Dagiti Reperensia iti Workbook iti Gimong a Panagbiag ken Ministerio
MAYO 2-8
GAMENG MANIPUD ITI SAO TI DIOS | 1 SAMUEL 27-29
“Ti Taktika ni David iti Pannakigubat”
it-1 200
Aquis
Namindua a nagkamang ni David iti pagturayan ni Ari Aquis bayat ti panangtaltalawna ken Saul. Iti immuna a panagkamangna, naginmamauyong ni David idi inatapda a maysa a kabusor ket binaybay-an ni Aquis a pumanaw kas di mangan-ano a mulmulluong. (1Sm 21:10-15; Sal 34:Sup; 56:Sup) Iti maikadua nga ipapan ni David sadiay, kaduana ti 600 a mannakigubat ken dagiti pamiliada, ket iti kasta intuding ida ni Aquis nga agnaed idiay Siclag. Bayat ti makatawen ken uppat a bulan a kaaddada sadiay, namati ni Aquis a rubrubbuoten ti buyot ni David ti il-ili ti Juda, ngem ti kinaagpaysuanna ti sinamsaman ni David ket dagiti Gesurita, Girzeo, ken Amalekita. (1Sm 27:1-12) Naballigi unay dayta a panangallilaw ni David ta isu ket pinagbalin ni Aquis kas bukodna a para-guardia idi a mangor-organisar dagiti Filisteo iti iraraut ken Ari Saul, ket idi laengen maudi a kanito a napagsubli ni David ken dagiti tattaona idiay Siclag gapu iti panangipappapilit ti dadduma pay nga “aliado nga appo” dagiti Filisteo a mapagawidda. (1Sm 28:2; 29:1-11) Idi a ni David nagbalin nga ari ket nakigubat iti Gat, nalawag a saan a napapatay ni Aquis. Sibibiag pay idi nagturay ni Solomon.—1Ar 2:39-41; kitaenyo ti GAT.
Agtutubo a Lallaki—Kasano nga Agtalek Kadakayo ti Sabsabali?
Usigentayo ti maysa pay a problema a nakaipasanguan ni David. Kalpasan a nadutokan nga agbalin nga ari, masapul nga aguray iti adu a tawen sakbay nga opisial nga agturay kas ari ti Juda. (1 Sam. 16:13; 2 Sam. 2:3, 4) Bayat dayta a tiempo, ania ti nakatulong kenkuana a siaanus nga aguray? Imbes a naupay ni David, nagpokus iti maaramidanna. Kas pagarigan, bayat a nagnaed ni David kas pugante iti teritoria dagiti Filisteo, ginundawayanna ti nakilaban kadagiti kabusor ti Israel. Gapu iti dayta, naprotektaranna dagiti pagbeddengan ti teritoria ti Juda.—1 Sam. 27:1-12.
Kinaulbod
Nupay ti dakes ti motibona a panagulbod nalawag a nakondenar iti Biblia, saanna a kayat a sawen daytoy a ti maysa a tao obligado a mangipalgak iti pudno nga impormasion kadagiti tattao a saan a maiparbeng nga umawat iti dayta. Imbalakad ni Jesu-Kristo: “Dikay ited kadagiti aso no ania ti nasantuan, dikay met ipuruak dagiti perlasyo iti sanguanan dagiti baboy, tapno saanda a pulos payatpayaten ida iti baba dagiti sakada ket agbueltada ken pisangpisangendakayo.” (Mt 7:6) Dayta ti makagapu no apay nga adda dagiti gundaway a nagkedked ni Jesus a mangipaay iti kompleto nga impormasion wenno direkta a sungbat iti sumagmamano a saludsod no adda di nasayaat nga ibunga ti panangsungbatna kadagita. (Mt 15:1-6; 21:23-27; Jn 7:3-10) Nabatad a kasta met laeng koma a panangmatmattayo iti inaramid da Abraham, Isaac, Rahab, ken Eliseo a panangtikaw wenno panangikedked iti intero a detalye kadagiti di managdaydayaw ken Jehova.—Ge 12:10-19; kap 20; 26:1-10; Jos 2:1-6; San 2:25; 2Ar 6:11-23.
Panagkali iti Naespirituan a Gameng
Adda Kadi Maitulong Dagiti Natay Kadagiti Sibibiag?
Panunotem daytoy. Kuna ti Biblia a no matay ti maysa a tao, “agsubli iti dagana” ken “mapukaw dagiti panunotna.” (Salmo 146:4) Agpadpada nga ammo da Saul ken Samuel a kondenaren ti Dios ti iyaadani kadagiti mannakiuman iti espiritu. Idi damo, ni Saul pay ketdi ti nangidaulo iti panangpasardeng kadagiti espiritistiko nga ar-aramid iti daga!—Levitico 19:31.
