Ti Panangmatmat ti Biblia

Naikeddeng Kadi a Nasaksakbay ti Masanguananyo?

Adu a tattao ti mamati a naikeddeng a nasaksakbay ti biag ken masanguananda babaen ti maysa a natantan-ok a mannakabalin. Patienda a manipud pannakayinaw agingga iti ipapatay, inkeddengen ti Dios ti pagtungpalanda. ‘Ngamin,’ kunada a ‘ti Dios ket mannakabalin-amin ken ammona ti amin, isu a sigurado nga ammona ti tunggal detalye maipapan iti napalabas, agdama, ken masanguanan.’

ANIA ti makunayo? Inkeddeng kadi ti Dios a nasaksakbay ti panagbiag ken pagtungpalantayo? Iti sabali a pannao, pudno kadi wenno arapaap laeng ti wayawaya nga agpili? Ania ti kuna ti Biblia?

Naan-anay Wenno Pilienna ti Ammuenna?

Nalawag nga ibaga ti Biblia a kabaelan ti Dios nga ammuen ti masanguanan. Ammona “manipud punganay . . . ti pagnguduan,” kuna ti Isaias 46:10. Nagusar pay kadagiti tattao a mangisurat iti adu a padto. (2 Pedro 1:21) Maysa pay, kanayon a pumayso dagita a padto gapu ta addaan ti Dios iti sirib ken pannakabalin a mangitungpal kadagita iti tunggal detalye. Gapuna, kabaelan ti Dios nga ammuen ken ikeddeng a nasaksakbay dagiti pasamak no pilienna nga aramiden dayta. Nupay kasta, nasaksakbay kadi nga inkeddeng ti Dios ti pagbanagan ti tunggal indibidual wenno uray ti dagup a bilang dagidiay maisalakan? Saan a kasta ti ibaga ti Biblia.

Sigun iti Biblia, pilien ti Dios no ania laeng dagiti pasamak nga ikeddengna a nasaksakbay. Kas pagarigan, impadto ti Dios nga adda “maysa a dakkel a bunggoy” dagiti nalinteg a tattao a makalasat iti pannakadadael dagiti nadangkes inton panungpalan ti agdama a sistema dagiti bambanag. (Apocalipsis 7:9, 14) Ngem imutektekanyo ta awan ti inted ti Dios nga espesipiko a bilang ti dakkel a bunggoy. Apay? Saanna nga inkeddeng a nasaksakbay ti pagtungpalan ti tunggal indibidual. Nayarig ti Dios kas maysa a naayat nga ama ti dakkel a pamilia. Ammona a dadduma kadagiti annakna ti mangsubad iti panagayatna, ngem saanna nga inkeddeng no manoda.

Pagdiligenyo ti panangusar ti Dios iti abilidadna a mangikeddeng a nasaksakbay kadagiti pasamak ken ti pamay-an a panangusarna iti pannakabalinna. Kas ti Mannakabalin-amin, naan-anay ti pannakabalin ti Dios. (Salmo 91:1; Isaias 40:26, 28) Ngem komporme kadi lattan ti pangusaranna iti pannakabalinna? Saan. Kas pagarigan, saanna nga inusar dayta maibusor iti Babilonia, ti kabusor ti nagkauna nga Israel, agingga a saan a dimteng ti umiso a tiempo. “Nangwatwatwatak iti panagteppel,” kuna ti Dios. (Isaias 42:14) Agaplikar met dayta a prinsipio iti panangusarna iti abilidadna a mangammo iti masanguanan ken mangikeddeng a nasaksakbay kadagiti pasamak. Iparparangarang ni Jehova ti panagteppel kas panangipakita iti panagraemna iti intedna kadatayo a wayawaya nga agpili.

Ti panangkontrol ti Dios iti pannakabalinna dina kayat a sawen nga imperpekto wenno adda limitasion ti Dios. Kinapudnona, dayta ti mangipadayag iti kinatan-okna, ken mangtignay kadatayo a mangipateg kenkuana. Ipakita ngamin dayta nga ipakpakatna ti kinasoberanona saan laeng a buyogen ti kinasirib ken pannakabalin no di ket buyogen pay ti ayat ken panagraem iti wayawaya nga agpili dagiti intelihente a parsuana.

