Talaga Kadi nga Apresiarenyo Dagiti Bendision nga Aggapu ken Jehova?
NAPAN iti botika ti agkabannuag a lalaki a ni Kenichi tapno gumatang iti agas gapu ta medio agpanateng. Idi natomarna ti agas, naaddaan iti allergy a namaggagatel ken namaglapuyo iti intero a bagina. Di pakasdaawan, nagduaduaan ni Kenichi no umiso met laeng wenno saan ti panangasikaso kenkuana ti parmasiutika.
Dagiti dadduma nalabit matmatanda ni Jehova a Dios a kas iti panangmatmat ni Kenichi iti parmasiutika. Pagduaduaanda no agpayso a maseknan iti tunggal maysa kadatayo ti Dios a mannakabalin-amin, ni Jehova. Nupay bigbigenda a naimbag ti Dios, dida patien a personal a maseknan iti tunggal maysa kadatayo. Nangnangruna a pudno daytoy no aglak-amda kadagiti di nasayaat wenno no ti panangannurotda kadagiti prinsipio ti Biblia ket mapasarunuan kadagiti narikut a problema. Gapu iti kurang a pannakaawat, matmatanda dagiti parikutda a kasla kadagiti gagatel ken lapuyo a bigla a timmaud iti bagi ni Kenichi a kas ket tay ti Dios ti makimbasol.—Proverbio 19:3.
Saan a maipada ni Jehova kadagiti imperpekto a tattao. Limitado ti pannakaammo ken kabaelan dagiti tattao. Dida matarusan a naan-anay dagiti napaypayso a kasapulan ti sabsabali, a kas iti parmasiutika ni Kenichi. Maisupadi iti dayta, awan banag a di ammo ni Jehova. Masansan a tultulongannatayo ni Jehova a ditay ammo ken ditay mabigbig dayta a kinapudno gapu ta adda pagannayasantayo a mangipamaysa iti awan kadatayo ket ditay makita dagiti adu a bendision nga adda kadatayo. Imbes nga ipabasoltay a dagus ken Jehova dagiti parikuttayo, ikagumaantay koma a kitaen dagiti tagtagiragsakentayo a bendision a naggapu ken Jehova.
Sigun iti Webster’s Ninth New Collegiate Dictionary, madepinar ti “bendision” kas “banag a makaipaay iti ragsak wenno pagimbagan.” Bigbigenyo kadi a nangnangruna a pudno daytoy kadagiti bendision a naggapu ken Jehova?
Awan Umasping Kenkuana Kas Manangipaay
No kunaen ti asawa a babai a ti asawana ket naimbag a manangipaay, masansan a kayatna a sawen nga umiso ti panangasikaso ti asawa a lalaki kadagiti kasapulan ti pamilia, nga ipapaayna ti umdas a taraon, pagtaengan, ken kawes para iti pagragsakan ken pagimbagan ti pamilia. Kasanot’ kinaimbag ni Jehova kas Manangipaay kadagiti kasapulantayo? Usigentayo a naimbag ti planetatayo a Daga, ti pagtaengan ti tao. Naisaad daytoy iti 150,000,000 a kilometro manipud iti init, nga apagisu a kaadayo para iti kalalainganna a temperatura a mamagbalin a posible ti biag ditoy daga. Naan-anay ti pannakadisenio ti 23.5-degree a panaglikig ti dagatayo, a pakaigapuan ti nadumaduma a panawen a mangpataud iti nawadwad nga apit. Kas resultana, ti daga tartaraonanna ti nasurok a lima a bilion a tattao. Ni Jehova ket pudno a nakaskasdaaw a Manangipaay!
Mainayon pay, ipanamnama kadatayo ti Biblia nga interesado unay ni Jehova kadatayo kas indibidual ken iti pagimbagantayo. Panunotenyo laengen, mainaganan ni Jehova ti tunggal maysa kadagiti binilbilion a bituen, ken awan uray maysa a billit tuleng a matnag iti daga a dina ammo. (Isaias 40:26; Mateo 10:29-31) Anian nga ad-adda pay ti pannakaseknanna kadagiti tattao nga agayat kenkuana ken nagatang iti napateg a dara ti dungdungnguenna nga Anak, ni Jesu-Kristo! (Aramid 20:28) Umiso ti kuna ti masirib a tao: “Ti bendision ni Jehova ti mangpabaknang; ket saanna nga anayan iti ladingit.”—Proverbio 10:22.