Usigem daytoy. No sibibiag koma pay ni Samuel kas maysa nga espiritu, salungasingenna ngata ti linteg ti Dios ken makitinnulong iti mannakiuman iti espiritu tapno makasaona ni Saul? Saan a kayat ni Jehova ti makisarita ken Saul. Kabaelan kadi ti mannakiuman iti espiritu a piliten ti Mannakabalin-amin a Dios tapno makisao ken Saul babaen iti natayen a propetana a ni Samuel? Saan. Nalawag a ti nagparang a “Samuel” ket saan a ti matalek a propeta ti Dios. Dayta ket maysa a nadangkes nga espiritu, maysa a demonio a nagpammarang kas ti natayen a ni Samuel.
MAYO 9-15
GAMENG MANIPUD ITI SAO TI DIOS | 1 SAMUEL 30-31
“Pabilgem ti Bagim iti Tulong ni Jehova a Diosmo”
Agbutengka ken ni Jehova—Agragsakka!
12 Saan laeng a naliklikan ni David ti agaramid iti dakes gapu iti panagbutengna ken ni Jehova. Dayta pay ti nangpabileg kenkuana nga agtignay nga awan panagpangadua ken nainsiriban iti sidong dagiti narigat a kasasaad. Iti makatawen ken uppat a bulan, nagkamang ni David ken dagiti tattaona idiay Siclag nga ili ti Filistia tapno malibasanda ni Saul. (1 Samuel 27:5-7) Naminsan, idi nakapanaw da David, rimmaut dagiti Amalekita ket pinuoranda ti siudad ken innalada dagiti assawa a babbai, annak, ken ar-arban. Apaman a nakaawid ken nakitada ti napasamak, nagsangsangit ni David ken dagiti tattaona. Dagus a nasukatan iti pungtot dayta a panagladingit, ket nagnunumuan dagiti tattao nga uborenda ni David. Nupay naburiboran, saan a naawanan ni David iti namnama. (Proverbio 24:10) Ti panagbutengna iti Dios ti nangtignay kenkuana nga agtalek ken ni Jehova, ket ‘pinapigsana ti bagina babaen ken Jehova.’ Buyogen ti tulong ti Dios, nakamatan ken nabawi da David ti amin nga innala dagiti Amalekita.—1 Samuel 30:1-20.
Saluadannatayo ni Jehova Agpaay iti Pannakaisalakan
14 Adu a narigat a kasasaad ti napasaran ni David. (1 Sam. 30:3-6) Ipalgak ti naipaltiing a sasao ni David nga ammo ni Jehova ti rikriknana. (Basaen ti Salmo 34:18; 56:8.) Ammo met ti Dios ti rikriknatayo. Umadani kadatayo no ‘nadunor ti pusotayo’ wenno ‘naidagel ti espiritutayo.’ Makaliwliwa dayta kadatayo, kas ken David a nangikanta: “Agrag-oakto ken agragsakak iti naayat a kinamanangngaasim, ta nakitam ti pannakaparigatko; naammuam ti maipapan kadagiti tuok ti kararuak.” (Sal. 31:7) Saan laeng a makitkita ni Jehova dagiti pakarigatantayo. Ipapaayannatayo pay iti liwliwa ken pammaregta tapno makapagibturtayo. Ti maysa a pamay-an nga ar-aramidenna dayta ket babaen kadagiti Nakristianuan a gimong.
Panagkali iti Naespirituan a Gameng
Dagiti Tampok iti Libro nga Umuna a Samuel
30:23, 24. Daytoy a desision, a naibatay iti Numeros 31:27, ipakitana nga ipatpateg ni Jehova dagidiay agserserbi kas saranay ti kongregasion. Aniaman ngarud ti ar-aramidentayo, aramidentayo “dayta nga amin-kararua a kas maipaay ken Jehova, ket saan a maipaay iti tattao.”—Colosas 3:23.
MAYO 16-22
GAMENG MANIPUD ITI SAO TI DIOS | 2 SAMUEL 1-3
“Ania ti Masursurotayo iti ‘Ti Pana’?”
Padayawanyo Dagidiay Addaan Autoridad Kadakayo
9 Nariribukan kadi ni David idi a mairurrurumen? “Dagiti naranggas a tattao binirbirokda toy kararuak,” inyasug ni David ken Jehova. (Salmo 54:3) Imbukbokna ti pusona ken Jehova: “Ispalennak kadagiti kabusorko, O Diosko . . . Dagiti nabileg agtitiponda a sititimpuyog a bumusor kaniak: saan a gapu iti panaglabsingko, di met gapu iti basolko, O Jehova. Agtarayda ken agsaganada met idinto nga awan basolko. Agriingka tapno tulongannak, ket matmatam.” (Salmo 59:1-4) Nariknayo met kadin ti kasta—a nupay ammoyo nga awan basolyo iti tao nga addaan autoridad, kaskasdi a parparigatennakayo? Rinaem ni David ni Saul. Idi natayen ni Saul, nagdung-aw ni David imbes nga agragsak: “Ni Saul ken ni Jonatan isuda idi ti naayat ken nakaay-ayo iti panagbiagda . . . Isuda nasigsiglatda ngem kadagiti agila, isuda napigpigsa idi ngem kadagiti leon. Dakayo annak a babbai ti Israel, sangitanyo ni Saul.” (2 Samuel 1:23, 24) Anian a nagsayaat nga ulidan iti napaypayso a panagraem iti pinulotan ni Jehova, uray pay no rinanggasan ni Saul ni David!
