Dagiti Reperensia iti Workbook iti Gimong a Panagbiag ken Ministerio
MARSO 7-13
GAMENG MANIPUD ITI SAO TI DIOS | 1 SAMUEL 12-13
“Ti Kinadarasudos Agresulta iti Pannakaibabain”
Ti Kinakuspag Mangiturong iti Pannakaibabain
17 No bigla a panunoten, kasla nainkalintegan ti inaramid ni Saul. Total, adda idi dagiti tattao ti Dios “iti narigat a kasasaad,” “nariribuk[da],” ken mabutbuteng gapu ta delikado ti sasaadenda. (1 Samuel 13:6, 7) Awan dakesna ti agboluntario nga agtignay no kalikaguman ti kasasaad. Ngem laglagipenyo nga ammo ni Jehova ti linaon ti puso ken ti agpayso a motibotayo. (1 Samuel 16:7) Gapuna, adda la ketdi nakitana ken Saul a saan a direkta a nadakamat iti salaysay ti Biblia. Kas pagarigan, mabalin nga ammo ni Jehova a nagtignay a sidadarasudos ni Saul gapu ta pampanunotenna ti dayawna. Nalabit a masikoran unay ni Saul ta nupay isu ti ari ti intero nga Israel, masapul nga urayenna pay ti impagarupna a maysa a lakay ken managladladaw a propeta! Aniaman ti kasasaad, impapan ni Saul a gapu iti pannakataktak ni Samuel, adda karbenganna a mangidatag iti daton ken manglabsing iti nalawag a bilin a naited kenkuana. Ania ti nagbanaganna? Saan a pinadayawan ni Samuel ti inaramid ni Saul. Tinubngarna ketdi ni Saul, a kunkunana: “Ti pagariam saanto a mataginayon . . . agsipud ta sika dika inaywanan daydi a ni Jehova imbilinna kenka.” (1 Samuel 13:13, 14) Maminsan pay, ti kinakuspag nangiturong iti pannakaibabain.
Tagipatgen ni Jehova ti Panagtulnogmo
8 Ti salaysay ti Biblia maipapan kenni Ari Saul ipaganetgetna a nakapatpateg unay ti panagtulnog. Nangrugi ni Saul nga agturay kas maysa a napakumbaba ken naemma nga ari, a ‘bassit iti bukodna a matmata.’ Ngem idi agangay, ipakita dagiti desisionna nga agminaren ti kinatangsit ken di umiso a panagrasrasonna. (1 Samuel 10:21, 22; 15:17) Naminsan, masapul a makigubat ni Saul kadagiti Filisteo. Imbaga ni Samuel iti ari nga urayenna ti iyaayna a mangidaton kadagiti sakripisio kenni Jehova ken mangipaay iti kanayonan a panangiwanwan. Ngem naladaw ni Samuel, isu a nangrugin a pumanaw dagiti Israelita. Idi makita ni Saul dayta, “indatonna ti mapuoran a sakripisio.” Saan a naay-ayo ni Jehova iti dayta. Idi nakasangpet met laengen ni Samuel, inkalintegan ti ari ti panagsukirna, a kinunana a gapu iti pannakaladaw ni Samuel, ‘napilitan’ a mangidaton iti mapuoran a sakripisio tapno maay-ayo ni Jehova. Para kenni Ari Saul, ti panangidaton iti dayta a sakripisio ket napatpateg ngem iti panagtulnog iti bilin nga urayenna ni Samuel a mangaramid iti dayta a panagidaton. Kinuna ni Samuel kenkuana: “Nagtignayka a simamaag. Saanmo a sinalimetmetan ti bilin ni Jehova a Diosmo nga imbilinna kenka.” Naikkat ni Saul kas ari gapu ta simmukir kenni Jehova.—1 Samuel 10:8; 13:5-13.
Panagkali iti Naespirituan a Gameng
Surotem Kadi ti Naayat a Panangiwanwan ni Jehova?