Dagiti Bendision a Mangpabaknang Kadatayo
Adda banag a nakapatpateg kadatayo a rumbeng a pagyamanantayo unay. Ania dayta? Ipabigbig dayta ti Biblia a kunana: “Ti linteg ta ngiwatmo nasaysayaat kaniak ngem rinibu a balitok ken pirak.” (Salmo 119:72; Proverbio 8:10) Nupay nakapatpateg ti nasudi a balitok, ad-adda a matarigagayan ti linteg ni Jehova. Ti umiso a pannakaammo iti lintegna agraman ti nauneg a pannakaawat ken kinasaririt nga ipapaay ni Jehova kadagiti napasnek nga agsapsapul iti kinapudno ket bambanag a masapul a tagipatgen. Dagita ti tumulong kadatayo a mangsalaknib iti bagbagitayo, mangsaranget kadagiti naririkut a kasasaad, mangtaming a sibaballigi kadagiti parikut, ket iti kasta maaddaantayo iti pannakapnek ken ragsak.
Pudno daytoy uray kadagiti ubbing pay. Usigenyo no kasano a rinisut ti maysa nga ubing dagiti parikutna babaen ti panangsurotna iti linteg ni Jehova. Asideg iti Tokyo ti pagnanaedan ti ubing a ni Akemi. Inyaplikar da tatang ken nanangna dagiti prinsipio ti Biblia iti panangsanayda kenkuana ket babaen ti sao ken ulidan natulonganda ti balasitangda a mangpatanor iti ayatna ken Jehova ken iti kaarruba. Yantangay ammoda nga addanto dagiti parikut a sanguenna idiay eskuelaan, inaramidda ti amin a kabaelanda a mamagsagana kenkuana. Nupay kasta, idi nageskuelan ni Akemi iti elementaria, minatmatan ti sumagmamano a kaklasena kas “naiduma” gapu ta agkararag sakbay a mangan ken sipapasnek a liniklikanna dagiti di nainkasuratan nga aramid. Di nagbayag kanayonen a sutsutilen ti grupo dagiti nauyong, nga ipasulida kalpasan ti klase sa tungpaenda, tiritirenda ti takiagna, ken pagang-angawanda.
Saan a bimmalbales ni ubing nga Akemi, ket dina met kinabuteng dagiti mangikuskuspil kenkuana. Imbes ketdi, inkagumaanna nga iyaplikar ti naadalna. Gapu iti nasayaat a kondukta ken kinaturedna, adu kadagiti kaeskuelaanna ti nangrespeto kenkuana. Isuda ti nagipulong iti mannursuro, ket sipud iti daydi nga aldaw, saandan nga inlupitlupit ni Akemi idiay eskuelaan.
Aniat’ nakatulong ken Akemi a nangtaming a sibaballigi iti narikut a kasasaad? Ti umiso a pannakaammo, nauneg a pannakaawat, ken sirib manipud ken Jehova nga intukit kenkuana dagiti dadakkelna. Pagaammona unay ti maipapan iti panagibtur ni Jesus, ket dayta ti nangtignay kenkuana a mangtulad iti ehemplona. Ti Biblia ti nakatulong kenkuana a mangtarus a makaaramid ti dadduma a tattao kadagiti dakes a bambanag gapu iti kinaawan pannakaammo, ket dayta ti nangguyugoy kenkuana a manggura iti dakes nga inaramid dagidiay manangirurumen nupay dina kagura a mismo dagiti tattao.—Lucas 23:34; Roma 12:9, 17-21.
Siempre, awan nagannak a mayat a mangkita a malalais ken mailupitlupit ti anakda. Nupay kasta, mailadawanyo ti ragsak dagiti nagannak ni Akemi idi naammuanda amin a detalye ti napasamak. Pudno a bendision manipud ken Jehova ti kakasta nga annak.—Salmo 127:3; 1 Pedro 1:6, 7.
Siaanus nga Aguray ken Jehova
Nupay kasta, sakbay nga awatenyo dagiti bendision ni Jehova, no dadduma masapul nga urayenyo ti tiempona. Ammo ni Jehova ti kasasaadyo ket ipaayna ti kasapulanyo iti tiempo a kasayaatan kadakayo. (Salmo 145:16; Eclesiastes 3:1; Santiago 1:17) Nalabit pagragsakanyo ti mangan iti prutas, ngem aniat’ makunayo iti mangipasango kadakayo iti prutas a di pay mabalin a kanen? Mansanas man, naranghita, wenno uray ania, kaykayatyo ti naluom, natubbog, ken nasam-it a prutas. Umasping iti dayta, ipaay ni Jehova ti kasapulanyo iti umiso a tiempo—saan a nasapa unay ken saan a nakaladladaw.
