Agtutubo—Aniada Dagiti Naespirituan a Kalatyo?
1 Ammo ni Jehova ti kinapateg ti napasnek a panagtrabaho ken dagiti maragpat a kalat iti panangyegna iti kinaragsak. (Kitaenyo ti Genesis 1:28; 2:15, 19.) Ita, impaannong ni Jehova iti ilina ti panangasaba ken panangisuro. Adda met kadatayo ti katan-okan a kalat a pananggun-od iti biag nga agnanayon iti Paraiso. Kabayatanna, masapul a mangipasdektayo kadagiti progresibo a naespirituan a kalat tapno maliklikantay ti di umiso a panangusar iti pigsa ken sanikuatayo.—1 Cor. 9:26.
2 Dagiti Realistiko a Kalat Para Kadagiti Agtutubo: Masapul nga adda teokratiko a kalat dagiti agtutubo a mabalin a ragpaten sigun iti indibidual a kabaelanda. (1 Tim. 4:15) Dadduma a nakaub-ubbing pay naragpatdan ti kalat a mangikabesa kadagiti libro ti Biblia uray pay sakbay a nasursuroda ti agbasa. Babaen ti panagadal ti pamilia, masursuro dagiti annak ti agsagana maipaay kadagiti gimong tapno maragpatda dagiti kalat nga agkomento iti nabagas ken panagpasalista iti Teokratiko nga Eskuelaan ti Panagministro. Bayat a makikuyog dagiti annak kadagiti dadakkelda iti pangasabaan, masursuroda ti mangasaba ken rumang-ayda a mangragpat iti kalat nga agbalin a di bautisado nga agibumbunannag. Iyukuok koma dagiti nagannak kadagiti ubbing pay nga annakda ti kalat a panagdedikar ken panagpabautisar.
3 No maysaka a tin-edyer, aniada dagiti naespirituan a kalatmo? “Lagipem met ti Namarsua kenka” babaen ti panangipamaysam kadagiti talaga a napapateg a kalat iti biag. (Ecl. 12:1; Sal. 71:17) Apay a dika ag-auxiliary pioneer kabayatan ti bakasion wenno iti sabsabali pay a gundaway? Pinampanunotmo kadin ti sumrek iti amin-tiempo a ministerio kas maysa a regular pioneer? Ti ngay panagsursuro iti baro a lenguahe tapno iti masanguanan makatulongkanto kadagiti tattao wenno kongregasion a mangar-aramat iti dayta a lenguahe? Adu kadagiti agserserbi itan idiay Bethel wenno kas agdaldaliasat a manangaywan wenno misionero ti namagbalin a kas kalatda ti espesial nga amin-tiempo a serbisio idi ages-eskuelada pay laeng. Apay a dika aramiden ti kasta?
4 Bayat nga ubingka pay, ikagumaam a tuladen ni Jesus. Uray idi agtawen pay laeng iti 12, situtulok a nagsao maipapan kadagiti naespirituan a banag. (Luc. 2:42-49, 52) Ti panangipasdekmo kadagiti makagunggona a kalat a panagadal a personal, panagbasa iti Biblia iti inaldaw, ken regular a pannakitimpuyog kadagiti nataengan a Kristiano kadagiti gimong ken iti serbisio pagbalinennaka a nalaing a mangisuro iti sabsabali maipapan iti Pagarian ti Dios a kas ti inaramid idi ni Jesus.