Panangliput—Pagilasinan ti Maudi nga Al-aldaw!
8 Naglaon met ti Biblia iti adu a pagarigan dagiti nasungdo nga indibidual. Usigentayo ti dua kadakuada ken kitaentayo no ania ti maadaltayo. Unaentayo ti maysa a lalaki a nasungdo ken David. Isu ti inauna nga anak ni Ari Saul a ni Jonatan nga agtawid koma iti trono ti Israel. Ngem ni David ti pinili ni Jehova a sumaruno nga ari. Rinaem ni Jonatan ti desision ti Dios isu nga imbes nga agimon ken ibilangna ni David kas karibal, ti “kararua ni Jonatan naisinggalut iti kararua ni David” ken inkarina ti kinasungdona kenkuana. Intedna pay ken David dagiti kawes, kampilan, bai, ken barikesna kas panangbigbig iti kinaarina. (1 Sam. 18:1-4) Inaramid ni Jonatan ti amin a kabaelanna tapno ‘mapapigsana ti ima ni David.’ Uray la inrisgona ti biagna idi indepensana ni David iti sanguanan ni Saul. Sisusungdo nga imbaga ni Jonatan ken ni David: “Sika agarikanto iti Israel, ket siak agbalinakto a maikadua kenka.” (1 Sam. 20:30-34; 23:16, 17) Di pakasdaawan a kalpasan ti ipapatay ni Jonatan, inyebkas ni David ti ladingit ken panagayatna babaen ti kanta.—2 Sam. 1:17, 26.
Panagkali iti Naespirituan a Gameng
Kabsat a Lalaki
Ti “kabsat” agaplikar met kadagidiay nagkaykaysa iti pangkaaduan a prinsipio ken addaan kadagiti isu met laeng a kalat ken panggep. Kas pagarigan, ni Ari Hiram ti Tiro inawaganna a kabsatna ni Ari Solomon, saan a gapu laeng ta pumadpad iti ranggo ken saad no di ket nalabit gapu met kadagiti agpada nga interesda iti panangabasto kadagiti kayo ken dadduma pay a banag maipaay iti templo. (1Ar 9:13; 5:1-12) “Adtoy! Anian a nagimbag ken anian a makaay-ayo a dagiti agkakabsat agnaedda a sangsangkamaysa buyogen ti panagtutunos!” insurat ni David, a mangipamatmat a saan laeng a dagiti pannakainaig iti dara ti mamagkakappia ken mamagkaykaysa kadagiti agkakabsat iti lasag. (Sal 133:1) Kinapudnona, ti panagayat ken pannakaseknan iti maysa ken maysa, saan a ti maymaysa a nagtaudan, ti nangtignay ken David a mangawag ken Jonatan kas kabsatna. (2Sm 1:26) Dagiti agkakadua nga agpapada dagiti kababalin ken pagannayasanda, uray no dakes dagita, ket siuumiso a maawagan agkakabsat.—Pr 18:9.
MAYO 23-29
GAMENG MANIPUD ITI SAO TI DIOS | 2 SAMUEL 4-6
“Taginayonen ti Umiso a Panagbuteng a Mapagura ni Jehova”
Dagiti Tampok iti Libro a Maikadua a Samuel
6:1-7. Nupay nasayaat ti motibo ni David, dina nayakar ti Lakasa babaen ti kareson gapu ta saan a maitunos dayta iti bilin ti Dios. (Exodo 25:13, 14; Numeros 4:15, 19; 7:7-9) Ti panangtengngel ni Uzzah iti Lakasa ipakitana met a dagiti nasayaat a panggep saanna a baliwan dagiti pagannurotan ti Dios.