15 Mabalin a pampanunoten dagiti Israelita nga ad-adda a mapagtalkanda ti tao nga agturay ngem ni Jehova. Pammaneknek dayta a sursurotenda ti saan nga agpaypayso! No kasta ti aramidenda, nalakada la a patien ti dadduma a saan nga agpaypayso a banag a patpatauden ni Satanas. Kas pagarigan, mabalin nga ituggod ida ti natauan nga ari a makiraman iti idolatria. Ipapan dagiti agdaydayaw iti idolo a makapagtalekda kadagiti didiosen a naaramid iti kayo wenno bato gapu ta makita ken maiggamanda dagitoy. Dida agtalek iti di makita a Dios a ni Jehova, ti nangparsua iti amin a bambanag. Ngem kinuna ni apostol Pablo a dagiti idolo ket “awan kapapay-anna.” (1 Cor. 8:4) Dida makakita, makangngeg, makasao, wenno makagaraw. Makita ken maiggamam ida ngem no dayawem, kaipapananna a sursurotem dagiti saan nga agpaypayso a mangituggod laeng kenka iti pannakadidigra.—Sal. 115:4-8.
MARSO 14-20
GAMENG MANIPUD ITI SAO TI DIOS | 1 SAMUEL 14-15
“Nasaysayaat ti Agtulnog Ngem ti Agdaton”
Tagipatgen ni Jehova ti Panagtulnogmo
4 Kas ti Namarsua, kukua ni Jehova ti amin a material a banag nga adda kadatayo. Gapuna, adda kadi aniaman a banag a maitedtayo kenkuana? Wen, adda ti nakapatpateg a mabalintayo nga ited kenkuana. Ania dayta? Maammuantayo ti sungbat manipud iti daytoy a balakad: “Agmasiribka, anakko, ket pagrag-oem ti pusok, tapno makaipaayak iti sungbat iti daydiay mangrurrurod kaniak.” (Proverbio 27:11) Mabalintayo nga ited kenni Jehova ti panagtulnogtayo. Nupay agduduma ti kasasaad ken nalikudantayo, no la ket ta natulnogtayo, tunggal maysa kadatayo masungbatanna ti dakes a pammabasol ni Satanas a Diablo a dagiti tattao ket saan a makapagtalinaed a nasungdo iti Dios no masuotda. Anian a pribilehio dayta!
Panagtulnog
Awan ti maisandi iti panagtulnog, saan a magun-odan ti anamong ti Dios no awan dayta. Kas iti imbaga ni Samuel ken Ari Saul: “Ad-adda kadi a pakaragsakan ni Jehova dagiti daton a mapuoran ken sakripisio ngem ti panagtulnog [porma ti sha·maʽʹ] iti timek ni Jehova? Adtoy! Ti panagtulnog [iti literal, ti panagimdeng] nasaysayaat ngem iti sakripisio, ti panangipangag ngem iti taba dagiti kalakian a karnero.” (1Sm 15:22) Ti saan a panagtulnog ket panangilaksid iti sao ni Jehova, panangiparangarang a ti maysa ket pudno nga awanan iti panamati, panagtalek, wenno pammati iti dayta a sao ken iti Gubuayan dayta. Ngarud daydiay saan nga agtulnog ket awan nakaidumaanna iti daydiay managipadles wenno agar-aramat kadagiti idolo. (1Sm 15:23; idiligyo ti Ro 6:16.) Awan kapapay-an dagiti panangisao iti iyaannugot no saan met a pasarunuan iti panangaramid iti naikalikagum; ti di panagtignay ket pammaneknek ti di panamati wenno panagraem iti gubuayan dagiti pammilin. (Mt 21:28-32) Dagidiay mapnek lattan iti panagdengngeg ken panangawat iti panunotda iti kinapudno ti Dios, ngem saanda nga aramiden ti kalkalikaguman dayta, al-allilawenda ti bagbagida iti ulbod a panagrasrason ken saanda nga umawat iti bendision. (San 1:22-25) Imbatad ti Anak ti Dios nga uray dagidiay mangar-aramid iti bambanag nga umar-arngi kadagidiay naibilin, ngem nabatad a di umiso ti pamay-anda wenno di umiso ti motiboda, saanda a pulos makastrek iti Pagarian no di ket naan-anay a laksidenna ida.—Mt 7:15-23.
