Armagedon—Gubat a Mangiturong iti Pudno a Talna
ITI pagsasao dagidiay a mangtaming iti internasional a panaglalangen, ti sao a nausar a mangdeskribir iti kasasaad ti lubong ita ket MAD—Mutual Assured Destruction. Dayta a termino mainugot unay. Kadagiti 40 a tawtawen nanipud iti ibebettak ti immuna a bomba atomika iti pannakigubat idiay Hiroshima, Japan, din nakapapati ti irarang-ay dagiti pagurnongan dagiti nuklear nga armas iti lubong. Dadduma a report kunaenda a ti gatad ti katupag ti 12 a ribo a milion a tonelada iti TNT, wenno agarup 3 a tonelada maipaay iti tunggal tao ditoy daga!
Kas Daydiay “saan a nangparsua [iti daga] nga awan ti mamaayna, no di ket inaramidna dayta a pagnaedan,” ni Jehova a Dios saannanto, kinapudnona, a palubosan dagiti nasnasion a mangitultuloy iti dalanda a panagsusaid. (Isaias 45:18; kitaenyo met ti Salmo 104:5.) Sakbay nga addaanda ti gundaway a mangitiro kadagiti makapapatay nga armasda iti maysa ken maysa, ken sakbay ti panangdadaelda iti bagbagida met laeng ken ti aglikmutda, ti Nangaramid ken Makinkukua iti daga ken ti isuamin nga adda kenkuana tumakderto nga agtignay. Inkarina a daytoyto “ti gubat iti dakkel nga aldaw ti Dios a Mannakabalin-amin,” ti Armagedon iti Biblia!—Apocalipsis 16:14, 16.
Ti Armagedon, ngarud, ket saan laeng a basta sabali a gubat a mangrisot iti agdama-aldaw a napolitikaan a saan a pannakagunay. Ibanagnanto ti mabalin nga inanamaen ti tao iti isuamin a panawen. Ikkatennanto ti amin a makagapu iti natauan a gubat. Ipasdeknanto ti pudno a talna ditoy daga. Kangrunaan ngem amin isublinanto ti umiso a panangituray iti Makinkukua iti daga, ni Jehova a Dios, iti isuamin a pinarsuana. Kasano a maibanagto amin daytoy? Kitaentayo.
Talna—Babaen ti Panangpukaw iti Alikamen a Pakigubat
Maysa kadagiti rason no apay a dagiti nasnasion saanda a maikkat ti gubat isu ti saanda a nabaelan nga inikkat ti alikamen iti pannakigubat. Uray pay no ammoda a ti umad-adu nga armas ket agturong iti pannakapapatay, saanda a situtulok a mangidian iti dayta wenno pabannayaten dayta. Pudno a “nakaskasdaawto,” inton agtignay ni Jehova a mangibanag iti saan a naaramid dagiti nasnasion: “Runrungdoenna ti bai ti pana ket gupdenna a namimpinsan ti gayang; puoranna dagiti luglugan iti apuy.”—Salmo 46:8, 9.
Ni Jehova idi napalabas impakitanan ti abilidadna a mangdadael iti modernon unay wenno nakaam-amak unay nga armas a mabalin a pagpannakkel dagiti nasnasion. Kas pangarigan, insalakanna dagiti kasla awan depensana a tattao, dagiti Israelitas manipud iti nabileg a militaria iti umuna a pannakabalin iti lubong, ti Egipto, babaen iti panangusarna kadagiti puersa iti dandanum iti Nalabaga a Baybay. (Exodo 15:3-5) Umasping met iti dayta, dagiti nakasaysayaat a moderno nga armas ti Canaanita nga Ari a ni Jabin, “siam a gasut a karwahe iti gubat a nalandokan,” nga idadauluan ti hepe ti armadana a ni Sisera, ti naan-anay a saan a pulos a nagandar idi a pinalubosan ni Jehova ti pannakabalin ti dagdagus a layus. Dagiti kabusor ti naan-anay a nariribukda, a nangiturong iti pannakapukawda agingga iti maudi a lalaki. Ti banagna a ta “ti daga awan a pulos ti nakasingaanna bayat dagiti uppat a pulo a tawtawen.”—Kitaenyo ti Oc-ocom, kapitulo 4 ken 5:21, 31.
Nakapatpateg, dayta a mangikeddeng a gubat a maibusor kadagiti puersa ni Ari Jabin, ti napasamak iti napegges a ginget iti Kishon, “kadagiti dandanum iti Megiddo.” (Oc-ocom 5:19-21) Daytoy ngarud ti mangipaay kadatayo ti dramatiko a panangsirpat iti naan-anay a panagballigi ni Jehova iti umadani a gubat iti Armagedon.
Aniaman a “misterioso” a puersa, no adda man, nga usarento ni Jehova a maibusor kadagiti kabusorna saan pay nga ammo. Ti ammotayo a ta addaan iti usaren a puersa a naan-anay a mangdadael kadagiti namilitaran nga establisimiento dagiti nasnasion. Ammo dagiti sientista, kas pangarigan, a ti nabileg nga elektromagnetiko a puersa—a makapataud pay iti nakaro unay a nuklear a panagbettak—ti makabael a mangpugsat iti komunikasion ken ti namilitaran a pannakatimbeng dagiti sistema iti maysa a nasion, isu a mamagbalin a nariribuk ti isuamin a bambanag. Nainkalintegan ngarud, pagbalinento ni Jehova nga awan mamaay dagiti amin nga urnong dagiti nasnasion nga armas tapno makaipaay iti naan-anay a talna.