Iti kasumbangirna, no ikeddeng ti Dios a nasaksakbay ti amin a bambanag, agraman ti tunggal nakaro nga aksidente ken dakes nga aramid, saan kadi a maitutop laeng a pabasolentayo ti Dios gapu iti amin a pakarigatan ken panagsagaba iti lubong? Gapuna, no sukimaten a naimbag ti sursuro a naikeddeng a nasaksakbay ti pagbanagan ti tao, saanna a padayawan ti Dios no di ket ibabainna. Iladawanna ti Dios kas nauyong, di nainkalintegan, ken saan a naayat—maisupadi a mismo iti kunaen ti Biblia maipapan kenkuana.—Deuteronomio 32:4.

Dakayo ti Agpili

Babaen iti adipenna a ni Moises, kinuna ti Dios iti nasion ti Israel: “Inkabilko ti biag ken patay iti sangom, . . . ket masapul a piliem ti biag . . . babaen ti panangayat ken Jehova a Diosmo, babaen ti panagimdeng iti timekna ken babaen ti panagtalinaed kenkuana; ta isu ti biagmo ken ti kaatiddog ti al-aldawmo.” (Deuteronomio 30:19, 20) Awan serserbina ken saan a naimpusuan dagita a sasao ti Dios no inkeddengna a nasaksakbay no asino kadagiti Israelita ti mangayat kenkuana ken makagun-od iti biag wenno no asino ti aglabsing ken mapapatay. Patienyo kadi a ti Dios a “managayat iti kinahustisia” ken mismo a personipikasion ti ayat ket agtignay iti kasta a di nainkalintegan a pamay-an?—Salmo 37:28; 1 Juan 4:8.

Ad-adda nga agaplikar kadatayo ita ti kalikagum ti Dios kadagiti adipenna a pilienda ti biag gapu ta ti pannakatungpal ti padto ti Biblia ipakitana nga umas-asidegtayon iti panungpalan ti agdama a sistema dagiti bambanag. (Mateo 24:3-9; 2 Timoteo 3:1-5) Kasano a mapilitayo ti biag? Mapilitayo dayta no tuladentayo ti inaramid dagiti nagkauna nga Israelita.

Kasano a ‘Mapiliyo ti Biag’?

Mapilitayo ti biag babaen ti “panangayat ken Jehova,” babaen ti “panagimdeng iti timekna,” ken babaen ti “panagtalinaed kenkuana.” Ngem maaramidtayo laeng dagitoy no am-ammotayo ti Dios kas persona ken matarusantayo dagiti kalikagumanna kadatayo. Inkararag ni Jesu-Kristo iti Dios: “Daytoy ti biag nga agnanayon: a maammoandaca coma a maymaysa a pudno a Dios, ken ni Jesu-Cristo nga imbaonmo.”—Dakami ti nangitaliko; Juan 17:3, Ti Biblia, PBS.

Masarakan dayta a napateg a pannakaammo iti pinanid ti Nasantuan a Biblia, a siuumiso a maawagan iti Sao ti Dios. (Juan 17:17; 2 Timoteo 3:16) Kinapudnona, daytoy a naespirituan a sagut ket nalawag a pammaneknek a saan nga inkeddeng ti Dios a nasaksakbay ti masanguanantayo no di ket kayatna a mangaramidtayo kadagiti nainsiriban a pangngeddeng a naibatay kadagiti intedna nga impormasion.—Isaias 48:17, 18.

Babaen ti Biblia, arigna nga ibagbaga kadatayo ti Dios: ‘Daytoy ti panggepko iti sangatauan ken iti daga, ken daytoy ti rumbeng nga aramidenyo tapno magun-odyo ti agnanayon a biag. Dakayo ti mangeddeng no imdengandak wenno saan.’ Wen, anian a naan-anay ti kinatimbeng ti panangusar ti Dios iti abilidadna a mangikeddeng a nasaksakbay kadagiti pasamak ken iti panangikabilanganna iti wayawayatayo nga agpili! Pilienyo kadi ti biag ‘babaen ti panagimdeng iti timek ti Dios ken babaen ti panagtalinaed kenkuana’?

NAPANUNOTYO KADIN?

◼ Kasano nga us-usaren ti Dios ti abilidadna a mangammo iti masanguanan? —Deuteronomio 30:19, 20; Isaias 46:10.

◼ Apay a saan nga ikeddeng ti Dios a nasaksakbay ti amin a banag, agraman dagiti dakes a mapasamak kadagiti tattao?—Deuteronomio 32:4.

◼ Ania ti naan-anay a pagpannurayan ti masanguanantayo?—Juan 17:3.

[Blurb iti panid 13]

Sigun iti Biblia, pilien ti Dios no ania laeng dagiti pasamak nga ikeddengna a nasaksakbay