Annak—Pagrag-oandakayo!
1 Babbarito ken babbalasitang, ammoyo kadi ti bilin ni Jehova a rumbeng a mairamankayo kadagiti aktibidad ti kongregasion? (Deut. 31:12; Sal. 127:3) Pagrag-oanmi ti kaaddayo iti sibaymi bayat nga agdaydayawtayo a sangsangkamaysa ken Jehova! Maragsakankami no nakatugawkayo a siuulimek kadagiti gimong ken agim-imdengkayo a naimbag. Nangnangruna a pagragsakanmi ti panangikagumaanyo nga agkomento iti bukodyo a sasao. Maragsakan ti intero a kongregasion no iparangyo dagiti pasetyo iti Teokratiko nga Eskuelaan ti Panagministro, no sigagagarkayo a makikadua kadakami iti tay-ak ti serbisio, ken no madamagmi a naturedkayo a mangasaba kadagiti kaeskuelaan ken mannursuroyo.—Sal. 148:12, 13.
2 Kayatmi a maammuanyo a maipagpannakkeldakayo no makitami ti nagsasayaat a kababalinyo, ti nadalimanek a langayo, ti nasayaat a konduktayo, ken ti panagraemyo kadagiti nataengan. Ad-adda a napalalo ti rag-omi no ipakitayo a ‘silalagipkayo iti Namarsua kadakayo’ babaen ti panangipasdekyo a mismo kadagiti nateokratikuan a kalat.—Ecl. 12:1; Sal. 110:3.
3 Ibagayo Kadakami Dagiti Kalatyo: Maysa a barito nga agtawen iti walo kinunana iti manangaywan ti distrito: ‘Umuna kayatko ti agpabautisar, sa kayatko ti tumulong iti kongregasion babaen ti panangasikasok iti sound system ken agiyawatak iti mikropono, agbalin nga attendant, tumulong nga agasikaso iti literatura, agbasa kadagiti panagadal iti libro ken Panagadal iti Pagwanawanan. Kalpasanna kayatko ti agbalin a ministerial nga adipen, sa panglakayen. Kayatko pay ti agpayunir ken agadal iti eskuelaan dagiti payunir. Sa kayatko ti mapan idiay Bethel, agbalin a manangaywan iti sirkito wenno manangaywan iti distrito.’ Anian a nagsayaat ti panangapresiarna iti pribilehio nga agserbi iti Dios!
4 Bayat a rumang-aykayo iti pisikal ken iti naespirituan, maragsakankami a makakita iti panangragpatyo kadagiti kalatyo. (Idiligyo ti Lucas 2:52.) Kada tawen, rinibu kadakayo ti agbalin a di nabautisaran nga agibumbunannag sa kalpasanna makualipikarda a mabautisaran kas dedikado nga ad-adipen ni Jehova. Ad-adda pay ti rag-omi inton makitadakayon nga ag-auxiliary pioneer ken sumrek pay iti amin-tiempo a serbisio. Annak, pudno a pagrag-oandakayo ken dakayo ti nakaskasdaaw a pakaidayawan ti nailangitan nga Amatayo. Sapay koma ta bendisionannakayo a sibabaknang ni Jehova!—Prov. 23:24, 25.