Kanayon nga Umiso ti Aramid ni Jehova
20 Laglagipenyo a rumbeng koma nga ammo ni Uzzah ti Linteg. Ti Lakasa ket nainaig iti presensia ni Jehova. Espesipiko nga imbilin ti Linteg a saan a rumbeng a sagiden dayta dagiti saan nga autorisado a tattao, ken silalawag a nangballaag a mapapatay ti asinoman a mangsalungasing iti dayta. (Numeros 4:18-20; 7:89) Gapuna, saan a rumbeng a tagilag-anen ti annongen a panangyakar iti dayta a sagrado a baul. Nabatad a maysa a Levita ni Uzzah (nupay saan a padi), isu a rumbeng koma a kabesadona ti Linteg. Maysa pay, adu a tawen sakbayna, naitalimeng ti Lakasa iti balay ni amana. (1 Samuel 6:20–7:1) Nagtalinaed sadiay iti agarup 70 a tawen, agingga nga inkeddeng ni David nga iyakar dayta. Isu a manipud kinaubingna, mabalin nga ammon ni Uzzah dagiti linteg nainaig iti Lakasa.
Kanayon nga Umiso ti Aramid ni Jehova
21 Kas nadakamat itay, mabasa ni Jehova dagiti puso. Gapu ta iti Biblia inawaganna ti inaramid ni Uzzah kas “awan panagraemna a tignay,” agparang nga adda nakita ni Jehova nga inaagum a motibo a saan a nailanad iti dayta a salaysay. Mabalin ngata a nadursok a tao ni Uzzah, a masansan a lumbes kadagiti pagbeddengan a sagudayen ti Linteg? (Proverbio 11:2) Pagpannakkelna ngata ti publiko a panangidaulona iti pannakayakar ti Lakasa nga inaywanan ti pamiliana? (Proverbio 8:13) Awan kadi ti pammati ni Uzzah tapno panunotenna a saan a kabaelan ni Jehova a salakniban ti sagrado a baul a mangisimbolo iti presensiana? Aniaman kadagita, masiguradotayo nga umiso ti inaramid ni Jehova. Nabatad nga adda nakitana iti puso ni Uzzah a nakaigapuan ti madagdagus a panangukomna.—Proverbio 21:2.
Panagkali iti Naespirituan a Gameng
Kanayon nga Iyallatiwyo ti Awityo ken Jehova
Kas ari manungsungbat la ketdi ni David iti daytoy. Ipakpakita ti tignayna nga uray dagidiay addaan nasayaat a relasion ken Jehova pasaray mabalin a makaaramid iti di umiso kadagiti makasuot a kasasaad. Idi damo nakapungtot ni David. Kalpasanna nagbuteng. (2 Samuel 6:8, 9) Nasuot unay ti managtalek a relasionna ken Jehova. Adtoy ti maysa a gundaway idi agparang a dina inyallatiw ti awitna ken Jehova, idi saanna a sinurot dagiti bilinna. Mabalin ngata a maipasidongtayo iti kasta a kasasaad no dadduma? Pabasolentay kadi ni Jehova kadagiti parikut a tumaud gapu iti ditay panangikankano kadagiti bilinna?—Proverbio 19:3.
MAYO 30–HUNIO 5
GAMENG MANIPUD ITI SAO TI DIOS | 2 SAMUEL 7-8
“Nakitulag ni Jehova ken David”
“Ti Pagariam Sigurado a Natibkerto”
Naragsakan ni Jehova iti naimpusuan a tarigagay ni David. Gapu iti debosion ni David ken maitunos iti padtona, nangaramid ti Dios iti tulag iti nagbaetanda ken David nga addanto agtaud iti kapuonan ni David ket agturayto iti agnanayon. Impakaammo ni Natan ti sagrado a kari ti Dios ken David: “Ti balaymo ken ti pagariam sigurado a natibkerto agingga iti tiempo a di nakedngan iti sangom; ti mismo a tronom agbalinto a maysa a naipasdek a sititibker agingga iti tiempo a di nakedngan.” (Bersikulo 16) Siasino ti permanente nga Agtawid iti dayta a tulag—Daydiay agturay iti agnanayon?—Salmo 89:20, 29, 34-36.
“Ti Pagariam Sigurado a Natibkerto”
Ni Jesus iti Nazaret ket kaputotan ni David. Idi impakaammona ti pannakayanak ni Jesus, kinuna ti maysa nga anghel: “Ni Jehova a Dios itednanto kenkuana ti trono ni David nga amana, ket agturayto kas ari iti balay ni Jacob iti agnanayon, ket awanto ti panungpalan ti pagarianna.” (Lucas 1:32, 33) Natungpal ngarud ken Jesu-Kristo ti tulag ti Dios ken David. No kasta, agturay ni Kristo saan a kas pinili ti tao, no di ket babaen ti sagrado a kari ti Dios a nangipaay kenkuana iti kalintegan nga agturay iti agnanayon. Laglagipentayo koma a kanayon a matungpal dagiti kari ti Dios.—Isaias 55:10, 11.
