HAGRITA

[mabalin a, Ken (Kukua ni) Agar].

Nalawag nga agpaspastor a tattao nga agnanaed kadagiti tolda iti daya ti Galaad. Idi kaaldawan ni Ari Saul, dagiti Israelita nga agnanaed iti daya ti Jordan inabakda dagiti Hagrita, nga innalada ti 100,000 kas kautibo, kasta met ti rinibu a kamelio, asno, ken karnero. (1Cr 5:10, 18-22) Ti salmista inlanadna dagiti Hagrita a karaman iti dadduma pay a kabusor ti Israel, kas kadagiti Edomita, Moabita, Ammonita, ken Amalekita. (Sal 83:2-7) Nupay kasta, bayat ti panagturay ni David, ni Jaziz a Hagrita ti agay-aywan idi kadagiti arban ti ari.​—1Cr 27:31.

Patien ti adu nga eskolar a dagiti Hagrita nalabit isuda met laeng dagiti A·graiʹoi a dinakamat dagiti kadaanan a geograpo a da Strabo, Ptolemy, ken Pliny. Saan a masigurado no kaputotan ida ni Agar.