyo kadi dagiti annakyo nga agtarigagay a tumulong iti sabali a tattao?
5 Iti daytoy kupado a panagbiagtayo, malipatantayo aya nga ipakita iti personal nga interes iti kada miembro ti kongregasion nga addaan iti nagpaiduma a kasapulan? (Prov. 3:27; Gal. 6:10) Iti kongregasion addada dagiti ulila iti amma ken inna, lallakay ken babbaket, balbalo, dagiti baldado, ken madukdukotan. Ditay koma liwayan nga ipakita iti personal nga interes kadagiti amin a kakabsattayo.—1 Cor. 10:24; Fil. 2:4; Heb. 13:16.
MARAKARNERO IDIAY TAY-AK
6 Kasanotayo nga ipakita iti personal nga interes kadagiti tattao a maad-adalan ti Biblia? Nupay kupadotayo, ipakpakita aya iti interes kadakuada ken iparikna a maawatda a kas baro a gagayyemtayo? Maysatayo kadi a gubbuayan iti pammaregta kadakuada nupay saan a datayo ti mangad-adal kadakuada?—Maidilig iti Marcos 10:28-30.
7 Mabalinyo kadi ti maaddaan iti dakdakkel a bingay a mangipakita iti napudno nga interes kadagiti tattao a dumngeg iti naimbag a damag? Dakayo a mismo, ania ti maaramidyo a dakdakkel a pannakiraman iti tay-ak ti ministerio? Dikay koma ikedked dayta no addakayo iti posision a mas nawadwad ti maaramidyo.—Luc. 9:60-62.
8 Tuladentayo ni Jehova ken ni Jesus a mangipakita iti interes kadagiti dadduma. Wen, kanayontayo nga ipamuspusan a maipakita iti personal a pannakaseknan kadakuada.