Agimtuod Dagiti Agtutubo . . .

Kasano a Mapagbalinko nga Ad-adda a Makaparagsak ti Panagbasak iti Biblia?

“No dadduma, narigat a tarusan ti Biblia, isu a makapaupay dayta.”​—Annalieza, 17 anyos.

“Makapauma ti Biblia.”​—Kimberly, 22 anyos.

SAAN a magustuan ti adu a tattao ti agbasa iti aniaman. Isu nga uray kadagiti nasaet a managbasa, mabalin a nagrigat a basaen ti libro a kas iti kadakkel ti Biblia. “Para kaniak, napuskol a libro ti Biblia ken naglaon iti saan a pamiliar a sasao a narigat a maawatan,” kuna ti 17 anyos a ni Tammy. “Ti panagbasa iti Biblia kalikagumanna ti kasta unay a panangipamaysa iti panunot ken panaganus.”

Kanayonanna, mabalin nga adu nga oras ken pigsa ti busbosem kadagiti homework, trabaho iti balay, ken panagpalpaliwa. Gapu iti daytoy, narigat nga ipamaysa ti panunot ken tagiragsaken ti panagbasa iti Biblia. Iyes-eskediul met ti maysa kadagiti Saksi ni Jehova a ni Alicia ti panawenna nga agsagana ken tumabuno kadagiti Nakristianuan a gimong ken iranud dagiti patpatienna iti sabsabali. Admitirenna: “Narigat ti agbasa iti Biblia agsipud ta kasla nagadu dagiti masapul nga aramiden.”

Nupay kasta, napagballigian da Alicia, Tammy, ken ti adu pay a sabsabali nga agtutubo dagiti tubeng. Regular a basbasaenda itan ti Biblia ken maragsakanda a mangar-aramid iti dayta. Kabaelam met dayta! Usigem ti tallo a banag a maaramidam tapno mapagbalinmo nga ad-adda a makaparagsak ti panagbasam iti Biblia.

Mangyeskediulka iti Panawen nga Agbasa iti Biblia

“Panagkunak, makapauma kadagiti agtutubo ti panagbasa iti Biblia gapu ta awan ti umdas a panawenda a mangaramid iti dayta,” kuna ti 18 anyos a ni Kelly. No kasano a matagiragsakmo ti maysa nga isport wenno ay-ayam a masansan a pakipasetam, matagiragsakmonto met ti panagbasa iti Biblia no aramidem dayta a regular.

Ngem kasano ngay no nagbassit ti nawaya a tiempom? Kastoy ti ibalakad ni apostol Pablo: “Itultuloyyo ti agaluad a siiinget a ti pannagnayo saan a kas kadagiti nakuneng no di ket kas kadagiti masirib a tattao, a gatangenyo ti nainggundawayan a tiempo maipaay iti bagbagiyo, agsipud ta dagiti aldaw dakesda.” (Efeso 5:15, 16) Kabaelam a ‘gatangen ti tiempo’ no bassit la a tiempo ti busbosem kadagiti saan unay a napateg nga aktibidad a kas iti panagbuya iti TV. Ti termino nga inusar ni Pablo para iti “tiempo” mabalin a kaipapananna ti naituding a tiempo para iti espesipiko a panggep. Kaano ngata ti naituding a tiempom nga agbasa iti Biblia?

Adu ti agbasa iti Biblia iti agsapa, kalpasan nga inusigda ti maysa a Nainkasuratan a teksto ken dagiti komento iti bokleta a Panangsukimat Kadagiti Kasuratan iti Inaldaw.a Kaykayat met ti dadduma ti agbasa sakbay a maturogda no rabii. Mangpilika iti realistiko a tiempo a maitutop kenka, ken ibagaymo dayta sigun iti nadumaduma a kasasaad. Kuna ni Alicia: “Ti panangibagay ti talaga a tulbek iti panangtaginayonko iti regular nga eskediul iti panagbasa.”

Mangyeskediul ti dadduma a Kristiano nga agtutubo iti 10 agingga iti 15 a minuto iti kada aldaw nga agbasa iti Biblia. Babaen ti panangaramidda iti kasta, naungpotda a binasa ti intero a Biblia iti maysa wenno dua a tawen! Nupay saanmo a maaramidan dayta, pagbalinem a kalat ti agbasa iti sumagmamano a paset ti Biblia iti kada aldaw. No determinadoka a mangsurot iti naituding a tiempom nga agbasa iti Biblia, umuneg ti panagayatmo iti Sao ti Dios.​—Salmo 119:97; 1 Pedro 2:2.

