Nalagip Daytoy a Kudu
BABAEN TI KORESPONSAL TI AGRIINGKAYO! IDIAY SOUTH AFRICA
TI NATAER a kalakian a kudu, maysa nga antelope a nagpipintas ti nagkawikaw a sarana ken nagpaiduma a laplapayag, ket nganngani 150 a sentimetro ti katayagna manipud abaga no nataenganen. Ti kabaian, nupay kadawyan nga awanan iti sara, ket mailasin met babaen iti dadakkel a lapayagna. Managbabain nga animal ti kudu, a kanayon nga alerto ken nakasagana nga aglibas tapno agsapul iti pagkamanganna. Isu gayam a naisangsangayan ti napasamak ken ni Karen idiay Zimbabwe.
Kas naipadamag iti magasin nga African Wildlife, maysa nga urbon a kabaian a kudu, a nasarakan a naisagud iti alad a barut, ti naispal ken naited ken Karen, a nangtaraken iti dayta babaen iti biberon, iti sumagmamano a lawas. Kimmaradkad ken nagtalinaed iti aglawlaw ti pagpagatasan a pagnanaedan ni Karen ken ti pamiliana, a masansan a makiay-ayam kadagiti ubbing ken aso. Nupay kasta, in-inut a mapan iti kasamekan ken pasaray agsubli, ket idi nganngani a nataenganen, din um-umay idiay pagpagatasan.
Agarup dua a tawen kalpasanna, bayat nga agmanmaneho iti kalsada ti pagpagatasan, nasdaaw ni Karen ta saan a naglisi ti maysa a masikog a kudu bayat a sumungsungad ti kotsena. Saan met a pimmanaw idi inasitganna. Iti daytoy a tiempo, ammonan a daytoy daydi ayup a tinarakenna babaen iti biberon, isu a siaalumamay a nakisao bayat a siaannad nga inasitganna. Isut’ nabigbig met ti kudu, ta indumogna ti ulona ken immungngo bayat nga impalubosna nga arakupen ni Karen!
Sumagmamano a bulan kalpasanna, adda manen ti kudu iti igid ti kalsada—nga addaanen iti tagibi. Panagrikna ni Karen ket pagpannakkel nga iyam-ammo ti ina ti urbonna, sa impalubosna ti bagina a maaprosan manen. Kasta manen ti napasamak kalpasan ti sumagmamano a lawas ta agparang a ti kudu kaslattay aktual nga ur-urayenna ni Karen.
Sumagmamano manen a bulan ti naglabas, ket impadamag ti dadduma kadagiti trabahador iti pagpagatasan a nakitada ti isu met la a kudu a nasiluan ti tengngedna. Inkagumaanda nga asitgan ti kudo tapno ikkaten ti silo, ngem nagtaray ti kudu. Isu a sinapul ni Karen iti kasamekan, nga agkaraayab bayat a sapsapulenna. Di nagbayag, limmagto iti sanguananna. Nalagip ni Karen nga intugotan iti sumagmamano a tinapay, a pagay-ayat idi ti kudu, ket bayat a naidiaya ti taraon, pinuted ti lakay ni Karen ti makadangran a silo.
Nangyeg iti kasta unay a ragsak iti daytoy a pamilia ti singgalut ti tao ken ayup a nagpaut iti nabayag.