Agpataray ti Nabessag a Kabalio
NI MAMMADTO a Juan pinaltiingan ti Dios a mangipadto iti maysa a tiempo inton nasaknapto ti epidemia ti sakit iti intero a daga kas ti umay dumarop a nabessag a kabalio a ti nakasakay iti dayta isu ni patay. (Apocalipsis 6:8) Ti nakaskasdaaw a panagsaknap ti AIDS ket ad-adda pay a nakalkaldaang a pammaneknek nga agbibiagtayon iti dayta a tiempo. Kinapudnona, dagiti opisiales iti Siudad ti Nueva York dineskribirda ti nakaparpartak nga iyaadu ti AIDS kas “ti umay nga epidemia.”
Idiay Thailand, 70 kadagiti 73 a probinsia ti addaanen iti virus ti AIDS. Idi laeng 1987 1 porsiento laeng kadagiti managusar iti droga iti Bangkok ti addaan iti AIDS; idi agtengnga ti 1989 nasuroken a 40 porsiento ti addaan iti dayta. Inanamaen ti Brazil ti 75,000 a naresita a kaso iti AIDS iti uneg ti tallo a tawen, a 1.5 milion a dadduma pay ti maimpektaran. Kadagiti 1,200 a banko ti dara, 20 porsiento laeng ti nasagat ti suplayda a dara idi 1988, ket 14 porsiento kadagiti agsagsagaba iti AIDS ti nakaala ti sakit manipud kadagiti namulitan a dara. Idiay Rio de Janeiro ken São Paulo, agarup 75 porsiento kadagiti hemophiliacs ti naimpektaran. Idiay Côte d’Ivoire, agingga iti 10 porsiento kadagiti masikog a babbai ken 10 porsiento kadagiti agidonar ti dara ti addaan ti AIDS.
Maysa nga opisial ti medisina nga Americano iti 87-nasion a gimong maipapan iti AIDS ti nagkuna: “Ti epidemia iti impeksion iti HIV [ti virus ti AIDS] ket din matimbeng idiay Estados Unidos ken iti lubong.” Ti U.S. Centers for Disease Control pattapattaenna nga inton 1998 maysa milion nga Americano ti nakaronton ti sakitda, ket umad-adu pay ti maaddaan iti virus. Ti pattapatta maipapan iti bilang dagiti addaanen iti virus ket di pay nabayag a nabaliwan a nagpangato iti kasta unay. Idiay siudad ti Nueva York, ti AIDS isu itan ti maikatlo a kangrunaan a makagapu iti ipapatay, a lab-awan laeng ti sakit ti puso ken ti kanser.
Dagiti banko ti dara naidarumda a mangipapaay iti namulitan iti AIDS a dara a maipaay iti panangyalison. Sumagmamano ti nabilin nga agbayad kadagiti daños. Dagitoy mabalin a sanguenda ti ad-adu pay a darum. Insennaay ti kangrunaan nga abogado iti American Association of Blood Banks: “Anianto ti ipaay ti masanguanan? Diak ammo. Ti eksena ti kadadaksan a kaso isu dagiti sentro ti dara a mapukpukawen.”
Din agbayag, pudno nga agpatingganton dagiti amin a banko ti dara gapu ta umadanitayon iti panawen inton makitatayonton ti maysa a lubong nga awanen ti AIDS, maysa a lubong nga awan dagiti ospital, an-anayen, wenno ipapatay. Ni Juan, a nangdeskribir ti panagsakay ti nabessag a kabalio, impaltiingna met ti kari ti Dios a “maysa a baro a daga,” maysa a natauan a kagimongan nga awanan iti saplit a sakit. (Apocalipsis 21:1-4) Naganat ti panangipategtayo iti dayta a kari itan, ta kabayatanna agtultuloy ti panagsakay ti nabessag a kabalio.