AGAR-ARAMID ITI TOLDA

Daydiay agar-aramid wenno agtartarimaan kadagiti tolda. Tukoyen ti Aramid 18:3 ti pagsapulan da Pablo, Aquila, ken Priscila babaen ti Griego a termino nga ske·no·poi·osʹ. Nadumaduma a kapanunotan ti naidatag no maipapan iti apag-isu a kita ti nasigo a tumatrabaho nga ipatuldo daytoy a sao (mabalin a maysa nga agar-aramid iti tolda, mangngabel iti tela, wenno agar-aramid iti tali); nupay kasta, bigbigen ti adu nga eskolar nga “agparang nga awan ti rason nga umadayo iti patarus a ‘dagiti agar-aramid iti tolda.’”​—The Expositor’s Greek Testament, inurnos ni W. Nicoll, 1967, Tomo II, p. 385.

Idi damo a sinarungkaran ni Pablo ti Corinto, nakipagyan kada Aquila ken Priscila “gapu ta agpapadada iti pagsapulan.” (Ara 18:1-3) Ni apostol Pablo ket taga Tarso iti Cilicia, lugar a nalatak gapu iti cilicium, lupot a naaramid iti dutdot ti kalding, a dayta ti naaramat iti panagaramid kadagiti tolda. (Ara 21:39) Kadagiti Judio idi umuna a siglo K.P., naibilang a nadayaw ti panangisuro iti barito iti maysa a pagsapulan uray pay no isu umawat iti nangatngato nga edukasion. Gapuna nalabit nakagun-od ni Pablo iti kapadasan iti panagaramid kadagiti tolda bayat nga agtutubo pay laeng. Mabalin met a panagaramid iti tolda ti trabaho idi ti apostol idiay Tesalonica (1Te 2:9; 2Te 3:8) ken iti dadduma pay a lugar. (Ara 20:34, 35; 1Co 4:11, 12) Saan a nalaka dayta a trabaho, ta naipadamag a ti cilicium gagangay a nasikkil ken nakersang, ngarud narigat a tabasen ken daiten.