Agkararagka Maipaay iti Sirib

Admitirentayo nga uray dagiti kanayon nga agbasbasa iti Biblia ket marigatan a manganag iti dadduma a paset ti Sao ti Dios. Kayat ti Autor ti Biblia a ni Jehova a Dios a maawatam ti Saona. Salaysayen ti libro nga Aramid ti maipapan iti maysa a biahero nga Etiope a dina unay maawatan idi ti padto iti Isaias kapitulo 53. Situtulok a nagpatulong dayta a lalaki, isu nga imbaon ti anghel ni Jehova ti misionero a ni Felipe tapno ilawlawagna ti padto kenkuana.​—Aramid 8:26-39.

No kasta, ti epektibo a panagbasa iti Biblia ket saan a mangrugi iti panagbasa no di ket babaen ti panagkararag. Sakbay a lukatan ti dadduma ti Bibliada, iyugalida ti agkararag nga umuna ken Jehova tapno agkiddawda iti sirib a mangtarus ken mangipapuso kadagiti maadalda a leksion iti basbasaenda. (2 Timoteo 2:7; Santiago 1:5) Mabalin pay ketdi nga ipalagip kenka ti espiritu ti Dios dagiti bersikulo iti Biblia a makatulong kenka a mangsungbat iti salsaludsod wenno mangdaer kadagiti pakasuotan.

Malagip ti maysa nga agtutubo a Kristiano a lalaki: “Idi 12 ti tawenko, pinanawan ni tatangko ti pamiliami. Maysa a rabii, nagkararagak iti iddak ket impakaasik ken ni Jehova a pagawidenna koman ni tatangko. Kalpasanna, innalak ti Biblia ket binasak ti Salmo 10:14: ‘Iti daydiay dakes ti kalak-amanna, ti awan amana nga ubing, italekna kenka [Jehova] ti bagina. Sika nagbalinka a katulonganna.’ Nagpanunotak iti apagbiit. Nariknak a kasla kasarsaritanak ni Jehova ken ipakpakaammona nga isu ti katulongak; isu ti Amak. Adda pay aya nasaysayaat nga ama ngem kenkuana?”

Mabalin kadi nga iyugalim ti agkararag kada agtugawka tapno agbasa iti Biblia? Isingasing ni Adrian: “Agkararagka sakbay nga agbasaka​—ken kasta met no kalpasanna​—tapno agpayso a makasaritam ni Jehova.” Ti naimpusuan a panagkararag ti mangpapigsa iti determinasionmo a mangitultuloy iti eskediulmo nga agbasa iti Biblia ken mangpabileg iti relasionmo iti Dios.​—Santiago 4:8.

Pagbalinem a Nabiag ti Panagbasam iti Biblia

Para iti nadakamat itay damo a ni Kimberly, makapauma ti agbasa iti Biblia. Pudno a nagbayagen a libro ti Biblia​—a naisurat sakbay pay a naimbento ti computer, telebision, wenno eroplano​—ket natayen dagiti karakter iti Biblia rinibun a tawen ti napalabas. Nupay kasta, insurat ni apostol Pablo: “Ti sao ti Dios nabiag ken adda bilegna.” (Hebreo 4:12) Kasano nga adda bileg dayta a kadaanan a libro?

Idi kaaldawan ti managkopia a ni Esdras, nagtataripnong ti rinibu a lallaki, babbai ken “dagiti amin nga umdas ti kinasariritna nga umimdeng” idiay Jerusalem tapno denggenda ti pannakaibasa ti Linteg ni Moises. Idi a tiempo, 1,000 a tawenen ti Linteg! Nupay kasta, ni Esdras ken ti kakaduana “intuloyda ti nagbasa a sipipigsa manipud iti libro, manipud iti linteg ti pudno a Dios, a naibinsabinsa dayta, ken adda panangipaay iti kaipapananna; ket intuloyda ti nangipaay iti pannakaawat iti panangbasa.” Idi inlawlawag dagitoy a lallaki dagiti Kasuratan ken pinagbalinda a nabiag ti panagbasada, ania ti imbungana? “Napan dagiti amin nga umili tapno mangan ken uminumda ken tapno mangipatulodda kadagiti bingay ken tapno itultuloyda ti dakkel a panagrag-o, ta naawatanda ti sasao a naipakaammo kadakuada.”​—Nehemias 8:1-12.

