PANAGPANNAKKEL

Aglablabes a panangipateg iti bagi; di nainkalintegan a pannakarikna iti kinatan-ok no maipapan iti ik-ikutan a saguday, pintas, kinabaknang, saad, ken dadduma pay; mangumsi a kababalin wenno panangtrato; kinakuspag wenno kinapangas ti kababalin; natangsit a panagtigtignay. Manmano unay a ti panagpannakkel addaan iti naimbag nga anag a panagragsak wenno panagrag-o a tumaud gapu iti maysa a tignay wenno sanikua. Ti sumagmamano a sao a kapadpada ti panagpannakkel ket panangipasindayaw iti bagi, kinapangas, kinatangsit.

Ti Hebreo a berbo a ga·ʼahʹ literal a kaipapananna ti “tumayag; ngumato” ket dayta ti sao a nagtaudan ti sumagmamano a Hebreo a sasao a mangipaawat iti ideya ti panagpannakkel. Dagitoy a nainaig a porma ket naipatarus a “kinatangsit,” “panangitan-ok iti bagi,” ken, agpadpada iti naimbag ken dakes a kaipapanan, “kinatan-ok.”​—Job 8:11; Eze 47:5; Isa 9:9; Pr 8:13; Sal 68:34; Am 8:7.

Ti Griego a sao a kau·khaʹo·mai, a kaipapananna ti “agpasindayag, ipagpannakkel, agrag-o,” naaramat met agpadpada iti naimbag ken dakes a kaipapanan, a ti pannakausarna masinunuo babaen ti konteksto.​—1Co 1:29; Ro 2:17; 5:2.

Ti Panagpannakkel ket Makaallilaw ken Makadadael. Ti napannakkel a tao mabalin a saanna a mabigbig nga isu napannakkel ket mabalin nga ipabasolna ti tigtignayna kadagiti sabali a makagapu tapno maliklikanna a sanguen ti kinapudno nga isu ket napannakkel. Ti tunggal tao rumbeng a naan-anay nga usigenna ti bagina ken dagiti motibona tapno maammuanna no addaan iti daytoy a dakes nga ugali. Ipakita ni apostol Pablo no apay a kasapulan ti umiso a motibo, ken no ania a pannakaammo ti rumbeng a maadda iti maysa a tao maipapan iti bagina mainaig iti daytoy a banag, idi kinunana: “No itedko amin a sanikuak tapno mapakan ti sabsabali, ket no iyawatko ti bagik, tapno makapagpasindayagak [kau·kheʹso·mai], ngem awan ayatko, saanak a pulos magunggonaan.”​—1Co 13:3.

Ti panagpannakkel rumbeng ngarud a maparut iti personalidad ti maysa a tao maipaay iti bukodna a pagimbagan. Napatpateg pay, masapul a maaramid dayta no kayatna a maay-ayo ti Dios. Masapul pay ketdi a guraenna dayta, ta kuna ti Sao ti Dios: “Ti panagbuteng ken Jehova kaipapananna ti pananggura iti dakes. Ginurak ti panangitan-ok iti bagi ken panagpannakkel ken ti dakes a dalan ken ti balusingsing a ngiwat.”​—Pr 8:13.

Ti indibidual a saan a mangiwaksi iti panagpannakkelna ket agsagabanto. “Ti panagpannakkel adda iti sakbay ti pannakarpuog, ken ti natangsit nga espiritu iti sakbay ti pannakaitibkol” (Pr 16:18), ket “ti balay dagidiay nangitan-ok iti bagbagida rakrakento ni Jehova.” (Pr 15:25) Adu ti pagarigan ti pannakarpuog a sinagaba dagiti napannakkel a tattao, dinastia, ken nasnasion.​—Le 26:18, 19; 2Cr 26:16; Isa 13:19; Jer 13:9; Eze 30:6, 18; 32:12; Da 5:22, 23, 30.