Maaddaan iti Natibker a Pammati iti Pagarian
14 Usigentayo ti inkari ni Jehova ken Ari David iti nagkauna nga Israel. Maawagan dayta iti tulag ken David. (Basaen ti 2 Samuel 7:12, 16.) Inaramid ni Jehova daytoy a tulag bayat nga agturturay ni David kas ari iti Jerusalem. Inkarina ken David nga agtaudto kenkuana ti Mesias. (Luc. 1:30-33) Gapuna, impalgak ni Jehova ti espesipiko a pagtaudan dayta a kaputotan ken pinatalgedanna a ti addaan iti “legal a kalintegan” nga agtawid iti trono ti Mesianiko a Pagarian ket maysa a kaputotan ni David. (Ezeq. 21:25-27) Babaen ken Jesus, ti kinaari ni David ket “maipasdekto . . . a sititibker iti tiempo a di nakedngan.” Gapuna, ti kaputotan ni David ket “agingga iti tiempo a di nakedngan, ken [agtalinaed iti agnanayon] ti tronona kas iti init.” (Sal. 89:34-37) Wen, saanto pulos nga agbalin a dakes ti Mesias, ket agnanayonto dagiti banag a maaramidanna!
Panagkali iti Naespirituan a Gameng
Maudi nga Aldaw, Dagiti
Padto ni Balaam. Sakbay a simrek dagiti Israelita iti Naikari a daga, ti panangikuna ni mammadto Balaam ken Ari Balak ti Moab: “Umayka, bay-am a balakadanka no anianto ti aramiden daytoy nga ili [ti Israel] iti ilim kalpasanna iti panungpalan dagiti aldaw. . . . Sigurado a rummuarto ti maysa a bituen manipud ken Jacob, ket tumaudto ti maysa a setro manipud Israel. Ket sigurado a burakburakennanto dagiti pispis ti ulo ti Moab ken ti sabutsabut ti amin nga annak ti arimbangaw ti gubat.” (Nu 24:14-17) Iti damo a kaitungpalan daytoy a padto, dayta a “bituen” ket ni Ari David, ti nangparmek kadagiti Moabita. (2Sm 8:2) Isu a nabatad nga iti dayta a kaitungpalan daytoy a padto, nangrugi ti “panungpalan dagiti aldaw” idi nagbalin nga ari ni David. Yantangay ni David inladawanna ni Jesus kas Mesianiko nga Ari, agaplikar met daytoy a padto ken Jesus iti tiempo a panangparmekna kadagiti kabusorna.—Isa 9:7; Sal 2:8, 9.
HUNIO 6-12
GAMENG MANIPUD ITI SAO TI DIOS | 2 SAMUEL 9-10
“Impakita ni David ti Napudno nga Ayat”
Wen, Masarakanyo ti Kinaragsak
“Naragsak ti asinoman nga agtigtignay a buyogen ti konsiderasion iti daydiay nanumo,” insurat ni David. Intuloyna: “Iti aldaw ti didigra isu ilisinto ni Jehova. Isu saluadanto ni Jehova a mismo ket taginayonennanto a sibibiag. Isu maikunanto a naragsak.” (Salmo 41:1, 2) Ti naayat a konsiderasion nga impakita ni David ken ni Mefiboset, ti pilay nga anak ni Jonatan a dungdungnguen a gayyem ni David, ket maysa a pagarigan ti umiso a kababalin iti maysa a nanumo.—2 Samuel 9:1-13.
Dagiti Tampok iti Libro a Maikadua a Samuel
9:1, 6, 7. Sinalimetmetan ni David ti karina. Masapul met nga ikagumaantayo a salimetmetan ti karitayo.
Sinarangetda Dagiti Siit iti Lasagda
10 Sumagmamano a tawen kalpasanna, impakita ni Ari David ti naayat a kinamanangngaasina ken Mefiboset gapu iti dakkel a panagayatna ken Jonatan. Impatawid kenkuana ni David ti amin a sanikua ni Saul ket dinutokan ti ari ti katulongan ni Saul a ni Ziba tapno mangtaripato iti dayta a daga. Kinuna pay ni David ken ni Mefiboset: “Mangankanto a patinayon iti tinapay iti lamisaanko.” (2 Samuel 9:6-10) Awan duadua a naliwliwa ni Mefiboset iti naayat a kinamanangngaasi ni David ken nakatulong a nangep-ep iti saem ti an-annayenna. Anian a nagsayaat a leksion! Nasken a naasitayo met kadagidiay parparigaten ti siit iti lasag.
Panagkali iti Naespirituan a Gameng
it-1 380
Barbas
Kadagiti adu a kadaanan a tattao iti Daya, a pakairamanan dagiti Israelita, natagipateg ti barbas kas maysa a pammaneknek ti malalaki a dayaw. Ti linteg ti Dios iti Israel imparitna ti panangputed iti ‘buok iti sikigan ti ulo,’ ti buok iti nagbaetan ti lapayag ken ti mata, ken iti pingir ti barbas. (Le 19:27; 21:5) Di pagduaduaan a maigapu ta narelihiosuan a kaugalian idi dayta kadagiti sumagmamano a pagano.
