Ti Makaallilaw a Pangguyugoy Dagiti Patalastas
BABAEN ITI MANNURAT TI AGRIINGKAYO! IDIAY POLAND
Kunam la no nailansa dagiti mata ni Tomek iti telebision. Buybuyaenna a naimbag ti maysa a patalastas a mangal-allukoy kadagiti agbuybuya: “Inton isuot ti anakmo daytoy, agbalinto a napigsa, atletiko, ken magusgustuanto dagiti gagayyemna. Masapul a gatangem daytoy!” Nagtartaray ni Tomek ken ni tatangna, nga idaydayyengna ti samiweng a kangkangngegna. “Tatang, igatangannak man iti kasdiay!” kiniddawna.
◼ Apay a kayat dagiti ubbing ti maipatpatalastas? Inadaw ti Polako a magasin a Rewia ti panangilawlawag ti maysa nga edukador: “Kayatda met ti maaddaan kadagita agsipud ta dagita a banag ket ik-ikutanen ti dadduma. Dida kayat ti paudi kadagiti gagayyemda.” No agpakaasi, agsangit, ken agpauyo dagiti annakda, masansan a tumulok ti dadduma a nagannak isu a gatangenda ti produkto a kidkiddawen ti annakda.
Apay a makaallilaw unay ti patalastas a nairanta para kadagiti ubbing? Ti mensahe dayta ket “saan a naipamaysa iti presio, kalidad, wenno kinaepektibo ti produkto,” inlawlawag ti sikologo a ni Jolanta Wąs. Ti patalastas ket nadisenio a “mangtukay iti riknada a nasken a maaddaanda iti kasta.” Insurat ni Wąs: “Saan nga amirisen dagiti ubbing ti estoria a naisalaysay iti patalastas. . . . Dida idilig ti naammuanda iti dayta a patalastas iti aktual a mapaspasamak iti lubong.” Ken uray no ikagumaanda nga aramiden dayta, mabalin a limitado pay unay ti pannakaawatda a mangamiris a siuumiso iti dayta a produkto.
Kasano a masalaknibam ti anakmo iti makaallilaw a pangguyugoy dagiti patalastas? Umuna, “masapul a mangilatangka iti panawen a makaduam ti anakmo ken itultuloymo nga ilawlawag a ti kinapateg ti maysa a tao ket saan nga agpannuray iti etiketa ti sapatos [wenno kawes] nga usarenna,” kinuna ti Rewia. Isurom iti anakmo nga uray no awanan kadagiti kabaruanan nga ay-ayam, posible latta nga agbalin a naragsak bayat ti kinaubingna. Maikadua, masapul a sipapanunot a mismo dagiti nagannak no kasano a makaimpluensia dagiti patalastas kadagiti annakda. Ti napateg ket ditay “ipalubos a dagiti patalastas ti mangdiktar kadatayo no ania ti naimbag para kadagiti annaktayo,” insingasing ni Wąs.
Kamaudiananna, magunggonaan ti amin a nagannak iti balakad ti Biblia. Insurat ni apostol Juan: “Amin a banag iti lubong—ti derrep ti lasag ken ti derrep dagiti mata ken ti panangiparammag iti sanikua a pagbiag ti maysa—saan nga agtaud iti Ama, no di ket agtaud iti lubong.”—1 Juan 2:15, 16.
Dika kadi umanamong nga adu a patalastas ti mangtukay iti “derrep dagiti mata” ken mangtignay agpadpada kadagiti agtutubo ken natataengan a ‘mangiparammag iti sanikua a pagbiagda’? Makapainteres ta intuloy ni apostol Juan ti balakadna babaen ti panangisuratna: “Ti lubong aglabas ken kasta met ti tarigagayna, ngem ti agaramid iti pagayatan ti Dios agtalinaed iti agnanayon.”—1 Juan 2:17.
Dagiti nagannak a regular a mangbusbos iti tiempoda a makisarita iti annakda maipapan kadagiti makagunggona a topiko ket makaipasagepsep kadakuada kadagiti nadiosan a prinsipio ken nasayaat a pagalagadan. (Deuteronomio 6:5-7) Iti kasta, saanto a nalaka a maallukoy dagiti annakda kadagiti makaallilaw a patalastas daytoy a lubong a nadisenio a mangtignay kadakuada a mangpilit kadagiti nagannakda a gumatang kadagiti produkto.