MAPASARDENGTAYO TI PANAGWARAS TI GURA

4 | Malabanam ti Gura iti Tulong ti Dios

Pannursuro ti Biblia:

“Ti bunga ti espiritu ket ayat, rag-o, talna, kinaanus, kinaimbag, kinasayaat, pammati, kinaalumamay, panagteppel.”—GALACIA 5:22, 23.

Ti Kaipapananna:

Posible a mapasardeng ti panagwaras ti gura iti tulong ti Dios. Matulongannatayo ti nasantuan nga espiritu tapno maipakitatayo dagiti kababalin a posible laeng a maadda kadatayo iti tulong ti Dios. Isu nga imbes a labanantayo ti gura a bukbukodtayo, nasaysayaat no agdependetayo iti tulong ti Dios. No aramidentayo dayta, mariknatayo met ti napadasan ni apostol Pablo. Insuratna: “Ta adda pigsak a mangsango iti amin a banag gapu iti daydiay mangpabpabileg kaniak.” (Filipos 4:13) No kasta, maibagatayo: “Aggapu ken Jehova ti tulong para kaniak.”—Salmo 121:2.

Ti Maaramidam:

“Bayolenteak idi ngem binalbaliwannak ni Jehova, isu a mannakikappiaak itan.”—WALDO

Ipakaasim ken Jehova a tulongannaka babaen ti nasantuan nga espirituna. (Lucas 11:13) Dawatem kenkuana a tulongannaka a mangipakita kadagiti nasayaat a kababalin. Adalem ti ibagbaga ti Biblia maipapan kadagiti kababalin a mangikkat iti gura, kas iti ayat, talna, kinaanus, ken panagteppel. Mangkitaka kadagiti pamay-an a maipakitam dagita a kababalin iti biagmo. Makikaduaka kadagiti mangipakpakita kadagiti kasta a kababalin ta matignaydaka a “mangipakita iti ayat ken nasayaat nga ar-aramid.”—Hebreo 10:24.

Kapadasan—WALDO

Nalabananna ti Nakaro a Gura

Adu ti nasaksian ni Waldo a kinaranggas bayat ti kinaubingna isu a napnapno ti pusona iti gura. Inyestoriana: “Kanayonak a makilaban iti kalsada kadagiti aglaklako iti droga . . . Naminsan, nangtangdan ti kalabanmi a gang iti lalaki a pagaammo a mammapatay tapno patayennak. Nabagsolnak ngem nakalibasak.”

Saan a naragsakan ni Waldo idi nakipagadal ni baketna iti Biblia kadagiti Saksi ni Jehova. Imbagana: “Kagurgurak idi dagiti Saksi ken namin-adu a pinagsasawak ida. Ngem nasayaat latta ti impakitada kaniak.”

Di nagbayag, nakipagadal met ni Waldo iti Biblia. Imbagana: “Marigatanak a mangyaplikar iti maad-adalko. Panagkunak, kasla imposible a makontrolko ti pungtotko.” Ngem adda naadalna iti Biblia a nakatulong kenkuana nga agbalbaliw.

Inyestoriana: “Maysa nga aldaw, impabasa ti mangyad-adal kaniak iti Biblia a ni Alejandro ti Galacia 5:22, 23. . . . Inlawlawag ni Alejandro a tapno maaddaanak kadagita a kababalin, saanak nga agdepende iti bagik no di ket iti nasantuan nga espiritu ti Dios. Naan-anay a binalbaliwan dayta a kinapudno ti kapanunotak.”

Iti tulong ti Dios, nakaya ni Waldo nga ikkaten ti gura iti biagna. Imbagana: “Nasdaaw dagiti kakabagiak ken dati a gagayyemko iti dakkel a nagbalbaliwak.” Innayonna: “Bayolenteak idi ngem binalbaliwannak ni Jehova, isu a mannakikappiaak itan.”