Panangkidnap—Sangalubongan a Negosio
BAYAT ti napalabas a dekada, nakaskasdaaw ti panagraira ti panangkidnap iti intero a lubong. Kuna ti maysa a report nga iti nagbaetan ti 1968 ken 1982, gistay sangaribu ti nakautibo iti 73 a pagilian. Ngem idi arinunos ti dekada 1990, napattapatta a 20,000 agingga iti 30,000 a tattao ti nakidnap iti kada tawen.
Ti panangkidnap ket maysa a krimen a kasla uso kadagiti kriminal manipud Russia agingga iti Pilipinas, nga addaan kadagiti kidnaper a sisasagana a mangkidnap iti aniaman a sibibiag. Naminsan, nakidnap ti maysa a maladaga nga agarup maysa nga aldaw pay laeng a naipasngay. Idiay Guatemala, nakidnap ken nakautibo iti dua a bulan ti maysa a 84 anyos a baket a naka-wheelchair. Idiay Rio de Janeiro, dagiti butangero kidnapenda dagiti tattao iti mismo a lansangan, a kiddawenda no dadduma ti nagbassit a subbot a $100.
Uray dagiti animal kasla saanda a natalged. Adu a tawenen ti napalabas, sumagmamano a natured unay a kriminal idiay Thailand ti nangkidnap iti innem a tonelada a para-trabaho nga elepante ket kiniddawda ti subbot a $1,500. Naibaga a dagiti gang ti kriminal idiay Mexico paregtaenda dagiti agtutubo a miembroda nga agsanayda kadagiti taraken ken dinguen tapno maaddaanda iti umdas a kapadasan sakbay a mangkidnapda iti tao.
Iti napalabas, dagiti baknang ti nangnangruna a puntiria dagiti kidnaper, ngem nagbalbaliwen dagiti kasasaad. Kastoy ti impadamag ti Reuters: “Ti panangkidnap ket nagbalinen nga inaldaw a pasamak idiay Guatemala, a sadiay malaglagip ti tattao dagidi natalingenngen a tiempo idi dagiti radikal a rebelde biniktimada laeng ti sumagmamano a baknang a negosiante. Ita, baknang man wenno napanglaw, agtutubo wenno nataengan, biktimaenen dagiti grupo ti kidnaper.”
Dagiti nalatak a kaso ti nangnangruna nga ipablaak ti warnakan, ngem maareglo a di maipablaak ti kaaduan kadagiti panangkidnap. Kinapudnona, gapu iti adu a rason, “awan regget [dagiti pagilian] a mangibrodkas iti parikut a panangkidnap.” Usigen ti sumaganad nga artikulo ti adu kadagita a rason.
[Mapa iti panid 3]
(Para iti aktual a pannakaurnosna, kitaem ti publikasion)
MEXICO
Gapu iti agarup 2,000 a tattao a makidnap iti kada tawen, ti panangkidnap ket naawaganen a “maysa a bassit nga industria.”
GRAN BRITANIA
Immadu iti 50 a porsiento iti kada tawen ti insurance iti panangkidnap iti Lloyd’s of London nanipud 1990.
RUSSIA
Iti laengen rehion ti Caucasus iti makin-abagatan a Russia, ngimmato ti bilang dagidiay nakidnap manipud 272 idi 1996 agingga iti 1,500 idi 1998.
PILIPINAS
Sigun iti “Asiaweek,” “nalabit ti Pilipinas ti sentro ti panangkidnap iti Asia.” Nasurok nga 40 nga organisado a gang dagiti kidnaper ti agtigtignay ditoy.
BRAZIL
Iti maysa a tawen naipadamag a nakabirok dagiti kidnaper sadiay iti $1.2 bilion kadagiti pangsubbot a kuarta.
COLOMBIA
Kadagiti nabiit pay a tawen rinibu ti nakidnap iti kada tawen. Idi Mayo 1999, kinidnap dagiti rebelde ti sangagasut a pasurot bayat ti Misa.
[Credit Line]
Mountain High Maps® Copyright © 1997 Digital Wisdom, Inc.