Inton Amin a Maladaga Nasalun-atdanton

MAYSA a krimen ti panangabog a panangparuar ti maysa a tao manipud tolda ken supot a pagturoganna iti nakalamlam-ek a rabii idiay Arctico, nga isut’ paganduren kadagiti elemento iti nakaing-ingpis laeng a kamiseta ken karsonsiliona. Umarngi iti dayta, maysa met a krimen a ti maysa a maladaga ti maiparuar a di nadanonan manipud iti nabara, makasalaknib a lugarna iti matris sakbay nga isut’ sisasaganan a sumango iti makinruar a lubong. Ngem asino wenno ania ti responsable iti daytoy nagdakes unay a krimen?

Sigurado a dagiti nagannak saanda a gagaraen nga aramiden ti kasta a pakarigatan dagiti babassit nga annakda. Kinaagpaysuanna, saan a kabaelan ti ina a pasardengen ti panagpasikalna no daytat’ mangrugin, no daytat’ mapasamaken iti nadanonan a tiempo ti ubing wenno sakbayna. Uray dagiti eksperto a medikal saanda a maaw-awatan a naan-anay no aniat’ mangiparugi ti pasikal, di nadanonan wenno naan-anayen ti tiempona. Ti pagaammon, nupay kasta, ket adda nagdakes unay a mapasamak sagpaminsan, ket maiduron ti ubing iti lubong a saanna pay nakasaganaan a pagbiagan.

No apay a mapagpagteng daytoy ti nailawlawag idiay Biblia. Ti napaltiingan a salmista nagsurat: “Adtoy! Naiyanakak iti kinadakes, ket iti basol impasngaynak ni inak.” (Salmo 51:5) Maysa nga umaalsa nga espiritu a parsua ti nangallukoy iti immuna a pagassawaan a tao nga umalsa iti Dios, ket gapu itoy nagbalinda a managbasol. Naikapisda iti tanda ti maiyanatup a panagtulnog iti Namarsuada. Gapuna, amin nga annakda naiyanakda iti basol, wenno kinaimperpekto. (Roma 5:12) Ti bungana ket isuda ti sakit ken ipapatay, agraman dagiti nadumaduma a di umiso a panagandar ti bagi, agraman ti sistema ti panagpaaduda a no maminsan isut’ mangiduron iti ruar iti nagpateg a bungana a di nadanonan.

Lubong nga Awanton dagiti ‘Preemies’

No koma nasalimetmetan dagiti tattao ti kinaperpekto, awan koma dagiti maladaga a maiyanak sakbay ti tiempoda a sumango kadagiti kalamidad a maipaspasango kadagiti preemies itatta. Ket dandanin umay ti tiempo inton ti ina kaanoman dinton agpasngay a di nadanonan ti tiempona. Ti napaltiingan a mammadto Isaias ti nagsurat maipapan iti dayta a tiempo, a mangipapaay kadatayo iti kari ti naayat a Namarsuatayo: “Mamarsuaak kadagiti baro a langlangit ken baro a daga, ket ti napalabas dinton malaglagipen, ket dinto met umayen iti pampanunot ti tao.”​—Isaias 65:17, The Jerusalem Bible.

Ti padto ti Biblia idiay Isaias ituloyna nga ibaga ti maipapan kadagiti makaparagsak a kasasaad nga agrairanton idiay baro a lubong ti Dios, a kunkunana: “Ket dinto mangngegen kenkuana ti timek ti sangit wenno ti timek ti aganug-og; kenkuana, awanto metten ti masarakan a maladaga nga agbiag laeng ti sumagmamano nga aldaw . . . Didanto agtrabaho iti ubbaw wenno agipasngay ti ubbing a maipaay iti didigra, ta isudanto ti maysa a rasa a binendisionan ni Yahweh, ken kasta met dagiti annakda.”​—Isaias 65:19-24, JB.

Anian ti kinagrandento dayta inton amin a natauan a panagsagsagaba ken panagdukdukot ket dinton malaglagip, inton nikaanoman awanton ti pannakasapul ti nalabes a medikal a pamuspusan ken dagiti intensive care units a mangpadpadas a mangsalimetmet a sibibiag kadagiti maladaga a naiyanak a di nadanonan! Gapu ta ti natauan a kinaimperpekto maawanton babaen iti grande a sagana ti subbot ti naindaklan a Diostayo, nikaanoman dinton maiduron ti maysa a maladaga manipud aanakan sakbay nga isut’ sisasagana a naan-anayen a mangtagiragsak iti biag iti inggat’ inggana.​—Apocalipsis 21:3, 4.

[Kahon iti panid 11]

Magun-odanyo ti Pudpudno a Liwliwa

◆ No matay ti anakyo, padasenyo nga awaten ti tulong ken pammaregta manipud gagayyem ken kakabagianyo. Nalabit dagidiay nakapukaw met kadagiti annakda ket makatulong a mangliwliwa kadakayo.

◆ Mabalinyo ti mamati iti namnama ti panagungar, ngem dikay agdanag no dayta a pammati di makaiyeg ti insigida a liwliwa. Inton ti panawen mangrugin a paimbagenna dagita a sugat, awan duadua, maapresiaryonton ti namnama ti pannakakita manen iti inay-ayatyo.​—Isaias 25:8; 65:23; Juan 5:28, 29; 1 Corinto 15:25, 26.

◆ Padpadasenyo ti agpannuray ken Jehova, “ti Dios ti amin a liwliwa.” (2 Corinto 1:3) Isu Daydiay nangted ti pamay-an ‘a mangpukaw iti daydiay addaan pannakabalin ni patay, kayatna a sawen, ti Diablo.’​—Hebreo 2:14.

◆ No maysakay a gayyem ti maladingitan a nagannak, nasaysayaat no dikay ibagbaga a maaddaandanto manen ti sabali nga anak. Iti dayta a kanito, awan ti mabalin a mangsukat iti dayta nga ubing. Kasayaatan iti daytoy a kaso a “makipagsangitkayo kadagiti agsangit.” (Roma 12:15) Ti panangbigbigyo ti pukaw dagiti nagannak ken pannakipagladingityo ti mangyeg liwliwa kadakuada, ta ti pannakipagladingit ti mangpabassit iti dayta.

◆ Maiyanatup ken makatulong iti panangiyebkasyo ti ladingit, gapuna ikkanyo ti bagiyo ti panawen a saganaan dagiti rikna ti ladingit ken pukaw. (Kitaenyo ti “Agriingkayo!” nga Oktubre 22, 1985, “No ti Inay-ayatyo Matay,” ken ti Agosto 8, 1987, “Panangsaranget ti Ipupusay iti Anak.”)