Panagkali iti Naespirituan a Gameng
it-2 789
Panangngaasi, Pannakipagrikna
Ti itutulok a mangipakita iti panangngaasi gapu iti pannakapilit idinto ta maikaniwas dayta iti pagayatan ti Dios ket mabalin a napeggad ti pagbanaganna. Kasta ti ipalgak ti napasamak ken Ari Saul. Panawen idin ti panangitungpal iti nadibinuan a panangukom maibusor kadagiti Amalekita, ti kaunaan nga ili a nangraut lattan kadagiti Israelita kalpasan ti ipapanawda idiay Egipto. Naibilin ken Saul a saanna ida a kaasian. Ngem timmulok iti panangpilit dagiti iturayanna ket saanna a naan-anay a sinurot ti bilin ni Jehova. Gapuna, linaksid ni Jehova ni Saul kas ari. (1Sm 15:2-24) Maliklikan ti maysa a tao ti panagaramid iti biddut, a kas iti naaramidan ni Saul, ken ti pannakaipukawna ti anamong ti Dios no tagipatgenna unay ti kinaumiso ti daldalan ni Jehova ken ipangpangrunana ti agbalin a nasungdo Kenkuana.
MARSO 21-27
GAMENG MANIPUD ITI SAO TI DIOS | 1 SAMUEL 16-17
“Kukua ni Jehova ti Gubat”
“Kukua ni Jehova ti Bakal”
Pinagkalma ni David ni Saul babaen ti panangestoriana iti inaramidna iti leon ken iti oso. Agpalpalastog kadi? Saan. Ammo ni David no apay a naabakna dagita. Kinunana: ‘Ni Jehova a nangispal kaniak iti gammat ti leon ken oso, isu ti mangispalto kaniak iti ima daytoy a Filisteo.’ Immanamong met laeng ni Saul: “Inka, ket ni met laeng Jehova adda koma kenka.”—1 Samuel 17:37.
Kayatmo kadi a matulad ti pammati ni David? Kitaem ta saan la a panagarapaap ti pammatina. Resulta dayta ti pannakaammo ken kapadasanna. Am-ammona ni Jehova kas naayat a Manangprotektar ken Manangtungpal kadagiti karina. No kayattayo ti maaddaan iti kasta a pammati, masapul nga itultuloytayo nga am-ammuen ti Dios nga ibagbaga ti Biblia. Bayat nga agbibiagtayo maitunos kadagiti nasursurotayo, makitatayo a nasayaat dagiti resultana, isu a tumibker ti pammatitayo.—Hebreo 11:1.
“Kukua ni Jehova ti Bakal”
Agingga ita, ti sungbat ni David ket makuna a dakkel nga ebkas ti pammati. Iladawanmo ti agtutubo a mangipukpukkaw ken Goliat: ‘Umayka kaniak nga addaan kampilan, pika ken gayang, ngem umayak kenka iti nagan ni Jehova ti buybuyot, ti Dios dagiti linia ti bakal ti Israel, a rinurodmo.’ Ammo ni David a di unay napateg ti pigsa ken armas ti maysa a tao. Saan a rinespeto ni Goliat ti Dios, isu nga agtignay itan ni Jehova. Kas iti kinuna ni David, “kukua ni Jehova ti bakal.”—1 Samuel 17:45-47.
Nakita ni David ti katayag ken dagiti armas ni Goliat. Ngem dina impalubos a mapabutngan kadagita. Saanna a tinulad ti kamali nga inaramid ni Saul ken dagiti soldadona. Dina inkompara ti bagina ken Goliat. Imbes ketdi, inkomparana ni Goliat ken ni Jehova. Adayo a nataytayag ni Goliat ngem iti dadduma a tattao gapu ta agtayag iti 2.9 a metro (9 feet 6 inches). Ngem kasano kadakkel isuna no ikompara iti Kangatuan nga Agturay iti uniberso? Wen, kas iti asinoman a tao, dimo pay maikuna a kasla insekto ti kadakkelna—maysa a parsua a nagalisto laeng a pis-iten ni Jehova no iti daytoy a kaso!
“Kukua ni Jehova ti Bakal”
Saanen a makiramraman ita iti literal a gubat dagiti adipen ti Dios. (Mateo 26:52) Ngem masapul latta a tuladentayo ti pammati ni David. Kas kenkuana, masapul a kitaentayo ni Jehova kas pudpudno a persona—kas ti kakaisuna a Dios a pagserbian ken respetuen. No dadduma, mabalin a mariknatayo a nagbassittayo no ikompara kadagiti problematayo, ngem bassit dagiti problematayo no ikompara iti awan limitasionna a pannakabalin ni Jehova. No pilientayo ni Jehova kas Diostayo ken ipakitatayo ti pammatitayo kenkuana kas ken David, awan ti aniaman a pakarigatan wenno problema a masapul a pagbutngantayo. Awan ti saan a kabaelan ni Jehova a parmeken!
