Manipud Managbasatayo

Manangsaranay a Nagannak Pagyamanan la unay kadagiti serye a “Nagannak​—Mangsaranaykayo!” (Agosto 8, 1994) Itay nabiit, inlawlawag ti prinsipal idiay pages-eskuelaan ti inaudi a balasangko ti maipapan iti nasayaat a komunikasion ti nagannak-mannursuro a kadua ti grupo dagiti nagannak. Impanko ti magasin iti prinsipal, ket dagus a binasana dayta. Dua lawas kalpasanna, inyawidannak ti balasangko iti binulan a periodiko ti eskuelaanda. Naimaldit manen ti paset ti artikulo maipapan iti nasayaat a komunikasion tapno magunggonaan ti intero a komunidad manipud iti impormasion.

W. B., Estados Unidos

Dagiti Wholphin Tinagiragsakko ti artikulo a “Balyena? Dolphin?​—Saan, Daytat’ Wholphin!” (Pebrero 22, 1994), maipapan iti mestiso a dolphin/balyena. Iti ud-udi inawaganyo daytoy iti “pannakasirpat iti nakaskasdaaw a kinanadumaduma dagiti parsua nga inaramid ti Dios iti panamarsuana.” Diak umanamong iti daytoy agsipud ta saan a napasamak ti panagasawa iti normal nga aglawlawda.

K. G., Estados Unidos

Dimi kayat a sawen a daydi a panagasawa ket normal wenno Dios ti makinggapuanan iti dayta. Nupay kasta, saan a mapadayawan ti tao iti kaadda ti kasta a nakaay-ayat a parsua. Rumsua laeng dagiti mestiso maigapu iti “posibilidad agpaay iti kinanadumaduma nga intukit ti Dios iti pinarsuana.” Isu a ti Dios ti padayawan ti artikulomi.​—ED.

Isports a Pagraragsakan Iti artikulo nga “Agimtuod Dagiti Agtutubo . . . Isports a Pagraragsakan​—Gundawayak Aya?,” nagsayaat ti panangpakdaaryo kadagiti agtutubo maipapan kadagiti posible a peggad ti bungee jumping. (Hulio 8, 1994) Awan pay makalawas kalpasan a nabasak dayta, impadamag ti British Broadcasting Corporation nga uppat nga agtutubo ti nagsagaba iti nakaro a pannakadangran ti mata maigapu iti bungee jumping. Pagyamanan iti nagsayaat a magasinyo.

D. F., Inglaterra

Pinagsalukagnak ti artikulo maipapan iti mangyasideg ken patay nga isports! Naminsan a kinalay-atko ti maysa a narangkis a teppang ket nasarakak ti bagik a din makaatras wenno makaabante. Agingga ita nga aldaw, uray la sumgarak no kasano ti kaasidegko idin ken patay. Ania koman a diak panangyalikaka iti biagko!

L. T., Estados Unidos

Inapresiarko unay ti artikulo. Iti pagnanaedak, makiraman dagiti ubbing iti adu kadagitoy nga isports a pagraragsakan. Kanayon nga awisendak a makiraman kadakuada. Ngem iti padamag iti TV, masansan a makitak dagiti report maipapan iti matmatay a tattao wenno grabet’ pannakadangranda kadagiti umasping a maipagarup a nakaay-ayat nga isports a yes-estoriada kaniak. Kalpasan a nabasak ti artikulo, naamirisko a di nainsiriban a pagpeggadek ti biagko nga inted kaniak ni Jehova a Dios, agpaay iti apagbiit laeng a pagraragsakan.

J. S., Estados Unidos

AIDS Nasurok a tallo a tawen a nagserbiak nga amin-tiempo a managebanghelio. Ita, diak kabaelanen. Addaanak iti AIDS. Pagyamanan iti sibabatad a panangilawlawagyo iti daytoy narikut a tema iti artikulo a “Panangtulong Kadagidiay Addaan iti AIDS.” (Marso 22, 1994) Naamirisko a napasnek ti pannakaseknanyo iti pagimbagan ti isuamin. Ngem, kasla adda naliwayanyo kadagiti paset ti artikulo a mangiparegta iti pannakipagrikna kadagiti agsagsagaba sa impamaysayo dagiti nadakamat a “nainkalintegan a panagannad.” Kaslattay nangted ti artikulo iti pambar tapno agbalin a di unay manangngaasi. Diak matukod ngem pampanunotek ti mapasamakto inton kumaro ti kasasaadko ken talaga a kasapulak ti ayat ken panangandingay dagiti kakabsatko. Agkitakitto aya ti dadduma a sumarungkar kaniak agsipud ta kaamakda ti maakaran iti virus?

M. N., Estados Unidos

Apresiarenmi dagitoy prangka a komento. Saanmi a panggep ti mangupay iti pannakaipaay ti panangandingay kadagiti biktima ti AIDS. Kinapudnona, kinunami: “Sigun iti agdama a kapanunotan, ti gagangay a pannakilangen dina yakar ti AIDS. . . . Saan a masapul nga agamak unay ti maysa a makipulapol kadagiti tattao nga addaan iti AIDS.” Makatulong dagiti naisingasing a panagannad iti sabsabali tapno mariknada a masalaknibanda bayat a makilangenda buyogen ti asi kadagiti biktima ti AIDS.​—ED.