HUNIO 13-19
GAMENG MANIPUD ITI SAO TI DIOS | 2 SAMUEL 11-12
“Dimo Ipalubos a Kontrolennaka Dagiti Dakes a Tarigagay”
Kabaelam ti Lumapsut Kadagiti Silo ni Satanas!
10 Gapu iti kinaagum, nalipatan ni Ari David dagiti impaay kenkuana ni Jehova, a pakairamanan ti kinabaknang, kinalatak, ken panagballigina iti adu a kabusorna. Siyayaman ni David a nangbigbig a dagiti sagut ti Dios ket ‘dina masaggaysa gapu iti kinaaduda!’ (Sal. 40:5) Ngem adda idi tiempo a nalipatan ni David dagiti impaay kenkuana ni Jehova. Saanen a kontento; kayatna ti ad-adu pay. Uray no adda idin sumagmamano nga asawa ni David, impalubosna nga agtubo iti pusona ti di umiso a tarigagay para iti asawa ti sabali. Dayta a babai ket ni Bat-sheba, ket ni Urias a Heteo ti asawana. Managimbubukodan ni David ta nakidenna ken Bat-sheba, a nagresulta iti panagsikogna. Nagdakesen ti inaramid ni David a pannakikamalala, ngem adda pay dakdakes nga inaramidna: implanona ti pannakapapatay ni Urias! (2 Sam. 11:2-15) Ania idi ti pampanunoten ni David? Impagarupna ngata a saan a makitkita isuna ni Jehova? Dayta a dati a matalek nga adipen ni Jehova ket nagbalin a managimbubukodan ken nagsagaba iti nakaro gapu iti dayta. Imbag laengen ta inamin ni David ti basolna ket nagbabawi. Anian a yamanna ta nagun-odanna manen ti pabor ni Jehova!—2 Sam. 12:7-13.
Situtulok nga Agpasakup ken Jehova—Apay ken Kasano?
15 Inapointaran ni Jehova ni David saan laeng a kas ulo ti pamiliana no di pay ket ti intero a nasion ti Israel. Kas ari, dakkel ti pannakabalin ni David. Adda gundaway a di umiso ti panangusarna iti autoridadna ket nakaaramid iti nadagsen a basol. (2 Sam. 11:14, 15) Ngem impakitana ti panagpasakupna ken Jehova idi inawatna ti disiplina. Inyebkasna ti linaon ti pusona ken Jehova iti kararag. Ken inkagumaanna ti agtulnog iti balakad ni Jehova. (Sal. 51:1-4) Kanayonanna, sipapakumbaba nga immawat iti nasayaat a balakad manipud kadagiti lallaki ken uray kadagiti babbai. (1 Sam. 19:11, 12; 25:32, 33) Nakasursuro ni David kadagiti kamalina ket pinagbalinna a kapatgan iti biagna ti panagserbi ken Jehova.
Usarem Dagiti Linteg ken Prinsipio ti Dios a Mangsanay iti Konsiensiam
7 Agyamantayo ta saanen a kasapulan a sagabaentayo dagiti epekto ti panangsukir kadagiti linteg ti Dios tapno makasursurotayo. Adda masursurotayo iti kamali ti dadduma a nairekord iti Sao ti Dios. Kuna ti Proverbio 1:5: “Ti masirib a tao umimdengto ken gumun-od iti ad-adu pay a pammilin.” Wen, kasayaatan dagiti instruksion nga aw-awatentayo iti Dios, kas no basaen ken utobentayo dagiti agpaypayso a salaysay ti Biblia. Kas pagarigan, panunotentayo ti saem a narikna ni Ari David idi sinukirna ti bilin ni Jehova ket nakikamalala ken Bat-seba. (2 Sam. 12:7-14) Bayat a basbasaen ken ut-utobentayo daytoy a salaysay, mabalin nga isaludsodtayo: ‘Kasano a naliklikan koma ni David ti saem a resulta ti pannakikamalalana ken Bat-seba? No maipasangoak iti kasta a sulisog, kabaelak kadi a labanan? Tumarayak kadi a kas ken Jose, wenno tumulokak a kas ken David?’ (Gen. 39:11-15) No pampanunotentayo dagiti dakes a resulta ti basol, bumileg ti determinasiontayo a ‘manggura iti dakes.’