Panagkali iti Naespirituan a Gameng
it-2 1133
Saul
Kalpasan daytoy ken kalpasan ti pannakapulot ni David kas masanguanan nga ari ti Israel, pimmanaw ken Saul ti espiritu ni Jehova. Manipud idin isu “pinagaligaget ti maysa a dakes nga espiritu manipud ken Jehova.” Yantangay pimmanawen ti nasantuan nga espiritu ken Saul, impalubos ni Jehova a maadda ken Saul ti maysa a dakes nga espiritu, iti kasta naawan ti talna ti panunotna ken nagbalinen a dakes ti rikrikna, pampanunot, ken ar-arapaapna. Ti saanna a panagtulnog ken Jehova ket mangipasimudaag iti dakes a pagannayasan ti panunot ken pusona, a gapu iti dayta ti espiritu ti Dios saanna nga impaayan ni Saul iti puersa a mangsalaknib wenno sumaranget. Nupay kasta, yantangay pinalubosan ni Jehova ti “dakes nga espiritu” a mangsukat iti espirituna ken mamagaligaget ken Saul, mabalin a kunaen a “dakes nga espiritu [dayta] manipud ken Jehova,” isu a dagiti adipen ni Saul inawaganda dayta kas “dakes nga espiritu ti Dios.” Kas insingasing ti maysa kadagiti katulonganna, kiniddaw ni Saul nga agbalin ni David a musikerona iti palasio tapno agkalma no riribuken ti “dakes nga espiritu.”—1Sm 16:14-23; 17:15.
MARSO 28–ABRIL 3
GAMENG MANIPUD ITI SAO TI DIOS | 1 SAMUEL 18-19
“Agtultuloy a Napakumbaba no Agballigi”
Agpannuraykayo iti Espiritu ti Dios iti Panangtaming Kadagiti Panagbalbaliw iti Biag
4 Di nagbayag, daytoy nga ubing a pastor ket nagbalin a nalatak iti pagilianna. Nadutokan nga agserbi ken agtokar iti musika para iti ari. Pinapatayna ti mannakigubat a ni Goliat, maysa a nauyong a higante a kabuteng uray dagiti eksperiensiado a soldado ti Israel. Kas lider iti buyot ti Israel, ni David pinarmekna dagiti Filisteo. Isut’ kaay-ayo dagiti tattao. Nangputarda kadagiti kanta a mangitan-ok kenkuana. Sakbayna, ti maysa a mammagbaga ni Ari Saul dineskribirna ni agtutubo a David kas maysa a ‘nasigo nga agtokar’ iti arpa ken “maysa a maingel, nabileg a lalaki ken maysa a lalaki ti gubat ken maysa a nasaririt a pumapalawag ken maysa a nataer a lalaki.”—1 Samuel 16:18; 17:23, 24, 45-51; 18:5-7.
Kitaenyo ti Nagdumaan Dagiti Tattao
6 Agpannakkel ti dadduma gapu iti kinaguapo wenno kinapintas, kinapopular, kinalaing iti musika, kinapigsa, ken nangato a posision. Adda amin dagita ken David; ngem nagtalinaed a napakumbaba iti intero a panagbiagna. Idi napapatay ni David ni Goliat ken naited kenkuana kas asawa ti anak ni Saul, kinunana: “Siasinoak ken siasino ti kakabagiak, ti pamilia ni amak, iti Israel, tapno agbalinak a manugang ti ari?” (1 Sam. 18:18) Apay a nakapagtalinaed a napakumbaba ni David? Dagiti kualidad, abilidad, ken pribilehiona ket gapu iti ‘panagpakumbaba’ ti Dios a nangipaay iti atension kenkuana. (Sal. 113:5-8) Ammona a naggapu ken Jehova ti amin a nasayaat nga adda kenkuana.—Idilig ti 1 Corinto 4:7.
7 Kas ken David, ikagkagumaan dagiti adipen ti Dios nga ipakita ti kinapakumbaba. Matukay ti pusotayo a makaammo nga ipakpakita ni Jehova, ti katan-okan a Persona iti uniberso, dayta a makaay-ayo a kababalin. (Sal. 18:35) Ikagkagumaantayo nga iyaplikar daytoy a balakad: “Kawesanyo ti bagbagiyo kadagiti kinalailo ti pannakipagrikna, kinamanangngaasi, kinapakumbaba iti panagpampanunot, kinaalumamay, ken mabayag a panagitured.” (Col. 3:12) Ammotayo met a ti ayat ket “saan nga agpangas, saan nga agtangsit.” (1 Cor. 13:4) No napakumbabatayo, mabalin a matignay dagiti tattao nga umasideg ken Jehova. No kasano a mabalin a matignay dagiti assawa a lallaki iti kababalin ti assawada, mabalin met a matignay ti dadduma nga umasideg iti Dios gapu iti kinapakumbaba dagiti adipenna.—1 Ped. 3:1.
