“Tulong iti Umiso a Tiempo”
1 Anian a makaliwliwa ti makaawat iti tulong no kasapulantay dayta! (Heb. 4:16) Iti “Dagiti Mensahero ti Nadiosan a Talna” a Kombension Distrito, nagrag-otayo idi naipaayantayo iti dua a naisangsangayan a makatulong a probision iti umiso a tiempo.
2 Dimteng iti maitutop a tiempo ti baro a libro a Ti Sekreto ti Kinaragsak iti Pamilia. Ipamaysana ti atension iti uppat a nasken a banag a mangparagsak iti pamilia: (1) Panagteppel, (2) panangbigbig iti kinaulo, (3) nasayaat a komunikasion, ken (4) ayat. Ti pammagbaga a naidatag iti libro a Kinaragsak iti Pamilia tulonganna dagiti amin a pamilia a mangyaplikar iti dayta a mangsagrap iti nadiosan a talna. Iwayaanyo a basaen a naimbag ti baro a libro ken adalenyo a sangapamiliaan. Ammuenyo a nalaing dagiti linaonna tapno nakasaganakayto a mangusar iti dayta a sieepektibo iti damo a pannakaitukonna iti publiko, iti Marso.
3 Ti baro a broshur nga Ania ti Kalikaguman ti Dios Kadatayo?, dimteng iti umiso a tiempo a tumulong a mangpapardas iti trabahotayo a panangaramid kadagiti adalan. Nupay mabalin a mausar a nangnangruna a tumulong kadagiti tattao a saan unay a makabasa, adu a nataengan ken ubbing a makabasa ti mabenepisiaran met iti simple a panangilawlawagna kadagiti pagdadamuan a sursuro ti Biblia. Mabalin a dayta laeng ti kasapulan tapno mairugi ti panagadal nga agturong iti libro a Pannakaammo. Sigurado nga adu pay ti matulongan daytoy a probision a mangapresiar no kasano a sibabaknang a maparaburanda babaen ti panangaramid iti kalikaguman ti Dios.
4 Kasano ti panagriknatayo iti naayat a “tulong [ni Jehova] iti umiso a tiempo”? Inyebkas a naan-anay ni David ti kaririknatayo idi kinunana nga ‘awan ti pagkuranganna, napabaro ti kararuana, ken agliplippias ti malukongna!’ (Sal. 23:1, 3, 5) Sirarag-o a padaanantay nga iburay daytoy nagsayaat a naespirituan a tulong kadagiti adu a sabsabali pay a sipapasnek nga agtarigagay a mangammo ken agserbi iti pudno a Dios a ni Jehova.