Kasano a ‘maipaaymo ti kaipapanan’ ti panagbasam iti Biblia? Ni Cathy, nga ibilangna a maysa a karit ti panagbasa, agbasa a sipipigsa tapno maisentrona ti atensionna. Padpadasen ni Nicki a panunoten nga adda isuna iti eksena ti salaysay. “Pampanunotek no ania ngata ti panagriknak iti dayta a situasion,” kunana. “Kanayon a paboritok nga estoria ti salaysay maipapan kada Ruth ken Noemi. Mabalin nga ulit-ulitek a basaen dayta. Idi immakarak iti baro a siudad, naliwliwaak iti daytoy nga estoria agsipud ta nariknak ti narikna ni Ruth idi napan iti ganggannaet a lugar ken awan a pulos ti am-ammona. Naamirisko no kasano ti panagtalekna ken Jehova, ket dayta a talaga ti nakatulong kaniak a mangaramid met iti kasta.”​—Ruth, kapitulo 1-4.

Tapno ‘adda bileg’ ti Biblia, kasapulan ti panagmennamenna. Kada agbasaka, iwayaam nga utoben dagiti teksto a mabasam ken amirisem no kasanom nga iyaplikar ti nasursurom. Mabalin a kayatmo ti agsukimat kadagiti katulongan iti panagadal iti Biblia nga impablaak dagiti Saksi ni Jehova tapno ad-adu ti masursurom iti panagbasam.b

Itultuloymo!

Saan a nalaka ti kanayon a panangsurot iti eskediul nga agbasa iti Biblia. Uray ti kasayaatan a programa iti panagbasa iti Biblia ket mabalin a nasken a balbaliwan iti nadumaduma a tiempo. Kasano a maitultuloymo ti kalatmo a mangbasa iti Biblia iti kada aldaw?

Makatulong ti gagayyemmo ken ti pamiliam. Kuna ti 15 anyos a ni Amber: “Kakuartok ti adingko a babai. Adda sumagmamano a rabii a nabannogak unay isu a kayatkon ti maturog, ngem ipalagip ni adingko nga agbasaak. Isu a diak pulos malipatan dayta!” No adda teksto wenno paset a makapainteres kenka, iranudmo dayta iti sabsabali. Daytoy ti mangpauneg iti panangapresiarmo iti Sao ti Dios ken mabalin a mangtukay iti interesda nga agbasa iti Biblia. (Roma 1:11, 12) No maliwayam a basaen ti Biblia iti maysa nga aldaw wenno nasursurok, saanka a maupay! Ituloymo a basaen ti nagsardengam, ket agbalinka a mas determinado a mangsurot iti eskediulmo.

Saanmo a liplipatan ti nagadu a pagimbagan ti inaldaw a panagbasa iti Biblia. No ipangagmo ni Jehova babaen ti Saona, matagiragsakmo ti nasinged a pannakirelasion kenkuana. Maawatamto dagiti panunot ken riknana. (Proverbio 2:1-5) Talaga a maysa a proteksion dagitoy a napateg a kinapudno manipud iti nailangitan nga Amatayo. “Kasanonto ti panangdalus ti maysa nga agtutubo a lalaki iti danana?” inyimtuod ti salmista. “Babaen ti panagaluadna maitunos iti saom.” (Salmo 119:9) Isu a rugiamon​—ken iyugalim​—ti agbasa iti Biblia. Mabalin a maamirismo nga ad-adda a makagunggona nga amang dayta ngem iti pagarupmo!

[Dagiti Footnote]

[Dagiti ladawan iti panid 24]

Ti panagkararag ken panagsukimat ti mangpasayaat iti panagbasam iti Biblia ken makatulong kenka a mangtarus iti kababagas dagiti Kasuratan

[Ladawan iti panid 25]

Agbalin a nabiag dagiti Kasuratan no panunotem nga addaka iti eksena ti salaysay