Panagkali iti Naespirituan a Gameng
it-2 208-209
Mammadto
Nupay nadutokan dagiti mammadto babaen ti espiritu ni Jehova, saanna a kayat a sawen a kanayon nga impaltiing ti Dios ti amin nga isawangda. Imbes ketdi, adda dagiti tiempo a ‘dimteng kadakuada’ ti espiritu ti Dios, nga impalgakna dagiti mensahe a maipakaammo. (Eze 11:4, 5; Mik 3:8) Daytoy ti nangtukay kadakuada, iti kasta natignayda nga agsao. (1Sm 10:10; Jer 20:9; Am 3:8) Malaksid iti panagaramidda iti karkarna a bambanag, awan duadua a babaen ti panagsao ken tigtignayda, nangiparangarangda met iti nasged a rikna a talaga a naisangsangayan. Mabalin a daytoy ti maysa a makagapu no apay a naikuna nga adda dagiti indibidual a ‘nagtignay a kasla mammadto.’ (1Sm 10:6-11; 19:20-24; Jer 29:24-32; idiligyo ti Ara 2:4, 12-17; 6:15; 7:55.) Gapu iti naipamaysa nga atension ken naregta a kinaturedda iti misionda, mabalin nga agparang a kasla karkarna ti kababalinda wenno di nainkalintegan pay ketdi ti panangmatmat kadakuada ti sabali a tattao, kas ti kasasaad ti maysa a mammadto a nagparang kadagiti panguluen ti militar idi napulotan ni Jehu. Nupay kasta, idi nabigbigda a mammadto dayta a lalaki, siseserioso nga inawat dagiti panguluen ti mensahena. (2Ar 9:1-13; idiligyo ti Ara 26:24, 25.) Idi a ni Saul kamkamatenna ni David, ‘napagtignay a kasla mammadto,’ inuksobna dagiti kawesna ket nagidda a “lamolamo iti intero dayta nga aldaw ken iti intero dayta a rabii,” a bayat dayta a tiempo nabatad a ginundawayan ni David ti aglibas. (1Sm 19:18–20:1) Saan a kayat a sawen daytoy a masansan a silalamolamo dagiti mammadto, ta kasupadi dayta ti ipakita ti rekord ti Biblia. Iti dua a sabali pay a kaso a nairekord, adda panggep ti panaglamolamo ti mammadto—tapno iladawanna ti maysa nga aspeto ti padtona. (Isa 20:2-4; Mik 1:8-11) Saan a nadakamat no apay a naglamolamo ni Saul—no dayta ket tapno maipakita nga isu ket tao laeng, a maikkat kenkuana dagiti naarian a kawesna ken awan gawayna iti mismo a naarian nga autoridad ken pannakabalin ni Jehova, wenno no maigapu iti sabali pay a panggep.
ABRIL 4-10
GAMENG MANIPUD ITI SAO TI DIOS | 1 SAMUEL 20-22
“No Kasano ti Agbalin a Nasayaat a Gayyem”
Pabilgem ti Relasionmo Kadagiti Kakabsat Sakbay ti Panungpalan
18 Nagduduma ita ti problema dagiti kakabsattayo. Kas pagarigan, adu ti agsagsagaba gapu iti natural a kalamidad wenno didigra a gapuanan ti tao. No mapasamak dayta, mabalin a padagusen ti dadduma kadatayo dagitoy a kakabsat. Mabalin met a makatulong ti dadduma iti pinansial a kasapulanda. Ngem mabalintayo amin nga ikararag a tulongan ida ni Jehova. No naammuantayo a maup-upay ti maysa a kabsat, baka ditay ammo no ania ti ibaga wenno aramidentayo. Ngem adda maitulongtayo amin. Kas pagarigan, mabalintayo a kaduaen dayta a kabsat, ket siaasi a dumngegtayo bayat nga agsasao. Ken mabalin nga ibagatayo ti paboritotayo a makaliwliwa a teksto. (Isa. 50:4) Ti kapatgan ket addaka iti sibay dagiti kakabsat no kasapulandaka.—Basaen ti Proverbio 17:17.
