Kuentaem ti Magastos iti Iyaakar!
BABAEN TI KORESPONSAL TI AGRIINGKAYO! IDIAY SOUTH AFRICA
PANGPANGGEPEM kadi ti umakar iti sabali a pagilian? Kinuentam kadin ti magastos? Saan laeng a ti pinansial a gastos ti tuktukoyenmi. Ngamin, pampanunoten ti kaaduan a tattao ti umakar tapno nataltalged ti kabibiagda. Dagiti di pay makita a gastos nga agminarton kalpasan ti aktual nga iyaakar ti kayatmi a sawen. Kadayta a tiempo, naladawto unayen no agsublika pay laeng iti nakayanakam a pagilian. Dagiti sumaganad a punto ket saan a nairanta a mangpadanag kenka, no di ket napategda nga usigen:
“Kasapulan ti kinapakumbaba ken panagregget iti panagsursuro iti baro a pagsasao. Makapaupay para iti maysa nga adulto nga uray dagiti ubbing ti mangibilang kenkuana a karkarna agsipud ta dida maawatan. Dakkel a pakasuotan ti adu ti masansan a panagbiddut bayat a kanayon a makatkatawaan kadagiti pagkamalian. Nakalidliday ti biag dagiti ganggannaet a di makasao iti lokal a pagsasao.”—Rosemary, maysa a misionera idiay Japan.
Nalabit iti panagkunam ket umdasen ti ammom iti pagsasao tapno makaraoska. Ngem siguradoka kadi nga umdas ti ammo ti intero a pamiliam tapno naragsakda nga umakar?
Ti ngay epekto iti pamilia no dadduma a miembro ti maguyugoy nga umakar a maibusor iti pagayatanda? “Dadduma a babbai [manipud Mexico],” kuna ti pagiwarnak a Psychology of Women Quarterly, “ti di nakiraman iti panagdesision nga umakar ket pulos a dida kayat ti umakar, wenno agtalinaed idiay Estados Unidos kalpasan ti iyaakar.” Iti sidong ti kasta a kasasaad, ti mapilpilit nga iyaakar mabalin a dadaelenna ti panagkaykaysa ti pamilia. Ngem kasanon no ti asawa a lalaki laeng ti umakar?
Mapattapatta iti libro a Population, Migration, and Urbanization in Africa nga iti maysa a bassit a pagilian ti makin-abagatan nga Africa, nasurok a 50 porsiento “kadagiti adulto a lallaki ti saan nga agnanaed iti pagtaengan.” Daytoy a di panagtaeng ti mangpukaw iti kinakontento ken kinatibker ti pamilia. Mangipaay met ti posibilidad a matnag ti agassawa iti imoralidad. Anian a nasaysayaat no agtalinaed nga agkakadua ti pamilia, ikeddengda man ti umakar wenno saan! Ti panagkaykaysa ti pamilia ket maysa a banag a di magatang ti kuarta.
Sa, nagrigat a daeran ti panangidumduma. “Idi laeng dimtengak idiay Inglatera a natakuatak ti ‘kolor,’” malagip ti maysa nga immakar a taga India. “Nakaro dayta [a pannakaamiris]. Nasaem a pannakakellaat. Kayatkon ti agawid, tapno mapanawak amin dayta.”—The Un-melting Pot.
Isu a sakbay nga umakarka, iyimtuodmo iti bagim: ‘Ania dagiti pagpilian? Dikam kadi makaaramid kadagiti panagbalbaliw iti ilimi? Talaga kadi a makagunggona ti iyaakar iti sabali a pagilian?’ Mabalin a wen wenno mabalin a saan, ngem sakbay nga agdesisionka, usigem daytoy a naimbag a balakad ni Jesus: “Asino kadakayo a kayatna ti mangbangon ti maysa a torre ti saan nga agtugaw nga umuna ket patta-pattaenna ti magastos, tapno kitaenna no adda umanay a pangleppasna iti dayta?”—Lucas 14:28.