Talna—Para Kadagidiay Laeng Agtarigagay iti Dayta
Masansan a maikuna a dagiti gubgubat pagdadangadangan dagiti tattao, saan a dagiti armas. Ngarud, nupay no nasken a ti alikamen ti panaggugubat ti mapukaw, dayta a mismo saanna nga ipanamnama ti agnanayon a talna. Nainkalintegan, no tarigagayantayo a makita ti pudpudno a talna, ti panaggugura gapu iti politika, rasa, ken nasionalistiko a panaggugura a nangbingaybingay iti lubong kadagiti nakaad-adu a bloke ken kampo ti masapul a maikkat. Daytoy, ti aramidento ni Jehova babaen iti panangibanagna iti ikarkararag dagiti minilion iti isuamin a lubong: “Umay koma ti pagariam.”—Mateo 6:9, 10.
Uray pay no dagiti natungpalen a padpadto iti Biblia nalawag nga ipakitada a ti Misianiko a Pagarian iti im-ima ni Jesu-Kristo ti naipasdeken sadi langit idi tawen ti Gubat Sangalubongan I idi 1914, dayta ti saan nga inawat dagiti nasnasion. Awan ti uray maysa kadakuada a nangpanunot a mangikkat iti armasda ken mangisuko iti kinaturayda. Imbes ketdi, iti naganat a panangikagumaanda a mangituray iti lubong, nairamanda a naimbag iti kadadakkelan a gubat a napasamak pay laeng iti dayta a tiempo.
Naimpadtuan, ti maikadua a Salmo deskribirenna ti kasasaad: “Apay a dagiti nasnasion agriribukda ket dagiti tattao agpampanunotda iti maysa a banag nga ubbaw? Dagiti ar-ari ditoy daga pabilgenda dagiti bagbagida met laeng ken dagiti turayen agpipinnatigmaanda a maibusor ken ni Jehova ken maibusor met iti pinulotanna.” Dayta ti makagapu no apay a ti bilin ni Jehova iti tinudinganna nga Ari, ni Jesu-Kristo ket: “Rumekemto ida iti pang-or a landok, burakemto ida a kasla banga ti agdamdamili.”—Salmo 2:1, 2, 9; 110:2.
Daytoy a panangparmek ti pinulotan ti Dios nga Ari ti piguratibo a nadeskribir a detaliado idiay Apocalipsis 19:11–20:3. Ti Sao ti Dios, ni Jesu-Kristo, a sinuportaran dagiti angheliko a buybuyot, ti makita a nakasakay iti puraw a kabayo, “isu mangukomto ken makigubat a maipuon iti kinalinteg. . . . Ket iti ngiwatna rummuar ti maysa a kampilan a natadem tapno pangdunorna kadagiti nasnasion.” Ti maibanag a panangpapatay kadagiti nadangkes dakkelto unay. Iti naan-anay a panagballigina, ti naballigi nga Ari tamingennanton ti pudpudno a nakabasol a makagapu kadagiti amin a rigrigat ken panagsagaba ditoy daga. Ti sirmata iti Apocalipsis deskribirenna daytoy a kasla naibanagen, a kunkunana: “Ket tiniliwna daydi dragon, daydi uleg a kadaanan, nga isu ti Diablo ken Satanas, ket pinarautanna iti bayat ti sangaribo a tawen.”
Talna—Sangaribo a Tawen ken iti Labesna Pay
Mapanunotyo kadi no anianto ti kaipapanan ti sangaribo a tawen ti talna a maipaay iti sangatauan? Dagiti autoridad ita bigbigenda a ti bisin, saksakit, ken kinapanglaw kadagiti nasnasion ti mabalin a maikkat no uray ti sangkabassit laeng iti ginasut a bilion a doliar a mabusbos iti armas iti tinawen ti mausar a mangtaming kadakuada. Panunotenyo no anianto ti maibanag no ti isuamin a gameng iti daga ti mausar a maipaay iti pakagunggonaan. Saan nga arapaap nga awan ti mamaayna ti nasirmata idi a ni Isaias ti napaltiingan a mangipadto maipapan iti turay iti “Prinsipe iti Kappia,” ni Jesu-Kristo: “Ti idadakkel ti panangiturayna ken ti kappia awanto ti inggana.”—Isaias 9:6, 7.
Ti naganat unay a saludsod ket: Malasatanyonto aya ti pannakadadael idiay Armagedon tapno tagiragsakenyo ti awan inggana a talna? Mabalin nga imtuodenyo, ‘Ania ti masapul nga aramidek tapno makalasat?’ Adtoy ti balakad ti Biblia: “Birukenyo ni Jehova, dakayo amin a naemma iti daga a nangtungpal kadagiti bilbilinna. Birukenyo ti kinalinteg, birukenyo ti kinaemma. Nalabit a dakayo maitalimengkayto iti aldaw iti pungtot ni Jehova.” (Sofonias 2:2, 3) Dagiti Saksi ni Jehova maragsakandanto a tumulong kadakayo a mangaramid iti kasta. Iti kasta, ti Armagedon agbanagto a maipaay kadakayo, saan a maysa a gubat iti naan-anay a pannakadadael, no di ket maysa a gubat a mangiturong iti pudpudno a talna.
[Ladawan iti panid 6]
Idiay Nalabaga a Baybay impakita ni Jehova ti abilidadna a mangdadael iti nakaam-amak nga armas iti gubat