Magnaka iti Daldalan ni Jehova
7 Namnamaen ti Dios nga agbalintayo a mapagpiaran a gagayyemna. (Prov. 17:17) Ni Jonatan nga anak ni Ari Saul ket nagbalin a gayyem ni David. Idi nadamag ni Jonatan a ni David ti nangpapatay ken Goliat, “ti mismo a kararua ni Jonatan naisinggalut iti kararua ni David, ket nangrugi nga ayaten ni Jonatan a kas iti bukodna a kararua.” (1 Sam. 18:1, 3) Pinakdaaran pay ketdi ni Jonatan ni David idi isu ket kayat a patayen ni Saul. Kalpasan a nagtalaw ni David, nakipagkita ni Jonatan kenkuana ken nagtulagda. Idi imbaga ni Jonatan ken Saul ti maipapan ken David, isu ket dandani pinatay ni amana, ngem nagkitada manen ken pinasingkedanda ti relasionda kas aggayyem. (1 Sam. 20:24-41) Iti maudi a panagkitada, pinapigsa ni Jonatan ti ima ni David “maipapan iti Dios.”—1 Sam. 23:16-18.
Panangtaginayon iti Panaggagayyem iti Awanan Ayat a Lubong
11 Nasungdokayo koma. “Ti pudno a kadua agayat iti isuamin a tiempo, ken ti kabsat a mayanak no adda rigat,” insurat ni Solomon. (Prov. 17:17) Idi pinutar ni Solomon dagita a sasao, nalabit a pampanunotenna ti panaggayyem ni tatangna a David ken ni Jonatan. (1 Sam. 18:1) Kayat ni Ari Saul a ti anakna a ni Jonatan ti agtawid iti trono ti Israel. Ngem inakseptar ni Jonatan ti kinapudno a ni David ti pinili ni Jehova nga agari. Saan a kas ken Saul, di inapalan ni Jonatan ti pribilehio ni David. Saan a nagsakit ti nakemna gapu iti pammadayaw a naited ken ni David ken dina met pinati ti pammardaya ni Saul maipapan ken David. (1 Sam. 20:24-34) Kaslatayo kadi ken Jonatan? No makaawat iti pribilehio ti gayyemtayo, naragsaktayo kadi para kenkuana? Ken no agsagaba, liwliwaen ken saranayentayo kadi? No makangngegtayo iti tsismis maipapan kenkuana, patientayo kadi a dagus? Wenno kas ken Jonatan, sisusungdo kadi nga isakittayo ti gayyemtayo?
Panagkali iti Naespirituan a Gameng
Dagiti Tampok iti Libro nga Umuna a Samuel
21:12, 13. Namnamaen ni Jehova nga usarentayo dagiti abilidad ken laingtayo nga agpanunot iti panangsangotayo kadagiti narigat a situasion iti biag. Impaayna kadatayo ti naipaltiing a Saona, a mangiwardas iti sirib, pannakaammo, ken abilidad nga agpanunot. (Proverbio 1:4) Manamnamatayo met ti tulong dagiti nadutokan a Kristiano a papanglakayen.
ABRIL 18-24
GAMENG MANIPUD ITI SAO TI DIOS | 1 SAMUEL 23-24
“Siaanus nga Aguray ken Jehova”
Agpannuraykayo iti Espiritu ti Dios iti Panangtaming Kadagiti Panagbalbaliw iti Biag
8 Nagkedked ni David a mangdangran ken ni Saul. Buyogen ti pammati ken panaganus, kaykayatna nga italek laengen ken ni Jehova dagiti bambanag. Kalpasan a rimmuar ti ari iti rukib, nagpukkaw ni David ket kinunana kenkuana: “Mangukom koma ni Jehova iti nagbaetanta; ket ibalesannakto ni Jehova kenka, ngem saanto nga agdisso kenka ti bukodko nga ima.” (1 Samuel 24:12) Uray ammona a ni Saul ti nagkamali, saan a nagibales ni David; saanna met a pinagsasawan wenno nagsao iti maibusor ken ni Saul. Adu a daras a minedmedan ni David ti bagina nga agibales. Imbes ketdi, nagtalek a ni Jehova ti mangilinteg kadagiti bambanag.—1 Samuel 25:32-34; 26:10, 11.