Panagkali iti Naespirituan a Gameng
David
Ngem kumitkita idi ni Jehova ket imbutaktakna amin dayta a dakes nga aramid. No impalubos koma ni Jehova a ti natauan nga uk-ukom iti sidong ti Mosaiko a Linteg ti nangtaming iti kaso da David ken Bat-seba, agpada koma a napapatay dagitoy a managbasol, ket siempre, natay koma a naikanunong iti ina ti di pay naipasngay nga anak a bunga ti pannakikamalala. (De 5:18; 22:22) Nupay kasta, ni Jehova a mismo ti nangtaming iti kaso ket kinaasianna ni David gapu iti tulag iti Pagarian (2Sm 7:11-16), awan duadua a gapu ta nangipakita met idi ni David iti asi (1Sm 24:4-7; idiligyo ti San 2:13) ken gapu ta nakita ti Dios nga agbabbabawi dagiti nagbasol. (Sal 51:1-4) Ngem adda latta dusada. Babaen ti ngiwat ni mammadto Natan, insawang ni Jehova: “Adtoy mangpatanorak maibusor kenka iti didigra nga agtaud iti bukodmo a balay.”—2Sm 12:1-12.
HUNIO 20-26
GAMENG MANIPUD ITI SAO TI DIOS | 2 SAMUEL 13-14
“Nagresulta iti Trahedia ti Kinaagum ni Amnon”
it-1 42
Absalom
Pannakapapatay ni Amnon. Gapu iti kinapintas ti kabsat ni Absalom a ni Tamar nagduyos kenkuana ti in-inauna a kabsatna iti ama a ni Amnon. Naginsasakit ni Amnon ket impamuspusanna a maibaon ni Tamar iti pagnanaedanna tapno agluto maipaay kenkuana, ket kalpasanna pinuersana a ginundawayan ni Tamar. Ti dinederrep nga ayat ni Amnon nasuktan iti mangumsi a gura ket impaipanna ni Tamar iti kalsada. Bayat a rayray-aben ni Tamar ti nagayad a garitgaritan a kawesna a pagilasinan nga isu ket birhen nga anak ti ari ken adda dapdapo iti ulona isu ket nasabet ni Absalom. Insigida a natingitingna no ania ti napasamak ket ni Amnon ti imbagana a dagus nga atapenna, nga impasimudaagna a sakbay pay dayta ket ammonan ti naderrep a tarigagay ti kabsatna iti ama. Nupay kasta, binilin ni Absalom ti kabsatna a babai a saanen a mangibangon iti aniaman nga akusasion ket innalana iti pagtaenganna tapno idiay nga agnaed.—2Sm 13:1-20.
Patanoren ti Panagteppel
11 Pakdaarannatayo met dagiti karakter ti Biblia a saan a nakapagteppel no maipapan iti seksual nga aramid. Ipakita met dagita ti dakes a resulta ti kinaawan panagteppel. Nasayaat no utoben ti asinoman a maipaspasango iti kas iti situasion ni Kim ti napasamak iti ignorante nga agtutubo a mabasa iti kapitulo 7 ti Proverbio. Panunotenyo met ti inaramid ni Amnon ken ti dakes nga imbunga ti kababalinna. (2 Sam. 13:1, 2, 10-15, 28-32) Mabalin a matulongan dagiti nagannak ti annakda nga agteppel ken maaddaan iti sirib no maipapan iti pannakirelasion. Pagsasaritaanda dayta iti panagdaydayaw ti pamiliada, ket usarenda dagiti kadakdakamat a kapadasan iti Biblia.
Absalom
Naglabas ti dua a tawen. Dimteng ti tiempo ti panagpukis kadagiti karnero, maysa a naragsak nga okasion, ket nangyurnos ni Absalom iti padaya idiay Baal-hasor agarup 22 km (14 mi) iti amianan nga amianan-a-daya ti Jerusalem, nga inawisna ti annak ti ari ken ni David a mismo. Idi nagkitakit a dumar-ay ni amana, pinilit ni Absalom nga umanamong nga ibaonna ni Amnon, ti inaunana, kas sandina. (Pr 10:18) Iti padaya, idi nga ‘agragragsak ni Amnon maigapu iti arak,’ binilin ni Absalom dagiti adipenna a papatayenda. Ti dadduma nga annak nagsublida idiay Jerusalem, ket ni Absalom nagtalaw a napan iti Sirio nga apongna iti pagarian ti Gesur iti daya ti Baybay ti Galilea. (2Sm 13:23-38) Ti “kampilan” nga impadto ni mammadto Natan simrek itan iti “balay” ni David ket agtalinaed sadiay bayat ti natda a panagbiagna.—2Sm 12:10.
Panagkali iti Naespirituan a Gameng
Ti Kapatgan a Kita ti Kinapintas
Maisupadi iti dayta, usigem ni Absalom, a maysa kadagiti annak ni David. Nagbalin a di makaay-ayo a tao nupay naguapo. Kuna ti Biblia maipapan kenkuana: “Ita no maidilig ken Absalom awan idi ti lalaki a nakaliblibnos iti intero nga Israel tapno maidaydayaw iti kasta unay. Manipud dapan ti sakana agingga iti kuppokuppona isu awanan idi iti pilaw.” (2 Samuel 14:25) Nupay kasta, ti ambision ni Absalom ti nangtignay kenkuana nga umalsa ken amana ken mangagaw iti trono. Rinamesna pay dagiti kamalala ni amana. Nagbanaganna, nakapungtot ti Dios ken ni Absalom isu a nagsagaba iti nasaem nga ipapatay.—2 Samuel 15:10-14; 16:13-22; 17:14; 18:9, 15.
