Dagiti Tuleng Idaydayawda ni Jehova

BABAEN TI KORESPONSAL TI AGRIINGKAYO! IDIAY NIGERIA

ITI adun a tawen, nagrigat para kadagiti Saksi ni Jehova idiay Nigeria nga isuro ti Biblia iti minilion a tattao a tuleng. Bassit ngamin dagiti Saksi a makaammo nga agsenias. Ngem agbalbaliwen dayta. Umad-adun a Saksi ti nakasursuro nga agsenias ken mangaskasaba kadagiti tattao a tuleng. Ti kombension distrito dagiti Saksi ni Jehova a naangay idiay Nigeria nasurok a makatawenen ti napalabas ti kangrunaan nga addang itoy nga irarang-ay.

“Mariknam ti naragsak nga atmospera,” kinuna ti maysa a delegado iti dayta a kombension, idiay Ota, Nigeria. “Adda panagsiddaaw, panagamanga,” kinuna ti sabali pay. Aniat’ nakagutugotan dagita a rikna? Iti damo unay idiay Nigeria, naipatarus ti intero a programa iti panagsenias. Iti amin a 96 a naangay iti intero a pagilian kabayatan ti tawen, daytoy ti kakaisuna a kombension a nakaipatarusanna.

Karaman iti rinibu a timmabuno ti 43 a tuleng a delegado, a nagtugaw iti kannigid ti plataporma, iti makinsango a seksion. Naibitin iti ngatuenda ti dakkel a puraw a karatula a nasuratan iti nalabbaga a letra a mabasa, “Sign Language.” Naragsakan dagiti tuleng a delegado nga adda sadiay. Insurat ti maysa kadakuada: “Buyogen ti kasta unay a ragsak ken lulua a nagsuratak. ‘Nabiit’ pay a maup-upaykami bayat a naammuanmi dagiti naespirituan a probision para kadagiti tuleng a padami a Kristiano iti dadduma a lugar. Dimi impagarup a dumteng met la gayam ditoy dagiti umasping a bendision.”

Asino Dagiti Timmabuno?

Naggapu iti amin a paset ti Nigeria dagiti tattao a tuleng. Maysa a tuleng a Saksi ti nangikuyog iti tallo kadagiti tuleng nga iyad-adalanna iti Biblia. Pito a bulan a nagurnong ti sabali pay a grupo dagiti tuleng iti pagpleteda, a nagbiahe iti 700 a kilometro nga agpapan. Nupay kasta, idi tiempon ti panagbiaheda, dida makaarkila iti lugan manipud iti kompania ti lugan a kukua ti gobierno gapu ta piesta opisial. Idi naammuan ti gobierno ti parikutda, inikkanda ida iti 13,000 a naira ($152, E.U.) kas tulong iti sabali a paglugananda!

Nagbiahe dagiti pamilia nga addaan umel nga annak tapno tabunuan daytoy a naisangsangayan a kombension. Nadamag ti maysa a babai a taga away maipapan iti kombension ket immay a kaduana ti tuleng a barona. Dida ammo nga agina ti agsenias. Tangay nakaluada a naibuyog iti nakitada, determinadodan nga adalen ti panagsenias.

Kadagiti rinibu a timmabuno, dadduma ti naggapu iti ginasut a kilometro tapno kitaen laeng no kasano a “makangngeg” dagiti tuleng iti programa. Ti timmabuno iti Domingo ket 13,936​—ti kangatuan pay laeng a bilang iti aniaman kadagiti 96 a kombension distrito iti Nigeria. Naragsakan dagiti tuleng a delegado nga agbalin a paset dayta nga umariwekwek.

Nasdaaw Dagiti Nakakita

Adu kadagiti tuleng ti “nakangngeg” iti naimbag a damag iti panagsenias iti damo unay a gundaway. Ket dagidiay a nakangngeg ti nakakita iti panagsenias iti damo unay a gundaway. Kinuna ti maysa a delegado a nasdaaw a nakakita iti pannakaipatarus amin a programa​—dagiti kanta, kararag, pakaammo, ken uray ti drama! “Talaga a nakaskasdaaw unay,” kinuna pay ti sabali.

Nagminar ti rag-o dagiti tuleng a delegado iti panagkantada. Sigaganaygay nga inusarda dagiti imada nga agdayaw ken ni Jehova. Kadagiti makangngeg, makapikapik unay a kapadasan ti panangbuya iti “panagkanta” dagiti tuleng. Adut’ nakalua. Maysa a delegado ti nangngegan a nagkuna iti “O Jehova!” iti mangapresiar a panagamanga. Idi nagngudon ti maysa a kanta, sangsangkamaysa a nagpalakpak dagidiay nagtugaw iti asideg ti seksion a pagseniasan.

Kalpasan ti palawag ti bautismo, bayat a nakatakder dagiti kandidato iti bautismo, maysa nga agkabannuag a lalaki iti seksion a pagseniasan ti timmakder met. Sumayangguseng ti panangapresiar ti tallaong idi inseniasna ti “wen” kas sungbat iti dua a saludsod nga inyimtuod ti nagpalawag.

Anian a rag-o dagiti delegado a tuleng a maam-ammo dagiti naespirituan a kakabsatda a lallaki ken babbai iti dadduma a paset ti pagilian! Dagiti takiag ken ramay ti nagtignay a sigaganaygay bayat a nagiinnammo dagiti tuleng. Nagadu ti nagiinnalamano ken nagsisinnukat iti direksion.

Siam nga agipatpatarus (para-senias) ti naggapu iti nadumaduma a paset ti pagilian. Nagpintas a buyaen bayat a dagiti ima ken takiagda ti singangayed a nagsenias iti amin a palawag ken kanta. Para kadagiti panagreggetda, nagunggonaanda iti arakup, alamano, ken komendasion. Naynay met a nayimtuod kadakuada ti: Kasanoyo a nasursuro? Kasano a makasursuroak? Addada kadi libro a mangisuro iti panagsenias?

Nalukatan ti Baro a Tay-ak

Para kadagiti tuleng, ti tampok ti kombension isu ti pannakairuar ti videotape iti panagsenias a bersion ti libro a Pannakaammo a Mangiturong iti Biag nga Agnanayon. Naidagadag iti adu a sursuruenda ti agsenias ket, babaen daytoy a katulongan iti panangisuro, kasabaanda dagiti tuleng iti intero a Nigeria. Pinaregta ti kombension ti adu a mangaramid iti kasta.

“Iti napalabas, no adda maam-ammomi a tuleng iti tay-ak ti ministerio, basta mapankamin iti sumaganad a balay,” kinuna ti maysa a kabsat a babai. “Ita, ammomin ti aramidenmi.” Iti napattapatta a lima a milion nga adda depekto ti panagdengngegda a taga Nigeria, talaga nga adu dagiti maikari. Kinuna ti maysa a kabsat: “Daytoy ti pangrugian. Ita, nasken a sukayenmi daytoy baro a tay-ak.”

Kadagiti bulan kalpasan ti kombension, kasta a talaga ti napasamak. Naaramid dagiti nagkaykaysa a panagregget a mangisuro iti kinapudno ti Sao ti Dios iti minilion idiay Nigeria nga adda depekto ti panagdengngegda. Masapul a maammuan met dagitoy ti naimbag a damag iti sumungsungad a baro a lubong iti sidong ti Pagarian ti Dios, a sadiay addanto namilagruan a pannakapaimbag ket “dagiti lapayag ti tuleng maluktandanto.”​—Isaias 35:5.