Gimong ti Serbisio iti Hunio
Lawas ti Hunio 2-8
8 min: Dagiti lokal a pakaammo. Dagiti napili a Pakaammo iti Ministeriotayo iti Pagarian.
15 min: “Aramidenyo ti Amin a Kabaelanyo.” Saludsod ken sungbat.—Kitaenyo met ti Abril 15, 1993 a Pagwanawanan, panid 28-30.
22 min: “Ti Pannakaammo Manipud iti Dios Sungbatanna ti Adu a Saludsod.” Isalaysay ti tserman ti artikulo a kaduana ti dua wenno tallo nga agibumbunannag, a pakairamanan ti maysa nga agtutubo. Makomentuan ti parapo 1, nga ipaganetget no apay nga epektibo unay ti libro a Pannakaammo a tumulong kadatayo a mangsungbat kadagiti saludsod. Mangidemostra iti practice session, sa mangisingasing kadagiti pangparang-ayan kalpasan ti kada presentasion.
Kanta 200 ken pangserra a kararag.
Lawas ti Hunio 9-15
10 min: Dagiti lokal a pakaammo. Report ti kuenta.
20 min: Panangasaba Babaen ti Nasayaat a Kondukta Idiay Eskuelaan. Makisarita ti panglakayen iti dua wenno tallo nga agtutubo nga ageskuela iti panangrugi ti klase iti daytoy a bulan. Ipaganetget a nasken a mapagulidananda koma iti konduktada. Irepaso iti grupo dagiti maitutop a punto manipud iti broshur nga Edukasion, nangruna iti paset a “Dagiti Moral a Pagalagadan a Maikari a Raemen” iti panid 19 agingga iti 25. Iturong ti naisangsangayan nga atension iti kahon iti panid 24 a napauluan “Ti Sumagmamano a Moral a Prinsipio a Sursuroten Dagiti Saksi ni Jehova.” No adda pay oras, mabalin met a madakamat dagiti punto iti Agosto 15, 1987, a Pagwanawanan, panid 10-20. Yantangay adunto dagiti mannursuro a mangbasa iti broshur ken makaammo iti rumbeng a kababalin dagiti Saksi ni Jehova, kayat dagiti Kristiano nga agtutubo ti mangipaay iti nasayaat a pammaneknek babaen ti nalinteg a konduktada.
15 min: Panangisuro Kadagiti Sabsabali—Naganat Unay. Palawag ti panglakayen. Repasuen ti 1996 a sangalubongan a report ti serbisio iti panid 33 ti 1997 Yearbook. Adu ti naibungana ti nabileg a panagregget a mangasaba iti sadinoman a pakasarakan kadagiti tattao. Naganat unayen ti panangisuro kadagiti tattao iti kinapudno. No kasaritatayo ida kadagiti publiko a lugar, sitataktika nga ammuentay ti nagan ken direksionda tapno masarungkaran ida. Saantayo a basta agmula iti bukel ti Pagarian; masapul met a sibugantayo. (1 Cor. 3:6-8) No maimula ti bukel iti nasayaat a daga, ti epektibo a panangisuro matulonganna ti maysa a tao a mangtarus iti dayta. (Mat. 13:23) Masapul a makiramantayo a naan-anay ken sisisigo aginggat’ mabalin iti trabaho a panangisuro. (Heb. 5:12a) Iraman dagiti punto iti Hunio 1996 a suplemento Ti Ministeriotayo iti Pagarian, parapo 25-6. Igunamgunam ti kalat a panangirugi iti panagadal iti broshur a Kalikaguman wenno iti libro a Pannakaammo.
Kanta 204 ken pangserra a kararag.
Lawas ti Hunio 16-22
10 min: Dagiti lokal a pakaammo.
15 min: Dagiti lokal a kasapulan.
20 min: Panangilasin iti Relihionyo kas Pudno Wenno Ulbod. Ti panglakayen idauluanna ti panagsasarita a kaduana ti dua wenno tallo a makabael nga agibumbunannag a maibasar iti Disiembre 22, 1989, nga Agriingkayo!, panid 18. Adu ti maulit-ulit a makaskasabaan a kasla napasnek. Nupay kasta, dida pay pulos nakipagadal iti Biblia. Pagsasaritaan no kasano a mausar dagiti punto iti daytoy nga artikulo ti Agriingkayo! tapno makitada ti kinapateg ti panagtignay a maitunos iti umiso a pannakaammo. Dakamatenyo dagiti panulbek a punto iti libro a Pannakaammo, kapitulo 5: “Makinpanagdayaw ti Anamongan ti Dios?” Basaen ti parapo 20. Mabalin a masarungkaran dagita a tattao tapno siaayat ken sitataktika a paregtaen ida nga agpayadal ken tumabuno kadagiti gimong.
Kanta 201 ken pangserra a kararag.
Lawas ti Hunio 23-29
10 min: Dagiti lokal a pakaammo.
15 min: Aniat’ Ibagbagada Maipapan Kadatayo? Palawag a naibatay iti impormasion a masarakan iti Watch Tower Publications Index 1986-1995, panid 341-3. Mangpili kadagiti naisangsangayan nga “Statements by Others” maipapan kadagiti Saksi ni Jehova—ti kondukta ken trabahotayo. Ipakita no kasano a nasdaaw dagiti sabsabali iti kinasayaattayo. Ilawlawag no apay a daytoy koma ti mangtignay kadatayo a kanayon a maaddaan iti nasayaat a kababalin. Ipakita no kasano nga usaren dagiti kasta a nasasayaat a komento no makisasaotayo kadagiti gagayyem ken kadagiti interesado nga agtarigagay a mangammo iti ad-adu pay maipapan kadatayo.
20 min: “Nagannak—Sanayenyo Dagiti Annakyo a Mangasaba.” Saludsod ken sungbat. Iraman ti instruksion iti libro a Ti Ministeriotayo, panid 99-100, iti sidong ti subtitulo a “Panangtulong Kadagiti Agtutubo.”
Kanta 211 ken pangserra a kararag.
Lawas ti Hunio 30–Hulio 6
10 min: Dagiti lokal a pakaammo.
20 min: “Agtutubo—Aniada Dagiti Naespirituan a Kalatyo?” Pagsaritaan ti dua nga ama daytoy nga artikulo. Usigenda no kasano a matulongan dagiti annakda a mangapresiar no apay a nasken ti panangipasdek kadagiti teokratiko a kalat, a mangyeg kadagiti naespirituan a bendision, imbes nga aginteresda kadagiti materialistiko a kalat.—Kitaenyo met ti libro a Ti Ministeriotayo, panid 116-18.
15 min: Panangisagana iti Literatura a Tukon iti Hulio. Mangpili iti maysa wenno dua a broshur a magusgustuanda iti lokal a teritoria, ket repasuen ti sumagmamano a naisangsangayan a punto maipapan iti tunggal broshur. Mangisingasing kadagiti pamay-an a mabalin a mairaman iti presentasion. Ipalagip iti amin nga irekordda dagiti maipaima, sa sublian ken sukayenda ti interes.
Kanta 109 ken pangserra a kararag.