Ti Panagkaykaysa Sigurado Baeten ken Kristo
Dagiti Tampok Manipud Taga Efeso
IDI karrugi ti 52 K.P., ni apostol Pablo nangaskasaba idiay Efeso. Daytoy nabaknang a siudad ti komersio idiay Asia Menor sentro met ti ulbod a relihion. Ngem rimmangpaya ti Kinakristiano sadiay kalpasan a nagsubli ni Pablo idiay Efeso, nalabit iti kalam-ek ti 52/53 K.P. Isut’ nagpalpalawag nga inaldaw iti maysa nga auditorium ti eskuelaan ken nangaskasaba iti balaybalay bayat ti panagianna sadiay ti agarup tallo a tawen.—Aramid 19:8-10; 20:20, 21, 31.
Bayat ti pannakaibaludna idiay Roma idi agarup 60-61 K.P., sinuratan ni Pablo dagiti Kristiano a taga Efeso. Ti panagkaykaysa a kadua ken baeten ni Jesu-Kristo ti tema ti suratna. Kinapudnona, daytat’ naglaon ti 13 a reperensia iti ‘makipagkaykaysa ken Kristo,’ nga ad-adu ngem kadagiti dadduma a surat ni Pablo. Kas kadagiti taga Efeso, magunggonaantay manipud sasao ni Pablo maipapan iti akem ni Kristo, a lisian ti imoralidad ken busoren ti dakes a puersa dagiti espiritu.
Panagkaykaysa iti Panggep ti Dios
Umuna, inlawlawag ni Pablo no kasanot’ panangiyeg ti Dios ti panagkaykaysa babaen ken Kristo. (1:1-23) Pinanggep ni Jehova nga urnongen manen amin a bambanag idiay langit ken ditoy daga babaen iti “maysa nga administrasion” (maysa a pamay-an a panangaywan kadagiti bambanag). Baeten ken Kristo, ti Dios pagkaykaysaenna kenkuana dagidiay napili a maipaay iti nailangitan a biag ken dadduma pay nga agtaeng ditoy daga. Itatta, ti Dios pinagkaykaysanan dagiti napulotan ken “ti dakkel nga umariwekwek,” ket ti ‘pannakaur-urnong amin a bambanag ditoy daga’ agtultuloy agingga a dagidiay adda kadagiti tanem a pakalaglagipan mangngegandanto ti timek ni Jesus ket rummuarda. (Apocalipsis 7:9; Juan 5:28, 29) Rebbengtay ti agyaman iti daytoy, kas panangikararag ni Pablo a dagiti taga Efeso patgenda koma ti sagana ti Dios a maipaay kadakuada.
Sumaruno a naiturong ti atension kadagiti Kristiano a Gentil, a naminsan nataydan iti basol. (2:1–3:21) Babaen ken Kristo, nawaswas ti Linteg ken naisaad ti pakaibatayan ti panagkaykaysa dagiti Judio ken Gentil ken agbalinda a templo ti Dios a pagtaengan ti espiritu. Ti kinamanangaywan ni Pablo isut’ mangipakaammo iti nasantuan a palimed a dagiti Gentil mabalindan ti makipagkaykaysa ken Kristo, a baeten kenkuana makaasidegda iti Dios buyogen ti wayawaya ti panagsao. Ni Pablo inkararaganna manen dagiti taga Efeso, nga ita dawdawatenna ken Jehova a mapatibkerda koma iti pammati ken ayat.
Dagiti Bambanag a Mamagkaykaysa
Impakita ni Pablo a ti Dios nangted kadagiti banag a mamagkaykaysa. (4:1-16) Maysa kadagitoy isut’ maymaysa a naespirituan a bagi nga isu ti kongregasion. Daytoy a bagi agtigtignay iti panagmaymaysa iti sidong ti kinaulo ni Kristo. Ken isut’ nangted ti sagsagut a lallaki a tumulong iti amin iti panagmaymaysa ti pammati.
Ni Jehova pinagbalinna met a posible ti panangiparangarang kadagiti Nakristianuan a kualidad a mangparang-ay ti panagkaykaysa. (4:17–6:9) Gaput’ panangikawesda “ti baro a personalidad,” malisian dagiti Kristiano dagiti kinadakes kas ti narugit a sasao. Magmagnada a sisisirib, ipakitadat’ panagraem ken Kristo, ken ipamatmatdat’ umiso a panagpasakup.
Mainayon pay, ti Dios natulonganna dagiti Kristiano a mangbusor kadagiti dakes a puersa dagiti espiritu a mangdadael ti panagkaykaysada. (6:10-24) Dagiti naespirituan a kabal manipud iti Dios ti mangted ti kasta a salaknib. Gapuna usarentay dayta ken agkararagtay a sipapasnek, nga iraman dagiti kapammatiantayo kadagiti ar-ararawtayo.
Anian a nagsayaat a balakad ti inted ni Pablo kadagiti taga Efeso! Sapay koma ta ipangagtay dayta babaen ti pananglisi ti imoralidad ken panangbusor kadagiti dakes a puersa dagiti espiritu. Ken patgentayo koma un-unay ti panagkaykaysa a tagtagiragsakentayo baeten ken Jesu-Kristo.
[Kahon/Ladawan iti panid 24]
Dagiti Dumardarang a Gayang: Ti naespirituan a kabal ramanenna “ti kalasag ti pammati” a pangsarapa, wenno mamagbalin a di makadangran, kadagiti “dumardarang a gayang” ni Satanas. (Efeso 6:16) Dadduma kadagiti gayang nga us-usaren dagiti Romano isuda dagiti adda kawawna a runo nga adda landok a pagikabilan idiay babaen ti tiradna a napunno iti nakabarbara a naphtha. Dagitat’ maipana manipud di unay nabennat a bai ti pana tapno saan a maiddep ti apuy, ket ti panangbuyat laeng kadakuada iti danum ti ad-adda a mangpakaro ti pudot ti apuyna. Ngem dagiti dadakkel a kalasag salaknibanna dagiti soldado manipud kadagita a pana, kas ti pammati ken Jehova tulonganna dagiti ad-adipenna “a mangsarapa kadagiti isuamin a dumardarang a gayang ti managdakdakes.” Wen, ti pammati tulongannatayo a mangbusor kadagita a bambanag kas panangatake dagiti dakes nga espiritu agraman dagiti pannulisog nga agaramid ti dakes, isusurot iti materialistiko a wagas ti panagbiag, ken isusuko iti buteng ken panagduadua.