Magustuam aya ni Absalom? Siempre saan. No usigem, dakes ti kababalinna. Ti naisangsangayan a kinaguapona ket saan a maibagay iti kinatangsit ken iti kinagulibna, saan met a nakalapped dayta iti pannakadadaelna. Iti kasumbangirna, addaan ti Biblia iti adu a pagarigan maipapan kadagiti masirib ken makaay-ayo a tattao uray awan ti naibaga maipapan iti pisikal a langada. Nabatad a ti makin-uneg a kinapintasda ti kapatgan.
HUNIO 27–HULIO 3
GAMENG MANIPUD ITI SAO TI DIOS | 2 SAMUEL 15-17
“Nagrebelde ni Absalom Gapu iti Kinapannakkel”
it-2 243
Manangyuna
Kaugalian dagiti taga Daya a dagiti tumataray mapanda iti sanguanan ti naarian a karuahe tapno isagana ken ipakaammoda ti iyaay ti ari ken kaaduanna a tapno isu badanganda. (1Sm 8:11) Ti kasta a naarian a kinatan-ok ti tinulad ni Absalom, ken kasta met ni Adonias idi agangay, tapno manayonan ti pannakaidayaw ti panagrebelde ti tunggal maysa kadakuada, ken tapno agparang a kasla adda iyaannugot iti kasta a panagrebelde. Ngarud, nangisaadda iti 50 a tumataray iti sanguanan dagiti mismo a karuaheda.—2Sm 15:1; 1Ar 1:5; kitaenyo ti TUMATARAY.
Agserbika iti Dios ti Wayawaya
5 Naglaon ti Biblia iti adu a pagarigan dagiti tattao a dakes ti impluensiada. Maysa kadakuada ni Absalom nga anak ni Ari David. Nakatataer ni Absalom. Ngem idi agangay, kas ken Satanas, binay-anna a tumanor iti pusona ti kinaagum, ta in-inut nga inagawna ti kinaari ni amana uray no saan nga isu ti agtawid iti trono. Nagpammarang a maseknan kadagiti padana nga Israelita ken imparipiripna a saan kano a maseknan ti ari kadakuada. Wen, kas inaramid idi ti Diablo iti hardin ti Eden, nagpammarang a nakasaysayaat ni Absalom ket pinadakesna ti mismo nga amana.—2 Sam. 15:1-5.
it-1 1003
Hebron
Sumagmamano a tawen kalpasanna, nagsubli idiay Hebron ti anak ni David a ni Absalom ket inyussuatna sadiay ti panangagawna iti kinaari ni amana ngem di nagballigi. (2Sm 15:7-10) Nalabit ti rason a pinili ni Absalom daytoy a siudad kas pangrugian ti kampaniana tapno maalana ti trono ket gapu ta agdindinamag ti Hebron iti pakasaritaan ken sigud a kabesera ti Juda, kasta met gapu ta ditoy a siudad ti nakayanakanna. Idi agangay, ti Hebron ket binangon manen ti apoko ni David a ni Ari Rehoboam. (2Cr 11:5-10) Kalpasan a ti Juda ket pinaglangalang dagiti taga Babilonia ken nagsublin dagiti destiero a Judio, dadduma kadagiti nagsubli a Judio ket nagnaedda idiay Hebron (Kiriat-arba).—Ne 11:25.
Panagkali iti Naespirituan a Gameng
Umiso Kadi nga Impormasion ti Ammom?
11 Kas indibidual, mabalin a mabiktimatayo met iti di kinahustisia gapu iti maiwarwaras a di kompleto nga impormasion maipapan kadatayo. Kitaentayo ti napasamak kada Ari David ken Mefiboset. Impakita ni David ti kinaparabur ken kinamanangngaasina ken Mefiboset babaen ti panangisublina kenkuana ti amin a daga ni lolona a Saul. (2 Sam. 9:6, 7) Ngem idi agangay, adda naidanon ken David a negatibo a report maipapan ken Mefiboset. Nagdesision ni David nga itedna iti sabali ti amin a daga ni Mefiboset a saanna man laeng a kinompirma ti nadamagna. (2 Sam. 16:1-4) Idi nakasaritana ni Mefiboset, nabigbigna ti kamalina ket insublina ti sumagmamano a daga ni Mefiboset. (2 Sam. 19:24-29) Ngem naliklikan koma daytoy a kinaawan hustisia no inammo ni David no husto ti naipadamag kenkuana imbes a sidadarasudos a nagdesision.