Ti Kadi Kasasaadyo ti Mangkonkontrol iti Biagyo?
Ti maikatlo a maadaltayo: Imbes a balbaliwantayo ti kasasaadtayo babaen dagiti di nainkasuratan a pamay-an, urayentayo koma ti panagtignay ni Jehova. Insurat ni adalan a Santiago: “Bay-anyo a ti panagibtur an-anayenna ti aramidna, tapno maan-anay ken nasalun-atkayo iti amin a bambanag, a saan nga agkurang iti aniaman.” (Santiago 1:4) Bay-antayo koma a ti panagibtur “an-anayenna ti aramidna” babaen ti panangibturtayo iti maysa a pakasuotan agingga a malpas ket saan a mangaramat kadagiti di nainkasuratan a pamay-an a mangyeg iti madagdagus a solusion. Iti kasta, masubok ken magugoran ti pammatitayo ket dayta ti mangipalgak iti pudpudno a katibkerna. Kasta ti panagibtur da Jose ken David. Saanda a nagusar iti solusion a di makaay-ayo ken ni Jehova. Imbes ketdi, inaramidda ti kasayaatan sigun iti impalubos ti kasasaadda. Nagurayda ken ni Jehova, ket anian a bendision ti naawatda gapu iti panagibturda! Agpada nga inusar ida ni Jehova a mangispal ken mangiturong iti ilina.—Genesis 41:39-41; 45:5; 2 Samuel 5:4, 5.
Mabalin a maipasangotayo met kadagiti situasion a mamagannayas kadatayo nga agaramid kadagiti di nainkasuratan a solusion. Kas pagarigan, maupaykayo kadi gapu ta dikay pay nakabirok iti maitutop a pakiasawaanyo? No kasta, liklikanyo ti aniaman a sulisog a manglabsing iti bilin ni Jehova a mangasawa ‘iti laeng Apo.’ (1 Corinto 7:39) Adda kadi parikutyo iti relasionyo nga agassawa? Imbes a tuladenyo ti kababalin ti lubong a mangitandudo iti panagsina ken diborsio, agbinnuligkayo a mangrisut kadagiti parikutyo. (Malakias 2:16; Efeso 5:21-33) Marigatankayo kadi a mangaywan iti pamiliayo gapu iti pinansial a kasasaadyo? Ti panaguray ken ni Jehova iramanna ti panangliklik kadagiti mapagduaduaan wenno ilegal nga aramid tapno laeng makagun-od iti kuarta. (Salmo 37:25; Hebreo 13:18) Wen, nasken nga ikagumaantayo amin nga aramiden ti kasayaatan agingga iti ipalubos ti kasasaadtayo ket pagreggetantayo a gun-oden ti pamendision ni Jehova. Bayat nga ar-aramidentayo dayta, determinadotay koma nga aguray ken ni Jehova agpaay iti kasayaatan a solusion.—Mikias 7:7.
Panagkali iti Naespirituan a Gameng
Awan Koma ti Manglapped Kenka a Mangawat iti Gunggona
11 No patanorentayo ti ayat ken asi iti pusotayo, saantayo a nalaka nga agimon. Kuna ti Sao ti Dios: “Ti ayat mabayag-panagituredna ken manangngaasi. Ti ayat saan a managimon.” (1 Cor. 13:4) Tapno saan nga agramut ti imon iti pusotayo, rumbeng nga ikagumaantayo a kitaen dagiti bambanag a kas iti panangmatmat ti Dios, a matmatantayo dagiti kakabsattayo kas paset ti maymaysa a Nakristianuan a bagi. Makatulong dayta tapno agbalintayo a mannakipagrikna, maitunos iti balakad ti Kasuratan: “No ti maysa a kameng maipadayag, amin dagiti dadduma a kameng agrag-oda a mairaman iti dayta.” (1 Cor. 12:16-18, 26) Ngarud, imbes nga agimontayo, maragsakantayo no mabendisionan ti dadduma. Usigentayo ti pagarigan ti anak ni Ari Saul a ni Jonatan. Saan a nagimon idi nadutokan ni David nga agtawid iti trono. Pinaregtana ketdi ni David. (1 Sam. 23:16-18) Agbalintayo kadi a naasi ken naayat a kas ken Jonatan?