Makaallilaw ti panagpannakkel. Impatigmaan ni apostol Pablo: “No ti asinoman pagarupenna nga adda pategna idinto ta awan, al-allilawenna ti bukodna a panunot.” (Ga 6:3) Ti napannakkel a tao agparang nga ar-aramidenna ti pamay-an a pagimbaganna wenno pakagunggonaanna unay, ngem saanna nga ikabkabilangan ti Dios. (Idiligyo ti Jer 49:16; Apo 3:17.) Kuna ti Biblia: “Nasaysayaat ti agbalin a napakumbaba iti espiritu a kadua dagidiay naemma ngem iti pannakibingay iti samsam kadagidiay nangitan-ok iti bagbagida.”​—Pr 16:19.

Panagpasindayag. Ti Griego a berbo a kau·khaʹo·mai (agpasindayag) masansan a maar-aramat iti anag a managimbubukodan a panagpannakkel. Ipakita ti Biblia nga awan ti aniaman a pangibatayan ti tao a mangipasindayag iti bagina wenno kadagiti gapuananna. Iti kongregasion Kristiano idiay Corinto, adda sumagmamano a nagtangsit buyogen ti panangipannakkel iti bagbagida wenno iti dadduma a tattao, a mangpatpataudda iti pannakabingbingay iti kongregasion. Linalasag ti panagpampanunotda, a ti tattao ti pagpampannurayanda imbes a ni Kristo. (1Co 1:10-13; 3:3, 4) Dagitoy a tattao saanda a maseknan iti naespirituan a pagimbagan ti kongregasion, no di ket tinarigagayanda ti agpasindayag mainaig kadagiti makinruar a langa, nga iti kinapudnona saanda a kayat a tulongan dagiti padada a Kristiano a mangpatanor iti naimbag a puspuso iti sanguanan ti Dios. (2Co 5:12) Gapuna, siiinget a tinubngar ni apostol Pablo ti kongregasion, nga impakitana nga awan a pulos panggapuanda nga agpasindayag iti asinoman no di laeng ken Jehova a Dios ken iti naaramidannan kadakuada. (1Co 1:28, 29; 4:6, 7) Ti pagannurotan ket: “Ti agpasindayag, agpasindayag koma mainaig ken Jehova.”​—1Co 1:31; 2Co 10:17.

Ni Santiago a kabsat ni Jesus iti ina ad-adda pay a kinondenarna dagidiay nangipasindayag iti sumagmamano a nailubongan a gannuat a ganggandatenda nga aramiden, nga imbagana kadakuada: “Pagtangsityo dagiti napannakkel a kinapangasyo. Amin dagita a panagtangsit ket nadangkes.”​—San 4:13-16; idiligyo ti Pr 27:1.

Naimbag a Kaipapanan. Ti Hebreo a sao a ga·ʼahʹ, ti Griego a sao a kau·khaʹo·mai, ken dagiti nainaig a pormada naaramat met iti makaay-ayo nga anag a tumukoy iti panagpannakkel wenno panagragsak a tumaud gapu iti maysa a tignay wenno sanikua. Ti salmista nagsao maipapan iti Israel kas “ti pagpannakkel ni Jacob, nga inayat [ni Jehova].” (Sal 47:4) Iti maysa a padto ti pannakaisubli, kinuna ni Isaias a ti bunga ti daga “maysanto a banag nga ipagpannakkel.” (Isa 4:2) Ti apostol imbagana iti kongregasion idiay Tesalonica a, kas bunga ti pammati, ayat, ken panagibturda, “dakami a mismo ipagpannakkeldakayo iti nagtetengngaan dagiti kongregasion ti Dios.” (2Te 1:3, 4) Ipagpannakkel dagiti Kristiano a ni Jehova ti Diosda, nga isu naam-ammoda, ken binigbigna ida. An-annurotenda ti prinsipio a: “Daydiay agpangpangas maipapan iti bagina agpangas koma maipapan iti bagina gapu itoy mismo a banag, ti kaadda ti pannakatarus ken ti kaadda ti pannakaammo kaniak, a siak ni Jehova, Daydiay mangwatwatwat iti naayat a kinamanangngaasi, kinahustisia ken kinalinteg iti daga.”​—Jer 9:24; idiligyo ti Lu 10:20.