Manipud Managbasatayo

Panangilaksid Apresiarek ti artikulo a “Ti Panangmatmat ti Biblia: No Apay a Naayat nga Urnos ti Panangilaksid.” (Setiembre 8, 1996) Nailaksidak idi 1987 ken naisubli idi 1988, kalpasan a nakapagnakemakon. Daytoy a naayat nga urnos ti timmulong kaniak a mangbalbaliw iti estilo ti panagbiagko ken kakadua. Anian a bendision kadatayo ti kaadda ti organisasion a mangitantandudo kadagiti pagalagadan ti Biblia!

R. R., Estados Unidos

Nailaksidak met iti kongregasion. Ti panagriknak ket naulpit ken nagdakes daydi a banag a maaramid iti maysa a tao. Nagkamaliak! Sakbay ti panangilaksid, inkagumaandak dagiti panglakayen iti kongregasion a tulongan tapno agbabawiak. Ngem diak la ngamin inapresiar ti tulong kadaydi a tiempo. Ti panangilaksid ti namagpakumbaba unay kaniak. Tinignaynak a mangamiris no kasano kapateg ti relasiontayo ken ni Jehova.

B. T., Estados Unidos

Dagiti Katutubo nga Americano Pagyamanan iti serye a “Dagiti American Indian​—Aniat’ Masakbayanda?” (Setiembre 8, 1996) Kanayon nga interesadoak iti pakasaritaan dagiti Katutubo nga Americano. Naallukoyak manen iti kinaprangka, kinaawan panangidumduma, ken historikal a kinaumiso dagiti magasinyo.

A. M., Italia

Pulos nga awan makitayo a Katutubo nga Americano a mannursuro wenno abogado a maiparang iti makinsango nga akkub ti magasin. Kanayon nga iparparangyo dagiti kadaanan a ladawan, nga umasping iti makinsango a panid ti ruaryo. Ti kanayon a pannakausar dagitoy a ladawan ti manglapped kadagiti panagreggetmi a bumusor kadagiti stereotype.

K. M. T., Estados Unidos

Talaga a saanmi a panggep nga itandudo ti aniaman a makadangran nga stereotype. Nadisenio ti ladawan iti akkub tapno maiparang dagiti Katutubo nga Americano iti positibo ken nadayaw a pamay-an. Nausar dagiti nailian nga aruat tapno maibagay iti tema ken nalaka a mailasin dagiti managbasami iti intero a lubong. Makapainteres ta adu a managbasa a Katutubo nga Americano ti nangyebkas iti panangapresiarda agpadpada kadagiti artikulo ken ladawan. Kayat dagiti dadduma a taginayonen ti sumagmamano kadagiti kadaanan a wagas ken agaruat kadagiti tradisional a kawes iti sumagmamano nga okasion.​—ED.

Tangay agtartrabahoak iti museo kas maysa nga ethnologist a ti Amianan nga America ti nakaipamaysaak, interesadoak unay iti daytoy a tema. Mabalin kadi a patulodandak iti sangapulo a kopia daytoy a ruar, nga ibunongkonto iti dadduma nga interesado maipapan kadagiti American Indian?

P. B., Alemania

Patganmi a siraragsak daytoy a kiddaw.​—ED.

Sine ti nakaammuak iti bassit a pannakaammok maipapan kadagiti Indian. Maamirisko kadagitoy nga artikulo a saan nga imparang ti Hollywood ti kinapudno. Nagbalbaliwen ti panangmatmatko kadagiti Indian.

T. M., Estados Unidos

Adda bassit darak a Katutubo nga Americano, isu a naragsakanak a nangbasa iti daytoy a ruar. Nupay kasta, maikontra iti kaaduan nga opinion, ni Sitting Bull ket saan idi a lider iti dangadang idiay Little Bighorn.

P. H., Estados Unidos

Agparang a pagsusupiatan dagiti historiador no nakipaset a mismo wenno saan ni Sitting Bull iti dangadang. Ti panangmatmat nga agparang a patien ti kaaduan nga iskolar ket masarakan iti mapagraraeman a magasin a “Natural History,” a kunana: “Sigun kadagiti salaysay dagiti Indian, ni Sitting Bull, a no dadduma ket maipagarup idi a kabusor ni Custer iti dangadang, ket saan a nakipaset iti panaglalaban no di ket makumikom idi a mangaramid iti agas a mangpapigsa kadagiti mannakigubat nga Indian.” Mapadpadaanan pay laeng no malawlawaganto ti impormasion.​—ED.