ABRIL 25–MAYO 1
GAMENG MANIPUD ITI SAO TI DIOS | 1 SAMUEL 25-26
“Nadarasudoska Kadi?”
Nagtignay a Sisasaririt
10 Kasano ti panangtrato dagiti nagaget a soldado kadagiti agpaspastor? Mamin-ano la koma ti pasaray panangilibasda iti karnero a pagtaraonda, ngem dida inaramid ti kasta. Imbes ketdi, kasda la mangsalaknib a pader iti aglikmut dagiti arban ken adipen ni Nabal. (Basaem ti 1 Samuel 25:15, 16.) Adu ti pagpeggadan dagiti karnero ken papastor. Adu ti narungsot nga animal iti aglawlaw ken gapu ta asideg ti makin-abagatan a beddeng ti Israel, masansan a rumaut dagiti bunggoy dagiti ganggannaet a tulisan ken mannanakaw.
11 Nadagsen la ketdi a responsabilidad ti mangpakan idiay let-ang iti kasta a kaadu. Isu a maysa nga aldaw, nangibaon ni David iti sangapulo a mensahero a mapan agkiddaw iti tulong ni Nabal. Pinili ni David ti kasayaatan a tiempo. Inranana iti naragsak a panawen ti panangpukis kadagiti karnero, a kadawyanna a naparabur ken agpipiesta dagiti tattao. Siaannad met a pinili ni David dagiti sasaona ta nagusar kadagiti nadayaw a termino ken pangkablaaw. Tinukoyna pay ti bagina kas ti “anakmo a David,” a nalabit tapno ipakitana ti panagraemna iti in-inauna kenkuana a ni Nabal. Ania ti reaksion ni Nabal?—1 Sam. 25:5-8.
12 Nakapungtot unay! Sigun iti nadakamat itay nga agtutubo a lalaki a nagipulong ken Abigail, ni Nabal ket “nangibugkaw kadagiti pammabalaw kadakuada.” Imbugbugkaw ni naimut a Nabal ti maipapan kadagiti nabalor kenkuana a tinapay, danum, ken karne. Inumsina ni David kas awan kaes-eskanna ken impadana iti nagtalaw nga adipen. Nalabit umasping ti panangmatmat ni Nabal iti panangmatmat ni Saul a manggurgura ken David. Agpada a maisupadi ken Jehova ti panangmatmatda. Ti Dios ay-ayatenna ni David, ken minatmatanna saan a kas rebelioso nga adipen no di ket kas sumaruno idi nga ari ti Israel.—1 Sam. 25:10, 11, 14.
Nagtignay a Sisasaririt
18 Inakonan a mismo ti biddut ni lakayna sana kiniddaw ken David nga isu laengen a mismo ti pakawanenna. Talaga nga inaminna nga awan kaes-eskan ni lakayna kas kaipapanan ti nagan a Nabal, nalabit tapno iparipiripna a maipababa laeng ti dayaw ni David no tutopanna ti kasta a lalaki. Inyebkasna ti panagtalekna ken David kas pannakabagi ni Jehova ken binigbigna pay a makidangdangadang ni David kadagiti “gubat ni Jehova.” Impasimudaagna met nga ammona ti kari ni Jehova maipapan ken David ken ti panagarina, ta kinunana: “Ni Jehova . . . sigurado a parebbengannakanto a kas panguluen iti Israel.” Kanayonanna, impakaasi ni Abigail ken David a saan nga agaramid iti aniaman a nalabit mangituggod kenkuana a makabasol iti dara wenno nalabit agbalin a ‘pakaigapuan ti panagbariring wenno pannakaitibkol’—a nabatad a tumukoy iti pannakakonsiensia. (Basaem ti 1 Samuel 25:24-31.) Anian a nagimbag ken makatukay a sasao!
Panagkali iti Naespirituan a Gameng
Nagtignay a Sisasaririt
16 Kaipapanan kadi dayta a di agpaspasakup ni Abigail iti kinaulo ni lakayna? Saan a pulos. Laglagipem a nagdakes ti panangtrato ni Nabal iti adipen a pinulotan ni Jehova. Mabalin a pakatayan ti adu nga inosente a kameng ti sangakabbalayanna dayta nga inaramidna. No saan nga agtignay ni Abigail, dinto ngata mairaman iti basol ni lakayna? Aniaman ti mapasamak, nasken nga ipangpangrunana ti panagpasakupna iti Dios ngem iti panagpasakupna ken lakayna.