Ti Maysa a Kudu Pabainanna Dagiti Leon
ITAY napan a tawen idiay Sud Africa, maysa a dakkel nga antelope—maysa a kalakian a kudu—ket nagtakder iti sanguanan ti maysa a nalatak a hotel resort iti maysa a game lodge idiay Lowveld. Nasiput ken dumarup ti itsurana, isu a gagangay laeng a nakarikna iti pannakatagibassit ti sabali pay a kalakian a kudu iti daytoy a pannakaasak ti teritoriana. Impadamag ti maysa a nakaimatang iti idadarup ti lider dagiti kudu: “Nagbang-es, nagtabbuga sa impadlawnan a dumarup. Insangdona dagiti sarana. Idi nasangdonan ti kalakian a kudu, buyogen panagamak a nasdaaw ti lider dagiti kudu iti dayta a lugar.” Saan a naggargaraw ti kalakian a kudu. Simmangdo manen ti lider dagiti kudu iti dayta a lugar. Saan latta a bimmales ti sinangdona. Sipupungtot ken umarimpadek a “tinumba [ti lider dagiti kudu iti dayta a lugar] amin a kayo iti aglawlaw sakbay a pimmanaw.” Saanen a nagsubli, nalabit impagarupna a dina maartapan ti kassangpet a kalakian a kudu.
Kasta met laeng ti napasamak kadagiti ari ti kabakiran. Impadamag ti ranger a ni Carlson Mathebula nga inalikubkob ti 12 a leon dayta a kudu. Kinunana iti panangdarupda iti dayta: “Kellaat a dinarup ti dua a kabáyan. Ngumerngernger a linuguban ti maysa sa linengnges ti sabali pay. . . . Nabutnganda a natnag ken di nakabangon. Dimmarup ti sabali pay a kabáyan. Dinarupna ti kudu ken sipipigsa a kinidagna dagiti saka nga inkagumaanna a tumbaen, ngem nakatakder latta sadiay.” Nakapungtot unay dagiti 12 a leon iti pannakapaayda a mangtumba iti daytoy a kudu isu a “dinadaelda ti maysa a kalasugan, kagawaan a pangsibug iti hardin ken muebles iti ruar sakbay a pimmanawda a nabainan.”
Babaen ti panagtalinaedna a nakatakder, napapanaw ti kudu ti lider dagiti kudu iti dayta a lugar ken dagiti leon. Kinuna ti maysa a padamag iti Sunday Times ti Johannesburg, Sud Africa a dakkel unay a kalakian daytoy a kudu nga agdagsen iti 300 kilo ken naaramid iti suer. Imbaga ni Mr. Keith Calder, ti nangaramid iti suer a kudu: “Maragsakanak ta impagarup dagiti leon ken kudu nga agpaypayso dayta.”