Laglagipenyo ti kapadasan ni Jose. Nupay awan basolna, naibalud idiay Egipto. Ti padana a balud, a para serbi iti arak ken Faraon, nangnamnama a maruk-atan ket inkarina nga isangona ken Faraon ti kaso ni Jose. Ngem idi naruk-atanen nalipatannan a namimpinsan ni Jose. Kasla nabaybay-anen ni Jose. Nupay kasta, kalpasan ti dua a tawen, naruk-atan met laengen iti pagbaludan ket idi agangay pinagbalinda a maikadua nga agturay iti Egipto. Imbes a nasikoran, naguray ni Jose ken ni Jehova. Gapu iti daytoy, nabendisionan iti wagas a nakaisalakanan nga agpadpada dagiti Israelita ken dagiti Egipcio.—Genesis 39:1–Gen 41:57.
Panglakayen idi ni Masashi iti maysa a kongregasion idiay makin-amianan a Japan. Saan a naibalud, ngem kasapulan idi nga aguray ken Jehova. Apay? Sipud pay idi nairugi idiay Japan ti Ministerial Training School, eskuelaan a pakasanayan dagiti kualipikado a ministro a Kristiano, napalalo ti gagarna a tumabuno. Sipapasnek nga inkarkararagna dayta a pribilehio. Naawis ti kaduana a payunir, ngem nupay napalalo ti essemna, saan a naawis ni Masashi. Naladingitan unay.
Nupay kasta, impamuspusanna a sarangten ti rikriknana. Nagadal iti Biblia ken kadagiti publikasion nga impablaak ti Watch Tower Society, nga impamaysana kadagiti tema maipapan iti panagpakumbaba ken panangkontrol iti rikrikna. Inlintegna ti panagpampanunotna ket iti kasta tinagiragsakna ti ad-adda a pannakapnek iti trabahona. Kalpasanna, idi dina ninamnama dayta, naawis a tumabuno iti eskuelaan.
Yantangay napatanorna dagiti galad a kas iti kinaanus ken kinapakumbaba, ad-adda a nagunggonaan iti eskuelaan. Idi agangay, naipaayan ni Masashi iti pribilehio nga agserbi kadagiti kakabsatna kas agdaldaliasat a manangaywan. Wen, ammo ni Jehova ti kasapulan ni Masashi ket impaayna dayta iti kasayaatan a tiempo.
Gun-odenyo ti Pamendisionna
Gapuna, ni Jehova ket saan a kas iti parmasiutika. Nupay ditay mabigbig ti pammateg ken pannakaseknan ni Jehova, nadumaduma dagiti kinaimbag nga ipaayna—kadagiti tiempo ken wagas a kasayaatan kadatayo. Gapuna itultuloyyo a gun-oden ti pamendisionna. Laglagipenyo nga adun ti pagyamananyo kenkuana. Naparaburankayo kadagiti napapateg a probision tapno makapagtultuloykayo nga agbiag ditoy daga. Naipaayankayo iti pannakaammo maipapan ken Jehova ken kadagiti perpekto a dalanna. Naipaayankayo iti nauneg a pannakaawat. Ken nagun-odyo ti kinasaririt. Agpaay amin dagitoy iti pagimbagan ken pagragsakanyo.
Tapno ad-adda pay a matagiragsakyo ti pamendision ni Jehova, itultuloyyo nga adalen a regular ti Biblia. Kiddawenyo ken Jehova a tulongannakayo a mangtarus ken mangyaplikar kadagiti arig saniata a pannursuro iti naipaltiing a Saona. Pagbalinendakayo a pudpudno a nabaknang, tapno awan pagkuranganyo. Wen, dagita ti mangted kadakayo iti kinaragsak ken pannakapnek itan ken nasaliwanwan a biag iti um-umayen a baro a lubong.—Juan 10:10; 1 Timoteo 4:8, 9.
[Ladawan iti panid 23]
Napatpateg ti pamendision ni Jehova ngem iti balitok